នគរបាលខេត្តបន្ទាយមានជ័យ ចុះត្រួតពិនិត្យអាវុធជាតិផ្ទុះ និងទប់ស្កាត់អ្នកបើកបរមានជាតិអាល់កុលពេលរាត្រី
ភ្នំពេញ៖ អនុវត្តន៍តាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ នៅរាត្រីថ្ងៃទី២៤ ខែកក្កដា ឆ្នាំ២០២៤ កម្លាំងនគរបាលគ្រប់អធិការនៃអធិការដ្ឋាននគរបាលក្រុង ស្រុក បើកប្រតិបត្តិការចុះត្រួតពិនិត្យអាវុធជាតិផ្ទុះ និងទប់ស្កាត់អ្នកបើកបរមានជាតិស្រវឹងពេលរាត្រី ក្រុមក្មេងទំនើង នៅលើផ្លូវសំខាន់ៗក្នុងភូមិសាស្ត្រ។
ការចុះត្រួតពិនិត្យនេះធ្វើឡើងក្នុងគោលបំណង ពង្រឹងការងារសន្តិសុខ សណ្តាប់ធ្នាប់ ភូមិ ឃុំ សង្កាត់ មានសុវត្ថិភាព ដោយធានាឲ្យបាននូវសន្តិសុខសណ្តាប់ធ្នាប់សង្គម ជូនប្រជាពលរដ្ឋនៅក្នុងភូមិសាស្ត្រក្រុងទាំងមូលនិងសុវត្ថិភាពអ្នកដំណើរតាមដងផ្លូវសាធារណៈ។
ប្រតិបត្តិការនេះនគរបាលយើងបាន ធ្វើការត្រួតពិនិត្យលើអ្នកដំណើរតាមម៉ូតូ រថយន្ត ទប់ស្កាត់ការប្រើប្រាស់ អាវុធខុសច្បាប់គ្រប់ប្រភេទ ធ្វើការផ្សព្វផ្សាយច្បាប់ចរាចរណ៍ វាស់ជាតិអាល់កុលលើអ្នកដំណើរ ដើម្បីទប់ស្កាត់អ្នកបើកបរដែលមានជាតិស្រវឹង ក្នុងន័យរួមចំណែកកាត់បន្ថយអត្រាអ្នកស្លាប់ឬរបួសដោយគ្រោះថ្នាក់ចរាចរណ៍ឲ្យនៅកម្រិតទាបបំផុត។ មួយវិញទៀតការត្រួតពិនិត្យលើក្រុមក្មេងទំនើង ត្រួតពិនិត្យរកបទល្មើសគ្រឿងញៀនជាដើម ៕
