នាយឧត្តមសេនីយ៍ ខេង សុមេធ នាំយកថវិការបស់សម្តេចធិបតី ប្រគល់ជូនកងកម្លាំងវរសេនាតូចនគរបាលការពារព្រំដែនគោកលេខ៦០៣-៦០៥ នៅខេត្តតាកែវ និងខេត្តកណ្ដាល

ភ្នំពេញ៖ នៅថ្ងៃទី៣០ ខែកក្កដា ឆ្នាំ២០២៤នេះ ឯកឧត្តម នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការ គណៈបញ្ជាការនគរបាលជាតិប្រចាំទិសភូមិភាគទី៣-៤-៥ បានអញ្ជើញចុះសួរសុខទុក្ខ និងផ្ដាំផ្ញើសួរសុខទុក្ខពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជូនដល់កងកម្លាំងវរសេនាតូចនគរបាលការពារព្រំដែនគោកលេខ៦០៣-៦០៥ នៅខេត្តតាកែវ និងខេត្តកណ្ដាល។

ក្នុងឱកាសនោះ ឯកឧត្តម នាយឧត្តមសេនីយ៍ អគ្គស្នងការរង ក៏បាននាំយកថវិកាចំនួន ៦០,៨០០,០០០រៀល ដែលជាអំណោយដ៏ថ្លៃថ្លារបស់សម្ដេចធិបតី ហ៊ុន ម៉ាណែត ប្រគល់ជូនវរទាំងពីរផងដែរ។ អមដំណើរជាមួយឯកឧត្តម នាយឧត្តមសេនីយ៍ ខេង សុមេធ ក៏មានការចូលរួមពីឯកឧត្តម ឧត្តមសេនីយ៍ឯក ទូច ពលៈ ប្រធាននាយករដ្ឋានព្រំដែនទឹក និងលោកឧត្តមសេនីយ៍ទោ ស៊ឹម សំអាត ប្រធាននាយកដ្ឋាន នគរបាលការពារព្រំដែនគោក ព្រមទាំងថ្នាក់ដឹកនាំមួយចំនួនទៀត។

ថវិកាចំនួន ៦០,៨០០,០០០រៀល ដែលជាអំណោយដ៏ថ្លៃថ្លារបស់សម្ដេចធិបតី ហ៊ុន ម៉ាណែត ប្រគល់ជូនវរទាំងពីរ រួមមាន៖
ទី១៖ វរសេនាតូចនីមួយៗទទួលបានថវិកាចំនួន ១៥លានរៀល សម្រាប់ជួសជុលកែលម្អទីបញ្ជាការវរៈ។
ទី២៖ ថវិកាចំនួន ០៤លានរៀល សម្រាប់កសាងរបងប៉ុស្តិ៍ ចំណុះវរៈលេខ៦០៥។
ទី៣៖ កងកម្លាំងម្នាក់ៗទទួលបានថវិកាចំនួន ១០ម៉ឺនរៀល។
ទី៤៖ ថវិកាចំនួន ២,៨០០,០០០រៀល បន្ថែមសម្រាប់កងកម្លាំងចំនួន០៧នាក់ (ដែលមានវ័យចាស់ជរា)។

ឯកឧត្តម នាយឧត្តមសេនីយ៍ ខេង សុមេធ ក៏បានពាំនាំការផ្តាំផ្ញើសួរសុខទុក្ខពីសំណាក់សម្តេចធិបតី ហ៊ុន ម៉ាណែត នាយករដ្ឋមន្រ្តី, ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រី​ក្រសួង​មហាផ្ទៃ​ និងឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ដល់កងកម្លាំងទាំងអស់ ដែលកំពុងឈរជើងប្រចាំការនៅតាមខ្សែបន្ទាត់ព្រំដែននៅក្នុងខេត្តកណ្តាល និងខេត្តតាកែវ ផងដែរ។

ឯកឧត្តម នាយឧត្តមសេនីយ៍ ខេង សុមេធ បានថ្លែងទៅកាន់កម្លាំងនគបាលទាំងអស់ឲ្យចូលរួមគ្នាអនុវត្តឲ្យបានដាច់ខាតនូវអនុសាសន៍របស់សម្ដេចធិបតី នាយករដ្ឋមន្រី្ត ក្នុងការថែរក្សាសុខសុវត្ថិភាពសង្គមជូនប្រជាពលរដ្ឋ។ ដូច្នេះសូមកម្លាំងនគរបាលរបស់យើង បន្តបង្កើនការអង្កេតស្រាវជ្រាវ និងចូលរួមទប់ស្កាត់បង្ក្រាបបទល្មើសនានានៅតាមព្រំដែន និងសហការល្អជាមួយអាជ្ញាធរមូលដ្ឋានឲ្យបានល្អ ដើម្បីជំរុញការងារការពារសន្តិសុខ និងសណ្តាប់ធ្នាប់កាន់តែល្អប្រសើរ ៕