ឯកឧត្តម ឈាង រ៉ា ណែនាំដល់មន្រ្តីសុខាភិបាលកំពង់កណ្តាល ខេត្តកំពត បន្តពង្រឹងគុណភាព នៃសេវាបម្រើជូនប្រជាពលរដ្ឋ ២៤ម៉ោង លើ ២៤ម៉ោង រៀងរាល់ថ្ងៃ

ភ្នំពេញ៖ នារសៀលថ្ងៃទី១ ខែសីហា ឆ្នាំ២០២៤ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងប្រតិភូ បានបន្តដំណើរចុះពិនិត្យសេវាសុខាភិបាលសាធារណៈ សួរសុខទុក្ខបុគ្គលិកសុខាភិបាល អ្នកជំងឺ និងក្រុមគ្រួសារ នៅមណ្ឌលសុខភាពកំពង់កណ្តាល ក្នុងខេត្តកំពត។

ក្នុងដំណើរបេសកកម្មជាបន្តបន្ទាប់ចុះពិនិត្យមណ្ឌលសុខភាព និងសួរសុខទុក្ខបុគ្គលិកសុខាភិបាល ក៍ថែមទាំងសួរសុខទក្ខបងប្អូនអ្នកជំងឺ-ក្រុមគ្រួសារ ដើម្បីទទួលបានពត៌មានត្រលប់ទូលំទូលាយ អំពីការបម្រើផ្តល់ជូូនសេវាសុខភាពជូនប្រជាពលរដ្ឋ ឯកឧត្តមសាស្ត្រាចារ្យ បានផ្តល់អនុសាសន៍ណែនាំសំខាន់ៗ ជូនដល់មន្រ្តីសុខាភិបាល សំដៅបន្តពង្រឹងសុវត្ថិភាព-គុណភាព នៃសេវាដែលបម្រើជូនប្រជាពលរដ្ឋ ២៤ម៉ោង លើ ២៤ម៉ោង រៀងរាល់ថ្ងៃ។

ឯកឧត្តមសាស្រ្តាចារ្យរដ្ឋមន្រ្តី បានបញ្ជាក់ពីទឹកចិត្តដឹងគុណ ចំពោះមន្រ្តីសុខាភិបាលទាំងអស់ និងអាជ្ញាធរមូលដ្ឋាន ដែលខិតខំប្រើគ្រប់មធ្យោបាយ សំដៅបម្រើប្រជាពលរដ្ឋលើតម្រូវការសុខាភិបាល ដោយឈរលើស្មារតីទទួលខុសត្រូវ និងក្រមសីលធម៌វិជ្ជាជីវៈខ្ពស់ជាបន្តបន្ទាប់៕