ឧត្តមសេនីយ៍ទោ សោម ស៊ុន អមដំណើរអភិបាលខេត្តកំពង់ធំ ត្រួតពិនិត្យស្ថានភាពជំនន់ទឹកភ្លៀង និងប្រើប្រាស់កម្លាំងប្រដាប់អាវុធទាំងបី ទប់ទឹកបម្រើផលប្រយោជន៍ប្រជាជន
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅថ្ងៃទី២ ខែសីហា ឆ្នាំ២០២៤ បានដឹកនាំកងកម្លាំង អមដំណើរឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ទៅត្រួតពិនិត្យស្ថានភាពជំនន់ទឹកភ្លៀង នៅសង្កាត់ស្រយ៉ូង ក្រុងស្ទឹងសែន ខេត្តកំពង់ធំដែលបង្កឲ្យប៉ះពាល់លិចលង់ស្រូវ ជាច្រើនហិកតា នៅប៉ែកខាងក្រោមក្រុងស្ទឹងសែន ដែលពេលនេះស្រូវកំពុងដាក់គ្រាប់ មិនទាន់អាចប្រមូលផលបាន ។
ឯកឧត្តម នួន ផារ័ត្ន រួមជាមួយមន្ត្រីនៃក្រសួងធនធានទឹក និងឧតុនិយម បានសិក្សាវាយតម្លៃស្ថានភាពទឹក បេីសិនជានៅបន្តជន់លិចយូរថ្ងៃ អាចបណ្ដាលឲ្យខូចខាតស្រូវរបស់ប្រជាកសិករ ដែលជិតដល់ពេលនឹងប្រមូលផល ហើយប្រជាកសិករ និងខាតបង់ថវិកាក្នុងការចំណាយការធ្វើស្រែនេះអស់ជាច្រើន។
ដើម្បីដោះស្រាយសម្រាលបន្ទុក និងការលំបាកបញ្ហានេះ ឯកឧត្តមអភិបាលខេត្តកំពង់ធំ និងថ្នាក់ដឹកនាំនៃក្រសួងធនធានទឹកនិងឧតុនិយម បានសម្រេចប្រើប្រាស់គ្រឿងចក្រមួយចំនួន និងកងកម្លាំងប្រដាប់អាវុធទាំងបី ដើម្បីទប់ទឹក កុំឲ្យហូរខ្លាំងធ្វើឲ្យប៉ះពាល់ដល់ហេដ្ឋារចនាសម្ព័ន្ធផ្លូវថ្នល់ និងការខូចខាតដំណាំស្រូវរបស់ប្រជាពលរដ្ឋ មានភាពធ្ងន់ធ្ងរ។
នៅក្នុងឱកាសនេះ ឧត្តមសេនីយ៍ទោ សោម ស៊ុន បានដឹកនាំកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ចំនួន៦៥នាក់ រួមជាមួយកងកម្លាំងប្រដាប់អាវុធទាំងបី ដើម្បីអនុវត្តតាមបទបញ្ជារបស់ឯកឧត្តមអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ក្នុងការទប់ទឹកបម្រើផលប្រយោជន៍ជូនប្រជាជន ក្នុងពេលដែលប្រជាជនមានទុក្ខលំបាក ដោយអនុវត្តតាមទិសស្លោក ពេលប្រជាជនមានទុក្ខ ត្រូវមានមុខកងទ័ព ដើម្បីជួយដោះស្រាយការលំបាកជូនប្រជាជន ដោយគ្មានលក្ខខណ្ឌ។
ឯកឧត្តម នួន ផារ័ត្ន និងប្រជាកសិករដែលរងផលប៉ះពាល់ដំណាំស្រូវដោយគ្រោះទឹកជំនន់ បានថ្លែងអំណរគុណចំពោះកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលបានរួមសហការគ្នាល្អជាមួយកងកម្លាំងប្រដាប់អាវុធទាំងបី ដេីម្បីជួយដោះស្រាយការលំបាក ជូនប្រជាពលរដ្ឋ បានទាន់ពេលវេលា ៕
