ឯកឧត្តម សរ សុពុត្រា ជំនួសមុខឲ្យគណៈកម្មាធិការកាកបាទក្រហមកម្ពុជា សាខាខេត្តស្ទឹងត្រែង ទទួលថវិកាពីសប្បុរសជនជាង ២០លានរៀល
ភ្នំពេញ៖ ឯកឧត្តម សរ សុពុត្រា អភិបាល នៃគណៈអភិបាលខេត្ត ជំនួសមុខឱ្យគណៈកម្មាធិការសាខាកាកបាទក្រហមកម្ពុជា សាខាខេត្តស្ទឹងត្រែង នាថ្ងៃទី២៩ កក្កដា បានទទួលជួប និងទទួលថវិកា ពីសប្បុរសជនចំនួន២៧,០០០,០០០រៀល និង១០០ដុល្លា នៅសាលាខេត្តស្ទឹងត្រែង។
ក្នុងនោះគឺទទួលថវិកាពី ក្រុមប្រឹក្សាខេត្ត បានឧបត្ថម្ភថវិកាចំនួន ១៣,១៥០,០០០ រៀល និង ១០០ដុល្លារ ធនាគារកាណាឌីយ៉ា ខេត្តស្ទឹងត្រែង បានឧបត្ថម្ភថវិកាចំនួន ៤,០០០,០០០ រៀលមន្ទីរពេទ្យបង្អែកខេត្ត បានឧបត្ថម្ភថវិកាចំនួន ៣,១៥០,០០០ រៀល លោក សៀង ចន្ថា និងភរិយា ( ម្ចាស់ភោជនីយដ្ឋាន សុខ សម្បត្តិ) បានឧបត្ថម្ភថវិកាចំនួន ២,០០០,០០០ រៀល មណ្ទលសុខភាពទាំង២០មណ្ឌល បានឧបត្ថម្ភថវិកាចំនួន ១,៧៥០,០០០រៀល លោកស្រី ជា ឥណ្ឌា និងស្វាមី នាយកក្រុមហ៊ុន គូបូតា (KUBOTA)សាខាខេត្តស្ទឹងត្រែង បានឧបត្ថម្ភថវិកាចំនួន ១,០០០,០០០ រៀល មន្ទីរសម្រាកព្យាបាល សុភាព បានឧបត្ថម្ភថវិកាចំនួន១,០០០,០០០ រៀល ការិយាល័យសុខាភិបាលស្រុកប្រតិបត្តិ បានឧបត្ថម្ភថវិកាចំនួន ៩៥០,០០០រៀល។
ឯកឧត្តមអភិបាលខេត្ត និងក្នុងនាមជំនួនឱ្យគណៈកម្មាធិការ កាកបាទក្រហម កម្ពុជា សាខាខេត្តស្ទឹងត្រែងបានថ្លែងថា ទោះបីជាខួបទី១៦១ ដើម្បីអបអរទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៤ បានកន្លងហួស តែការកៀរគរមូលនិធិនៅតែបន្ត ដើម្បីជួយទ្រទ្រង់ដល់សកម្មភាពមនុស្សធម៌ របស់កាកបាទក្រហមកម្ពុជា ក្នុងការចូលរួមដោះស្រាយនូវបញ្ហាប្រឈមនានា ជូនដល់ប្រជាពលរដ្ឋរងគ្រោះដោយគ្រោះមហន្តរាយផ្សេងៗ និងប្រជាពលរដ្ឋងាយរងគ្រោះបំផុតនៅក្នុងភូមិសាស្ត្ររបស់ខេត្ត ហើយចូលរួម អនុវត្តតាមអនុសាសន៍ណែនាំដ៏ខ្ពង់ខ្ពស់របស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដោយមិនគិតពីពូជសាសន៍ សាសនា ឬនិន្នាការនយោបាយឡើយ។
ឯកឧត្តម សរ សុពុត្រា បន្តថ្លែងថា
មូលនិធិដែលទទួលបានពីសប្បុរសជននានា គឺធានាយកទៅជួយជនរងគ្រោះ និងពលរដ្ឋងាយរងគ្រោះ ពិតប្រាកដ ហើយសង្ឃឹមជឿជាក់ថា៖
សប្បុរសជននឹងចូលរួមឧបត្ថម្ភគាំទ្រជាថវិកា សម្ភារៈ ដើម្បីសាខាសម្រេចបានចក្ខុវិស័យ និងបេសកកម្មរបស់កាកបាទក្រហមកម្ពុជា ក្នុងការកៀរគរកម្លាំងមនុស្សធម៌ ដើម្បីជួយសង្គ្រោះប្រជាពលរដ្ឋរងគ្រោះ និងងាយរងគ្រោះបំផុត តាមរយៈវិស័យស្នូលទាំង៤ ហើយប្រកាន់ខ្ជាប់នូវគោលការណ៍គ្រឹះទាំង៧ របស់ចលនាកាកបាទក្រហម និងអឌ្ឍចន្ទក្រហម៕
