សម្តេចធិបតី ហ៊ុន ម៉ាណែត ប្រកាសថា លុយដុល្លារដែលប្រឡាក់ ដាច់តិចតួច នឹងទទួលយកនៅទូទាំងប្រទេស
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសឲ្យដឹងថា លុយដុល្លារដែលរហែកតិចតួច ចាស់ និងប្រឡាក់ នឹងទទួលយកនៅទូទាំងប្រទេសកម្ពុជា ។
ក្នុងឱកាសសម្តេចនិង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតី “សំណេះសំណាល និងពិសាភោជនាហារសាមគ្គី នៃមហាគ្រួសារសមាគមឧកញ៉ាកម្ពុជា និងសមាគមអ្នកអភិវឌ្ឍន៍លំនៅឋានកម្ពុជា” នាថ្ងៃទី២ សីហានេះ សម្ដេចធិបតី ហ៊ុន ម៉ាណែត ក៏បានលើកទឹកចិត្តដល់បងប្អូនប្រជាពលរដ្ឋ និងសាធារណជនទូទៅចូលរួមប្រើប្រាស់ប្រាក់រៀល ដែលជារូបិយបណ្ណជាតិ និងជាអត្តសញ្ញាណជាតិឱ្យបានច្រើនផងដែរ។
សម្តេចធិបតី ហ៊ុន ម៉ាណែត បានគូសបញ្ជាក់ថា រាជរដ្ឋាភិបាល បានគិតគូពាក់ព័ន្ធនឹងការជំរុញវិស័យទេសចរណ៍នៅខេត្តសៀមរាប ព្រមទាំងដាក់ចេញនូវការអន្តរាគមន៍នានា ដូចជាការអនុវត្តបន្ធូរបន្ថយនូវលក្ខណ្ឌ គឺការចរាចរក្រដាសប្រាក់ដុល្លារដែលរហែកតិចតួច ចាស់ និងប្រឡាក់ ដោយធនាគារនៅខេត្តសៀមរាប នឹងដូរយកទៅទាំងអស់ដោយមិនមានកាត់ទឹកនោះទេ ។
សម្ដេចមហាបវរធិបតី ក៏បានជំរុញឲ្យអ្នកឧកញ៉ា និងក្រុមហ៊ុនដូរលុយជួយសម្រួលការប្រើប្រាស់លុយដុល្លារដាច់ ឬរហែកនិងលើកទឹកចិត្តដល់ប្រជាពលរដ្ឋប្រើប្រាស់លុយខ្មែរឲ្យបានច្រើន។
សម្តេចធិបតី ហ៊ុន ម៉ាណែត រំពឹងថា បណ្តាធនាគារ និងអាជីវករប្តូរប្រាក់ទាំងអស់នៅ ទូទាំងប្រទេស អនុវត្តន៍ទៅតាមគោលការណ៍របស់ធនាគារជាតិក្នុងការចាយប្រាក់ដុល្លារ ដែលមានសភាព ចាស់ រហែក ឬប្រឡាក់ ដោយមិនត្រូវកាត់ទឹក ហើយសម្តេចបានបញ្ជាឲ្យមានការអនុវត្តន៍គោលការណ៍នេះនៅទូទាំងប្រទេសតែម្តងចាប់ពីថ្ងៃនេះតទៅ៕