អភិបាលខេត្តត្បូងឃ្មុំ ជំរុញឲ្យរដ្ឋបាលស្រុកពញាក្រែក បន្តបម្រើសេវាសាធារណៈជូនពលរដ្ឋឲ្យកាន់តែល្អទ្វេរឡើងបន្ថែមទៀត

ភ្នំពេញ៖ ឯកឧត្តម ប៉ែន កុសល្យ អភិបាលនៃគណ:អភិបាលខេត្តត្បូងឃ្មុំ បានធ្វើការជំរុញដល់ថ្នាក់ដឹកនាំ និងមន្ត្រីរាជការនៃរដ្ឋបាលស្រុកពញាក្រែក បន្តបម្រើសេវាសាធារណៈជូនបងប្អូនពលរដ្ឋឲ្យកាន់តែល្អទ្វេរឡើង លឿន មានទំនុកចិត្តបន្ថែមទៀត។

ឯកឧត្តម ប៉ែន កុសល្យ បានមានប្រសាសន៍បែបនេះ ក្នុងឱកាសដែលឯកឧត្តម ជាមួយឯកឧត្តម ឡុង ធាម ប្រធានក្រុមប្រឹក្សាខេត្ត អញ្ជើញចុះជួបសំណេះសំណាលជាមួយថ្នាក់ដឹកនាំ មន្រ្តីរាជការនៃរដ្ឋបាលស្រុកពញាក្រែក ខេត្តត្បូងឃ្មុំ នាថ្ងៃទី២៣ ខែកក្កដា ឆ្នាំ២០២៤ នៅសាលប្រជុំសាលាស្រុក។

មានប្រសាសន៍នាឱកាសនោះដែរ ឯកឧត្តម ប៉ែន កុសល្យ បានផ្តល់អនុសាសន៍ល្អៗមួយចំនួនដល់រដ្ឋបាលស្រុកពញាក្រែក ដើម្បីយកទៅអនុវត្តឱ្យមានប្រសិទ្ធិភាពបន្ថែមទៀត ជាពិសេសរក្សាបាននៅសាមគ្គីភាព រួបរួមគ្នា និងបំពេញនៅកិច្ចការងារភារកិច្ចរបស់ខ្លួនឱ្យបានល្អប្រសើរដើម្បីជួយឱ្យខេត្តត្បូងឃ្មុំ ទទួលបានភាពរីកចម្រើនជឿនលឿនទៅមុខជាបន្តទៀត។

ឆ្លៀតក្នុងឱកាសនោះ ឯកឧត្តមអភិបាលខេត្ត បានប្រកាសថានឹងរៀបចំទូងស្គរ វាយគង ប្រគុំតន្ត្រីខ្នាតធំ៥ថ្ងៃ តាំងពិពរណ៍ និងអុជកាំជ្រួច ដើម្បីធ្វើការអបអរសាទរការបើកការដ្ឋានសាងសង់គម្រោងព្រែកជីកហ្វូណនតេជោ នៅថ្ងៃ០៥ ខែសីហា ឆ្នាំ២០២៤ ខាងមុខនេះ។

បើតាមរបាយការណ៍របស់លោក លី សុភាលីន អភិបាលស្រុកពញាក្រែក បានឲ្យដឹងថា គិតត្រឹមឆមាសទី១ ឆ្នាំ២០២៤នេះ ប្រជាពលរដ្ឋទទួលបានសេវាសាធារណៈសរុបចំនួន ១៨,៩៤៥នាក់ ស្រីចំនួន ១០,៨៩០នាក់។ ចំណែកសមិទ្ធិផល និងវិស័យដទៃៗទៀត កំពុងមានសន្ទុះនៃការកើនឡើងជាលំដាប់ផងដែរ ៕