សាលាភូមិន្ទរដ្ឋបាល រៀបចំកម្មវិធី «ផ្សព្វផ្សាយព្រឹត្តិបត្រគោលនយោបាយនិងរដ្ឋបាលសាធារណៈ ឆ្នាំទី១ លេខ១»
ភ្នំពេញ៖ ព្រឹត្តិបត្រគោលនយោបាយ និងរដ្ឋបាលសាធារណៈ ឆ្នាំទី១ លេខ១ ត្រូវបានដាក់ចេញផ្សព្វផ្សាយ កាលពីថ្ងៃទី២៦ ខែកក្កដា ឆ្នាំ២០២៤ នៅសាលាភូមិន្ទរដ្ឋបាល ក្រោមអធិបតីភាពរបស់ ឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ និងជានាយកសាលាភូមិន្ទរដ្ឋបាលព្រមទាំងជាប្រធានក្រុមប្រឹក្សាផ្តល់យោបល់លើការបង្កើតព្រឹត្តិបត្រ នៃសាលាភូមិន្ទរដ្ឋបាល តំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល។
ព្រឹត្តិបត្រគោលនយោបាយ និងរដ្ឋបាលសាធារណៈ ឆ្នាំទី១ លេខ១ ត្រូវបានបង្កើតឡើង ក្នុងគោលបំណងលើកកម្ពស់ការអាន និងស្រាវជ្រាវ ដើម្បីបង្កើនពុទ្ធិជូនដល់សិស្សមន្ត្រី កម្មសិក្សាការី និងសាធារណជន តាមរយៈការសិក្សាស្រាវជ្រាវ និងនិពន្ធ ដោយអ្នកនិពន្ធប្រកបដោយគុណវុឌ្ឍិ។ ពិធីនេះបានផ្តោតសំខាន់ទៅលើប្រធានចំនួន៥ រួមមាន៖ (១).គោលនយោបាយសាធារណៈ និងបញ្ហាប្រឈមក្នុងសតវត្សទី២១, (២).ការអប់រំឧត្តមសិក្សានិងការស្រាវជ្រាវនៅកម្ពុជា៖ ដើម្បីអ្វី និងដើម្បីអ្នកណា?, (៣).ប្រភេទនៃរបបនយោបាយ និងការអភិវឌ្ឍសេដ្ឋកិច្ច, (៤).ប្រព័ន្ធគ្រប់គ្រងគុណផលនៅក្នុងបណ្ដាប្រទេសកំពុងអភិវឌ្ឍ៖ ទស្សនាទាន និងការអនុវត្ត «ករណីសិក្សាមុខងារសាធារណៈកម្ពុជា» និង(៥).ទំនុកចិត្តសង្គម និងការអភិវឌ្ឍប្រកបដោយបរិយាបន្ន។
នាឱកាសនោះផងដែរ ឯកឧត្តម យក់ ប៊ុនណា ក៏បានលើកឡើងពីសារៈសំខាន់នៃការសិក្សាស្រាវជ្រាវ ព្រមទាំងបានលើកទឹកចិត្តឱ្យមានការសិក្សាស្រាវជ្រាវឱ្យបានច្រើន ដើម្បីទុកជាឯកសារ ក្នុងការរៀនសូត្រ ការស្រាវជ្រាវ និងជាភាពសម្បូរបែបនៃឯកសារសម្រាប់សិស្សមន្ត្រី កម្មសិក្សាការី សិក្ខាកាម សិស្ស និស្សិត និងសាធារណជន។
ក្នុងពិធីនេះមានការអញ្ញើញចូលរួមពីសំណាក់ឯកឧត្តមបណ្ឌិត ឯកឧត្តម លោកជំទាវ លោក លោកស្រី ជាវាគ្មិនទាំង៥ និងជាសមាសភាពក្រុមប្រឹក្សាផ្តល់យោបល់ គណៈកម្មការនិពន្ធនាយក ក្រុមប្រឹក្សានិពន្ធ ក្រុមការងារបច្ចេកទេស គណៈគ្រប់គ្រងសាលាភូមិន្ទរដ្ឋបាល ភ្ញៀវកិត្តិយស មន្ត្រីរាជការ និងកម្មសិក្សាការីមន្ត្រីជាន់ខ្ពស់ឆ្នាំ២០២៤ សរុបប្រមាណ ១៥០អង្គ/នាក់ ៕
