ឧត្តមសេនីយ៍ទោ សោម ស៊ុន អញ្ជើញសួរសុខទុក្ខកម្លាំងបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលរងផលប៉ះពាល់ដោយខ្យល់កន្ត្រាក់ ក្នុងពេលស្នាក់នៅបំពេញភារកិច្ចបង្ក្រាបបទល្មើសធនធានធម្មជាតិ
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍គណៈកម្មការការពារ គ្រប់គ្រង និងបង្ក្រាបទល្មើសធនធានធម្មជាតិ និងសហការី នៅថ្ងៃទី២៦ ខែកក្កដា ឆ្នាំ២០២៤ បានអញ្ជើញសំណេះសំណាលសាកសួរសុខទុក្ខ កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលរងផលប៉ះពាល់ដោយខ្យល់កន្ត្រាក់ ក្នុងពេលកំពុងស្នាក់នៅប្រចាំការបំពេញបេសកកម្មការពារ ទប់ស្កាត់ និងបង្ក្រាបបទល្មើសធនធានធម្មជាតិ នៅតំបន់ត្រពាំងក្រវិល ក្នុងដែនជម្រកសត្វបឹងពែរ ស្ថិតក្នុងឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ ។
លោកអនុសេនីយ៍ឯក ចាន់ រ៉ន មេបញ្ជាការ កងអនុសេនាធំទី៣ កងវរសេនាតូចលេខ២ ដែលទទួលខុសត្រូវប្រចាំការការពារទប់ស្កាត់បទល្មើសធនធានធម្មជាតិនៅតំបន់ត្រពាំងក្រវិល បានរាយការណ៍បញ្ជាក់ថា នៅវេលាម៉ោង១១ និង១៥នាទីយប់ ថ្ងៃទី២៤ ខែកក្កដា ឆ្នាំ២០២៤ កន្លងទៅនេះ មានភ្លៀងមួយមេធំ និងមានខ្យល់កន្ត្រាក់ បណ្តាលឲ្យបាក់មែកឈើ សង្កត់លើរោងស្នាក់នៅរបស់កងកម្លាំង បានធ្វើឲ្យខូចខាតជម្រកស្នាក់នៅមួយចំនួន ប៉ុន្តែមិនបណ្តាលឲ្យមានការរងរបួសធ្ងន់ធ្ងរដល់កងកម្លំាងយោធិនដែលកំពុងសម្រាក នៅក្នុងរោងស្នាក់នៅឡើយ ។
ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍គណៈកម្មការការពារ គ្រប់គ្រង និងបង្ក្រាបបទល្មើសធនធានធម្មជាតិខេត្តកំពង់ធំ បានថ្លែងនូវការកោតសរសើរចំពោះកងកម្លាំងនៃបញ្ជាការរដ្ឋានតំបន់ប្រតិបត្តិការសឹករងកំពង់ធំ ដែលបានពុះពាររាល់ការលំបាកទាំងការស្នាក់នៅ ការហូបចុក និងការចេញបំពេញបេសកកម្ម ក្នុងរដូវស្សានេះដោយ មានភ្លៀងធ្លាក់ស្ទេីររៀងរាលថ្ងៃ ហេីយផ្លូវលំបាកក្នុងការធ្វើដំណើរក្តី ប៉ុន្តែបងប្អូននៅតែខិតខំបំពេញភារកិច្ចតាមបទបញ្ជារបស់ថ្នាក់ដឹកនាំ គ្រប់លំដាប់ថ្នាក់ នៃកងយោធពលខេមរភូមិន្ទ និងបទបញ្ជារបស់ឯកឧត្ដមអភិបាលខេត្ត ប្រធានគណបញ្ជាការឯកភាពរដ្ឋបាលខេត្តកំពង់ធំ ប្រកបដោយស្មាតីទទួលខុសត្រូវខ្ពស់ ។
ឧត្តមសេនីយ៍ទោ សោម ស៊ុន បានណែនាំដល់យោធិនទាំងអស់ ត្រូវបន្តសហប្រតិបត្តិការអនុវត្ថបទបញ្ជាស្តីពីការការពារ ទប់ស្កាត់ និងបង្ក្រាបបទល្មើសធនធានធម្មជាតិ ដែលថ្នាក់លើបានប្រគល់ជូនឲ្យទទួលបានជោគជ័យ ។ ដោយ ត្រូវបំពេញភារកិច្ចក្នុងកិច្ចសហប្រតិបត្តិការជាមួយកម្លាំងចម្រុះ និងត្រូវបំពេញភារកិច្ច ដោយម្ចាស់ការ ប្រកបដោយដោយស្មារតីទទួលខុសត្រូវខ្ពស់ក្នុងការការពារ ទប់ស្កាត់ និងបង្ក្រាបឲ្យខាងតែបាន នូវរាល់បទល្មើសធនធានធម្មជាតិមិនឲ្យមានការកើតឡើងជាថ្មី ជាដាច់ខាត ។
នៅក្នុងឱកាសនេះដែរ ឧត្តមសេនីយ៍ទោ សោម ស៊ុន បាននាំយកអំណោយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ប្រគល់ជូនកងកម្លាំងនៃបញ្ជាការដ្ខានតំបន់ប្រតិបត្តិការសឹករងកំពង់ធំ រួមមានប្រេងសាំងសម្រាប់ចាក់មធ្យោបាយធ្វើដំណើរ ចំនួន ៦០ លីត្រ អង្ករចំនួន៥០គីឡូក្រាម មីជាតិចំនួន៦កេស កៅស៊ូតង់ចំនួន១ផ្ទាំង ទឹកបរិសុទ្ធចំនួន៥០យួរ ត្រីខកំប៉ុងចំនួន១០យួរ ទឹកត្រីទឹកស៊ីអ៊ីវចំនួន៨យួរ បន្លែបង្ការ និងថវិកាមួយចំនួន សម្រាប់ជួសជុលមធ្យោបាយធ្វើដំណើរដែលខូចខាត ក្នុងពេលបំពេញបេសកកម្មកន្លងទៅ ។
