គម្រោងទិវាស៊ីក្លូនិងRCF គ្រោងនឹងរៀបចំកម្មវិធីសប្បុរសធម៍«រត់ដើម្បីស៊ីក្លូ»ដែលនឹងទទួលអ្នកចូលរួមប្រហែល៥០០នាក់

ភ្នំពេញ៖ គម្រោងទិវាស៊ីក្លូ-Cyclo Day និង Romdoul Charity Foundation (RCF) នឹងរៀបចំកម្មវិធីរត់សប្បុរសធម៍មួយដែលមានឈ្មោះថា Sprint for Spin Fun Run ក្នុងគោលបំណងរៃអង្គាសថវិការដើម្បីជួយដល់កម្មវិធីលើកកម្ពស់ការរស់នៅរបស់អ្នកធាក់ស៊ីក្លូ នៅថ្ងៃអាទិត្យ ទី២៥ ខែសីហា ឆ្នាំ២០២៤។

កម្មវិធីរត់សប្បុរសធម៍នៅថ្ងៃទី២៥ ខែសីហា ឆ្នាំ២០២៤ នេះនឹងធ្វើឡើងនៅទីធ្លា The Elysee កោះពេជ្រ ពីម៉ោង៥:៤៥ព្រឹក ដល់ម៉ោង៨:៤៥ព្រឹកដោយរំពឹងថានឹងមានអ្នកចូលរួមរត់ប្រហែល៥០០នាក់។

បើតាមយុវជន មាស សុបញ្ញា ដែលជាអ្នកតំណាងគណៈកម្មការរៀបចំកម្មវិធីរត់សប្បុរសធម៍ Sprint for Spin Fun Run បានបញ្ជាក់ថា កម្មវិធីនេះបានផ្តួចផ្តើមរៀបចំឡើងដោយគម្រោងទិវាស៊ីក្លូនិង Romdoul Charity Foundation ដើម្បីរៃអង្គាសថវិការសម្រាប់ផ្តល់ជូនអ្នកធាក់ស៊ីក្លូតាមរយៈកិច្ចសហការជាមួយសមាគមអភិរក្សស៊ីក្លូ និងមុខរបរក្រៅប្រព័ន្ធដោយសមាគមនឹងបង្កើតជាកម្មវិធីផ្តល់សាច់ប្រាក់និងបញ្រ្ជាបការយល់ដឹងពីការរស់នៅស្អាតនិងបរិស្ថានស្អាតដល់អ្នកប្រកបមុខរបរធាក់ស៊ីក្លូ។ មិនតែប៉ុណ្ណោះយុវជនសុបញ្ញាក៏បានអំពាវនាវផងដែរដល់សាធារណៈជនគ្រប់រូប ពិសេសយុវជនឲ្យចុះឈ្មោះចូលរួមឲ្យបានច្រើនកុះករដើម្បីចូលរួមយ៉ាងសកម្មក្នុងកិច្ចការជួយសហគមន៍។

គួរបញ្ជាក់ផងដែរថាសប្បុរសជនដែលចូលរួមមិនត្រឹមតែអាចជួយដល់សហគមន៍អ្នកធាក់ស៊ីក្លូនិងទទួលបានសុខភាពល្អប៉ុណ្ណោះទេ ថែមទាំងទទួលបានលិខិតថ្លែងអំណរគុណនិងមេដាយអនុស្សាវរីយ៍រួមទាំងមានឱកាសឈ្នះនូវរង្វាន់ផ្សេងៗទៀតផងពីដៃគូឧបត្ថម្ភ។

សាធារណៈជនអាចចុះឈ្មោះមកទស្សនាវគ្គផ្តាច់ព្រ័ត្រនេះ តាមរយៈលីងនេះ https://forms.gle/M5mhDZe9XL223AA96 ឬក៏តាមរយៈការស្កេន QR code ក្នុងខិត្តប័ណ្ណដែលភ្ជាប់ជាមួយអត្ថបទនេះ៕