គណៈប្រតិភូគណៈកម្មការទី៣ នៃរដ្ឋសភា ជួបសំណេះសំណាលជាមួយលោកតាលោកយាយ និងនាំយកទៀនព្រះវស្សាប្រគេនព្រះសង្ឃ វត្តបុសមាលី

ភ្នំពេញ៖ នៅថ្ងៃទី១ ខែសីហា ឆ្នាំ២០២៤ គណៈប្រតិភូគណៈកម្មការទី៣នៃរដ្ឋសភា ដឹកនាំដោយ​ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃរដ្ឋសភា និងលោកជំទាវ អមដំណើរដោយ​ ឯកឧត្តម គង់ គឹមនី អភិបាលខេត្តស្តីទី នៃគណ:អភិបាលខេត្តក្រចេះ បានអញ្ជើញជួបសំណេះសំណាលជាមួយលោកតាលោកយាយ និងនាំយកទៀនព្រះវស្សាប្រគេនដល់ព្រះសង្ឃគង់នៅវត្តបុសមាលី ស្ថិតក្នុងភូមិបុសលាវ ឃុំបុសលាវ ស្រុកចិត្តបុរី ខេត្តក្រចេះ។

ឯកឧត្តមសន្តិបណ្ឌិត ឡូយ សុផាត បានមានប្រសាសន៍លើកឡើងថា ទៀនវស្សាត្រូវបានចាត់ទុកថាជាពន្លឺសម្រាប់ជីវិតដែលផ្នែកងងឹតនៃជីវិតនឹងត្រូវបានបំភ្លឺ ដឹកនាំផ្លូវឆ្ពោះទៅរកព្រះនិព្វាន។ ទន្ទឹមនឹនោះផងដែរ ឯកឧត្តមសន្តិបណ្ឌិត ក៏បានអំពាវនាវដល់ព្រះសង្ឃនៅគ្រប់វត្ត និងប្រជាពលរដ្ននៅគ្រប់ទីកន្លែង គ្រប់ស្ថាប័នថ្នាក់ជាតិ ថ្នាក់ក្រោមជាតិ ត្រូវចូលរួមគ្រប់រូបភាព ក្នុងការគោះជួង ទូងស្គរ ព្រមៗគ្នា នៅថ្ងៃទី៥ ខែសីហា ឆ្នាំ២០២៤ សម្រាប់ថ្ងៃបើកការដ្ឋានគម្រោងព្រែកជីកហ្វូណនតេជោ ខាងមុខនេះ តបតាមការអំពាវនាវរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា​ ក្រោមគំនិតផ្តួចផ្តើមប្រកបដោយចក្ខុវិស័យវែងឆ្ងាយរបស់​ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ។

គួររំលឹកផងដែរថា ពិធីបុណ្យ “ចូលព្រះវស្សា” នឹងត្រូវប្រារព្ធធ្វើចាប់ពីថ្ងៃអាទិត្យ ១រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២១ ខែកក្កដា ឆ្នាំ២០២៤។ ក្នុងអំឡុងពិធីបុណ្យដែលមានរយៈពេល ៣ខែនេះ​ ព្រះសង្ឃមិនចាកចេញពីវត្តអារាមដើម្បីនិមន្ត បិណ្ឌបាត្រដូចពេលធម្មតាទេ។ ព្រះសង្ឃត្រូវគង់នៅក្នុងបរិវេណវត្តអារាម។ ទោះយ៉ាងណាក៏ដោយ​ ព្រះសង្ឃអាចទទួលយកការអញ្ជើញនិមន្តរបស់អ្នកកាន់សាសនា និងធ្វើដំណើរចេញនៅពេលថ្ងៃ ប៉ុន្តែមិនអាចនិមន្តទៅទីឆ្ងាយដោយដាច់រាត្រីឆ្លងថ្ងៃនោះឡើយ។ ជាទូទៅ អ្នកកាន់ព្រះពុទ្ធសាសនាថ្វាយទៀនវស្សាជាទៀនធំ ដែលត្រូវបំភ្លឺពេញមួយថ្ងៃ និងយប់ ក្នុងឱកាសពិធីបុណ្យព្រមទាំង ប្រេង ស្បង់ចីពរ និងគ្រឿងឧបភោគបរិភោគផ្សេងៗដល់ព្រះសង្ឃ។

សូមបញ្ជាក់ថា ទេយ្យទានដែលបានប្រគេនដល់វត្តបុសមាលី រួមមាន ទៀនវស្សា១គូ សាដក អង្ករ ត្រីខ ទឹកស៊ីអុីវទឹកត្រី មី ទឹកបរិសុទ្ធ ទឹកផ្លែឈើ តែ ស្ករ ប្រេងឆា ទឹកដោះគោ ប្រគេនបច្ច័យដល់ព្រះចៅអធិការវត្តបច្ច័យ៥ម៉ុនរៀល ព្រះសង្ឃ៩អង្គ ក្នុង១អង្គៗ បច្ច័យ២ម៉ឺនរៀល និងបច្ច័យកសាង១លានរៀល ព្រមទាំងចែកជូនលោកតា លោកយាយ៣៥នាក់ ក្នុងម្នាក់ថវិកា២ម៉ឺនរៀល​ ៕