សម្ដេចធិបតី ហ៊ុន ម៉ាណែត៖ កូនខ្មែរ ត្រូវចេះភាសាខ្មែរ និងគណិតឲ្យខ្លាំង ព្រោះបើមិនអីចឹងទេ យើងពិបាក

ភ្នំពេញ៖ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងជំរុញឲ្យពង្រឹងការសិក្សាមុខវិជ្ជាភាសាខ្មែរ សម្រាប់សិស្សានុសិស្សនៅថ្នាក់បឋមសិក្សា។ សម្ដេច នឹងជំរុញពង្រឹងបឋមសិក្សាឲ្យកាន់តែរឹងមាំ ដើម្បីឈានទៅកម្រិតផ្សេងទៀត។

ក្នុងឱកាសចុះពិនតិ្យវឌ្ឍនភាពសាលាអនុវត្ត ក្រុងកំពង់ឆ្នាំង​ ខេត្តកំពង់ឆ្នាំង ដែលជាសាលាគំរូមួយ បន្ទាប់ពីរាជរដ្ឋាភិបាលថ្មី មានគោលនយោបាយ ដាក់ឱ្យអនុវត្តសាកល្បង នូវសាលាគំរូមួយចំនួន នាថ្ងៃទី២៧ កក្កដានេះ សម្តេចធិបតី ហ៊ុន ម៉ាណែត បានបញ្ជាក់ថា «កូនខ្មែរ ត្រូវចេះភាសាខ្មែរ និងគណិតឲ្យខ្លាំង ឲ្យរឹងមាំ ព្រោះបើមិនអីចឹងទេ យើងពិបាក។ អីចឹងបាននៅសាលាឯកជនបរទេសខ្លះ ថ្ងៃមុនខ្ញុំឲ្យក្រសួងអប់រំធ្វើម៉េច សាលាបរទេសក៏ដោយ ស្អីក៏ដោយ ត្រូវតែដាក់ភាសាខ្មែរឲ្យកូនខ្មែររៀន អាហ្នឹងខ្ញុំបញ្ជាឲ្យបាន។ សម្រាប់យើង ខ្ញុំគិតថា បឋមសិក្សានេះគឺដូចគ្នា ព្រោះក្មេងជាក្រដាស «ស» អីចឹងលោកគ្រូអ្នកគ្រូ ឪពុកម្តាយគិតមើល ម្ង៉ៃយើងមានតែ ២ម៉ោង បើយើងយកតែពាក់កណ្តាលនេះទៅរៀនភាសាអង់គ្លេសហើយ យើងនៅសល់តែ ១ម៉ោងទៀតសម្រាប់បំប៉នគណិត បំប៉នជំនាញផ្សេងៗ បំប៉នភាសាខ្មែរ។ អានេះ គឺយើងថ្នាក់តូច ដល់ថ្នាក់ទី៤ ដូចយើងបន្ថែមទៀត»។

សម្តេចបន្តថា «ប៉ុន្តែទោះជាយ៉ាងណា ខ្ញុំគិតថា ចំណេះដឹងទូទៅរបស់គាត់សំខាន់ បានន័យថា គាត់រៀនចំណេះដឹងទូទៅ ភាសាអង់គ្លេសល្អហើយ ប៉ុន្តែដំណាក់កាលនេះ សម្រាប់យើងមិនទាន់ទៅដូច ប៊ែលធី អីគេរៀនជាភាសាអង់គ្លេស។ ខ្ញុំថា ត្រូវតែពង្រឹងភាសាខ្មែរ និងគណិត។ អីចឹង ម៉ោងយើងដាក់ឲ្យគាត់ស្គាល់ A B C អីទេ សម្រាប់ពីថ្នាក់ទី១ ដល់ទី៣។ តើមានឪពុកម្តាយណាខ្លះ ដែលចង់ពង្រឹងភាសាខ្មែរ និងគណិត ដើម្បីឲ្យកូនមានមូលដ្ឋាន ទៅកម្រិតវិទ្យាល័យ?» ។

សូមជម្រាបថា កន្លងទៅរាជរដ្ឋាភិបាលបានបង្កើត គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំរបស់រាជរដ្ឋាភិបាល (គ.វ.អ.) ដែលដឹកផ្ទាល់ដោយសម្តេចធិបតី ហ៊ុន ម៉ាណែត ៕