ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញពិនិត្យវឌ្ឍនភាពការងារសាងសង់អគារសិក្សាថ្មី នៅអនុវិទ្យាល័យបន្លិចប្រាសាទ និងការសាងសង់ផ្លូវបេតុងអាមេមួយខ្សែ នៅស្រុកពាមរក៍

ភ្នំពេញ៖ នាព្រឹកថ្ងៃទី២៧ ខែកក្កដា ឆ្នាំ២០២៤ នៅឃុំបន្លិចប្រាសាទ ស្រុកពាមរក៍ ខេត្តព្រៃវែង ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និងលោកជំទាវ បានអញ្ជើញចុះពិនិត្យមើលវឌ្ឍនភាពការសាងសង់អគារសិក្សាមួយខ្នងនៅអនុវិទ្យាល័យបន្លិចប្រាសាទ និងការសាងសង់ផ្លូវបេតុងអាមេមួយខ្សែ ប្រវែងជាង២,១០០ម៉ែត្រ នៅស្រុកពាមរក៍ ខេត្តព្រៃវែង ដែលជាអំណោយផ្ទាល់របស់ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា និងលោកជំទាវ រួមជាមួយសប្បុរសជននានា ដែលបានប្រារព្ធធ្វើពិធីបញ្ចុះបឋមសិលាសាងសង់ តាំងពីថ្ងៃទី២១ ខែមិថុនា ឆ្នាំ២០២៣ កន្លងមក ដែលរហូតមកដល់ពេលនេះ សម្រេចបានប្រមាណជា ៦០ភាគរយហើយ។

សូមជម្រាបថា អំណោយអគារសិក្សា១ខ្នង កម្ពស់ពីរជាន់មាន៨បន្ទប់ នៅសាលាអនុវិទ្យាល័យបន្លិចប្រាសាទ គឺជាចំណងដៃដ៏ថ្លៃថ្លារបស់ឯកឧត្តមកិត្តិសេដ្ឋាបណ្ឌិត អនុប្រធានទី១ នៃរដ្ឋសភា និងលោកជំទាវ រួមជាមួយសប្បុរសជន ជូនដល់លោកគ្រូអ្នកគ្រូ និងសិស្សានុសិស្ស នៅអនុវិទ្យាល័យបន្លិចប្រាសាទ ស្ថិតក្នុងភូមិព្រែកចាម ឃុំបន្លិចប្រាសាទ ស្រុកពាមរក៍ ខេត្តព្រៃវែង គឺជាការរួមចំណែកនៅក្នុងការកសាង និងអភិវឌ្ឍន៍ធនធានមនុស្សឱ្យមានការរីកចម្រើនឡើងថែមទៀត។

បន្ទាប់មក ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា ក៏បានអញ្ជើញចុះពិនិត្យពីវឌ្ឍនភាពការសាងសង់ផ្លូវបេតុងអាមេមួយខ្សែប្រវែង២,១០០ម៉ែត្រ ដែលបានសាងសង់ចាប់ពីវត្តព្រែកខ្សាយ រហូតដល់វត្តបន្លិចប្រាសាទ ដែលបានធ្វើពិធីបើកការដ្ឋានកាលពីថ្ងៃទី៨ ខែមីនា ឆ្នាំ២០២៤កន្លងទៅថ្មីៗនេះ៕