គ្រួសារប្រជាពលរដ្ឋរងគ្រោះដោយខ្យល់កន្ត្រាក់ចំនួន១២គ្រួសារ នៅស្វាយលើ ទទួលអំណោយមនុស្សធម៌ពីសាខាកាកបាទក្រហមកម្ពុជាខេត្តសៀមរាប

ភ្នំពេញ៖ នាព្រឹកថ្ងៃទី៣១ ខែកក្កដា ឆ្នាំ២០២៤ នៅទីស្នាក់ការអនុសាខាកាកបាទក្រហមកម្ពុជា ស្រុកស្វាយលើ ឯកឧត្ដម គុជ លីណា អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជា ខេត្តសៀមរាប និងសហការី បានអញ្ជើញជួបសំណេះសំណាលសួរសុខទុក្ខ និងនាំយកអំណោយមនុស្សធម៌ជូន បង ប្អូនប្រជាពលរដ្ឋរងគ្រោះដោយខ្យល់កន្ត្រាក់កាលពីល្ងាចថ្ងៃទី ២៥ ខែកក្កដា ឆ្នាំ២០២៤ សរុបចំនួន១២គ្រួសារ (របើក៨ខ្នង រលំ៤ខ្នង) នៃភូមិសាស្ត្រស្រុកស្វាយ។

គ្រួសារទាំង១២នោះរួមមាន៖
១- ឃុំស្វាយលើ៩គ្រួសារ (របើក៦ខ្នង រលំ៣ខ្នង)
២- ឃុំខ្នងភ្នំ ១គ្រួសារ (រលំ)
៣- ឃុំបឹងមាលា ១គ្រួសារ (របើក)
៤- ឃុំតាសៀម ១គ្រួសារ (របើក)

មានប្រសាសន៍នាឱកាសនោះ ឯកឧត្តមអនុប្រធានអចិន្ត្រៃយ៍គណៈកម្មាធិការសាខា បានពាំនាំនូវការផ្ដាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ប្រាក់ សោភ័ណ ប្រធានគណកម្មាធិការសាខា ដែលជានិច្ចកាលតែងយកចិត្តទុកដាក់ខ្ពស់ចំពោះសុខទុក្ខ បងប្អូនប្រជាពលរដ្ឋរងគ្រោះ និងងាយរងគ្រោះគ្រប់រូប ដោយមិនប្រកាន់ វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។

ឯកឧត្តមក៏បានចូលរួមសោកស្ដាយ ចំពោះការខាតបង់ទ្រព្យសម្បត្តិដោយសារគ្រោះធម្មជាតិដែលបង្កឡើងដោយខ្យល់កន្ត្រាក់នេះ ហើយគ្មានអ្នកណាចង់ជួបប្រទះឡើយ។ ឯកឧត្តមបន្តថា អំណោយមនុស្សធម៌ដែលបាននាំយកមកចែកជូនបងប្អូននាពេលនេះ ទោះបីមិនសមល្មមនឹងការខូចខាតរបស់បងប្អូន តែពិតជាអាចជួយសម្រាលទុក្ខលំបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា”។

ឯកឧត្តមបន្ថែមថា កាកបាទក្រហមកម្ពុជា ក្នុងនាមជាជំនួយការឱ្យអាជ្ញាធរសាធារណៈ បានបំពេញការងារជាច្រើន មិនមែនត្រឹមតែចែកអំណោយជូនជនរងគ្រោះប៉ុណ្ណោះទេ តែយើងមានសកម្មភាពច្រើនទៀត ដែលបានផ្ដល់ជូនសហគមន៍ ដូចជា៖ ផ្ដល់នូវជម្រកសមរម្យ (ផ្ទះមនុស្សធម៌) អណ្ដូងទឹក បង្គន់អនាម័យ ការអប់រំអំពីសុខភាព ការអប់អំពីសុវត្ថិភាពចរាចរណ៍ ការជួយសម្រាលទុក្ខលំបាកតាមរយៈការសួរសុខទុក្ខ គ្រួសារចាស់ជរាគ្មានទីពឹង ស្ត្រីមេម៉ាយក្រីក្រកូនច្រើន អ្នកផ្ទុកមេរោគអេដស៍ មាតាទារកក្រីក្រងាយរងគ្រោះ។ល។

ក្នុងឱកាសនោះដែរ ឯកឧត្តមក៏បានផ្ដាំផ្ញើ និងសំណូមពរដល់ បង ប្អូនប្រជាពលរដ្ឋទាំងអស់ ការសាងសង់លំនៅដ្ឋាន សូមគិតដល់គ្រឹះផ្ទះ ធើ្វយ៉ាងនាឱ្យរឹងមាំ សូមកុំគិតតែពីទំហំ ហើយភ្លេចពីគ្រឹះឱ្យសោះ ដើម្បីចៀសវាងការបាក់រលំ ឬស្រុតដោយប្រការណាមួយទៅថ្ងៃក្រោយ។

ឯកឧត្តមក៏បានផ្ដាំផ្ញើបន្ថែ សូមថែទាំសុខភាពឱ្យបានល្អ ពិសេសកូនចៅតូចៗត្រូវប្រុងប្រយ័ត្ន ខ្លាចក្រែងជួបវិបត្តិផ្សេងៗ ព្រោះរដូវនេះ ជារដូវវស្សា ងាយនឹងកើតមានបញ្ហាផ្សេងៗណាស់។ ម្យ៉ាងវិញទៀត បើសុខភាពមិនស្រួលត្រូវប្រញាប់ទៅមណ្ឌលសុខភាព ឬមន្ទីរពេលដែលនៅជិតបំផុត ដើម្បីអាចពិគ្រោះ ឬព្យាបាលបានទាន់ពេលវេលា។ នៅពេលមានភ្លៀងធ្លាក់សូមបងប្អូនរកនូវកន្លែងសុវត្ថិភាព ដើម្បីការពាររន្ទះ ដោយចៀសវាងជ្រកក្រោមដើមឈើ ឬវត្ថុដែលខ្ពស់ជាងគេស្ថិតនៅដាច់កែឯង ហើយសូមបងប្អូនមេត្តាបិទទូរស័ព្ទ រឺទូរទស្សន៍សិនជាចាំបាច់។

អំណោយមនុស្សធម៌បានផ្ដល់ជូនក្នុង១គ្រួសារមាន៖
– គ្រួសាររលំផ្ទះ៖ មុង១ ភួយ១ សារុង១ ក្រមា១ កន្ទេល១ អង្ករ៣០គីឡូក្រាម មី១កេស ត្រីខ១យួរ ទឹកស៊ីអ៊ីវ១យួរ អំបិល១គីឡូក្រាម ស័ង្កសី១៦សន្លឹក សម្ភារផ្ទះបាយមួយចំនួន និងថវិកា១សែនប្រាំម៉ឺនរៀល។
– គ្រួសាររបើកដំបូល៖ មុង១ ភួយ១ សារុង១ ក្រមា១ កន្ទេល១ អង្ករ៣០គីឡូក្រាម មី១កេស ត្រីខ១យួរ ទឹកស៊ីអ៊ីវ១យួរ អំបិល១គីឡូក្រាម ស័ង្កសី១០សន្លឹក សម្ភារផ្ទះបាយមួយចំនួន និងថវិកា៨ម៉ឺនរៀល៕