រដ្ឋមន្ត្រីក្រសួងផែនការ អំពាវនាវដល់មន្ទីរផែនការរាជធានីខេត្តទាំងអស់ ចូលរួមទូងស្គរអបអរសាទរ ពិធីបើកការដ្ឋានសាងសង់ព្រែកជីកហ្វូណនតេជោ នៅថ្ងៃទី៥ ខែសីហា ឲ្យបានច្រើនកុះករ
ភ្នំពេញ៖ នារសៀលថ្ងៃទី១ ខែសីហា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ អមដំណើរដោយឯកឧត្តមរដ្ឋលេខាធិការ លោក លោកស្រី និងសហការីក្រសួងផែនការ និងមានការអញ្ជើញចូលរួមពី លោក ហាន កុសល អភិបាលរងខេត្តកំពង់ចាម តំណាងឯកឧត្តមអភិបាលនៃគណៈអភិបាលខេត្តកំពង់ចាម អញ្ជើញក្នុងពិធីជួបសំណេះសំណាល និងសួរសុខទុក្ខថ្នាក់ដឹកនាំនិងមន្ត្រីរាជការនៃមន្ទីរផែនការខេត្តកំពង់ចាម។
ជាកិច្ចចាប់ផ្ដើម លោក ប៊ិ ប៊ុន្ថា ប្រធានមន្ទីរផែនការខេត្តកំពង់ចាម បានគោរពជូនគណៈអធិបតីនិងអង្គពិធីទាំងមូលនូវវីដេអូទស្សនីយភាពសង្ខេប ស្ដីពីសកម្មភាពមន្ត្រីរាជការ និងសមិទ្ធផលការងារ ដែលមន្ទីរផែនការខេត្តកំពង់ចាមសម្រេចបាននាពេលកន្លងមក។
លោកប្រធានមន្ទីរ បានធ្វើរបាយការណ៍សង្ខេប ស្តីពី (១) ស្ថានភាពទូទៅនៃខេត្តកំពង់ចាម (២) សកម្មភាព និងសមិទ្ធផលការងារដែលសម្រេចបានដោយមន្ទីរផែនការខេត្ត និង (៣) បញ្ហាប្រឈម និងសំណូមពរ។
បន្ទាប់ពីរបាយការណ៍របស់លោកប្រធានមន្ទីរ ឯកឧត្តមរដ្ឋមន្ត្រី បានកោតសរសើរនិងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់លោកប្រធានមន្ទីរ ព្រមទាំងមន្ត្រីរាជការទាំងអស់នៃមន្ទីរផែនការខេត្តកំពង់ចាម។
ក្នុងឱកាសនេះ ឯកឧត្តមរដ្ឋមន្ត្រី បានពាំនាំនូវការផ្ដាំផ្ញើសួរសុខទុក្ខពីសំណាក់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត មកដល់ថ្នាក់ដឹកនាំនិងមន្ត្រីរាជការ នៃមន្ទីរផែនការខេត្តកំពង់ចាម។
មានមតិសំណេះសំណាល ឯកឧត្តមរដ្ឋមន្ត្រី បានគូសរំលេចផងដែរអំពីកិច្ចខិតខំប្រឹងប្រែងរបស់រាជរដ្ឋាភិបាល នីតិកាលទី៧ ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់បំផុតរបស់ សម្ដេចមហាបវរធិបតីនាយករដ្ឋមន្ត្រី ដែលបាននិងកំពុងធ្វើដំណើរយ៉ាងស្វាហាប់ពេញដោយថាមពល ដឹកនាំនិងអភិវឌ្ឍកម្ពុជាឆ្ពោះទៅកាន់ភាពសម្បូរណ៍សប្បាយរុងរឿង ស្ថិតថេរចីរកាល ក្រោមដំបូលនៃសន្តិភាព។
មានប្រសាសន៍ក្នុងពិធី ឯកឧត្តមរដ្ឋមន្ត្រី បានលើកឡើងផងដែរអំពីគុណបំណាច់របស់រាជរដ្ឋាភិបាលជំនាន់មុន និងសមិទ្ធផលនានា ក្រោមការដឹកនាំប្រកបដោយចក្ខុវិស័យវែងឆ្ងាយរបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាអតីតនាយករដ្ឋមន្ត្រី ជាពិសេសគំនិតផ្ដួចផ្ដើមដ៏ឧត្តុង្គឧត្តមរបស់សម្ដេចតេជោ ក្នុងការស្ថាបនាផ្លូវនាវាចរណ៍ ព្រែកជីកហ្វូណនតេជោ ដែលទទួលបានការគាំទ្រយ៉ាងពេញទំហឹងពីប្រជាជនខ្មែរនៅគ្រប់មជ្ឈដ្ឋាន និងត្រូវបានរាជរដ្ឋាភិបាលជំនាន់ថ្មី គ្រោងនឹងបើកការដ្ឋានសាងសង់ នាថ្ងៃទី៥ ខែសីហា ឆ្នាំ២០២៤ ខាងមុខនេះ។
ជាមួយគ្នានេះ ឯកឧត្តមរដ្ឋមន្ត្រី បានលើកឡើងអំពីអត្ថប្រយោជន៍ នៃការកសាងព្រែកជីកហ្វូណនតេជោ ដែលក្នុងនោះរួមមានផលប្រយោជន៍ផ្នែកពាណិជ្ជកម្មនិងការអភិវឌ្ឍ ផ្នែកកសិកម្ម ផ្នែកទេសចរណ៍ជាដើម។
មានប្រសាសន៍ក្នុងពិធី ឯកឧត្តមរដ្ឋមន្ត្រី ព្រែកជីកនេះនឹងចូលរួមកាត់បន្ថយការដឹកជញ្ជូនទំនិញតាមផ្លូវគោកដែលមានតម្លៃថ្លៃជាង កាត់បន្ថយរយៈពេលនិងចម្ងាយនៃការដឹកជញ្ជូន និងបម្រើដល់ការដឹកជញ្ជូនទំនិញក្នុងប្រទេសនិងអន្តរជាតិ មកកាន់រាជធានីភ្នំពេញបានឆាប់រហ័សជាងមុន។ ព្រែកជីកហ្វូណនតេជោ នឹងក្លាយជាផ្លូវទឹកប្រវត្តិសាស្ត្រទីមួយរបស់កម្ពុជា ដែលឆ្លងកាត់ខេត្តចំនួន៤ នឹងផ្ដល់នូវប្រភពទឹកមួយផ្នែកដល់ការអភិវឌ្ឍកសិកម្ម ធារាសាស្ត្រ វារីវប្បកម្ម និងការចិញ្ចឹមសត្វ។ ជាមួយគ្នានេះ នៅតាមបណ្ដោយព្រែកជីកហ្វូណនតេជោ នឹងមានការលេចឡើងនូវហេដ្ឋារចនាសម្ព័ន្ធនានា រួមចំណែកដល់ការទាក់ទាញភ្ញៀវទេសចរណ៍ និងវិនិយោគមកកាន់កម្ពុជា ព្រមទាំងជំរុញដល់ការអភិវឌ្ឍទីក្រុង នគរូបនីយកម្ម និងការតភ្ជាប់ផ្លូវគមនាគមន៍ ដែលជាសរសៃឈាមសេដ្ឋកិច្ចយ៉ាងសំខាន់។
ឆ្លៀតក្នុងឱកាសនេះ ឯកឧត្តមរដ្ឋមន្ត្រី បានអំពាវនាវដល់មន្ទីរផែនការរាជធានីខេត្តទាំងអស់ ចូលរួមទូងស្គរអបអរសាទរ ពិធីបើកការដ្ឋានសាងសង់ព្រែកជីកហ្វូណនតេជោ ឲ្យបានច្រើនកុះករ នាថ្ងៃទី៥ ខែសីហា ឆ្នាំ២០២៤ ខាងមុខនេះ។
ឯកឧត្តមរដ្ឋមន្ត្រី បានថ្លែងអំពីស្នូលនៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល គឺ “ការកែទម្រង់ និងពង្រឹងអភិបាលកិច្ច” និងមានអាទិភាពគន្លឹះចំនួន ៥ គឺ មនុស្ស, ផ្លូវ, ទឹក, ភ្លើង និង បច្ចេកវិទ្យា។
ឯកឧត្តមរដ្ឋមន្ត្រី បានផ្ដោតការយកចិត្តទុកដាក់ខ្ពស់ទៅលើអាទិភាពគន្លឹះទី១ នៃយុទ្ធសាស្ត្របញ្ចកោណ គឺ “ការអភិវឌ្ឍមូលធនមនុស្ស” ពោលគឺ មនុស្សជាគោលនយោបាយនៃការអភិវឌ្ឍ មនុស្សក៏ជាគោលដៅចុងក្រោយនៃការអភិវឌ្ឍផងដែរ៕
