សម្ដេចធិបតី៖ គម្រោងស្ថាបនាព្រែកជីកហ្វូណនតេជោ ជាគម្រោងដែលផ្សារភ្ជាប់ទៅនឹងចក្ខុវិស័យរបស់ថ្នាក់ដឹកនាំតាំងពីសម័យបុរាណ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា គម្រោងស្ថាបនាព្រែកជីកហ្វូណនតេជោ ជាគម្រោងដែលផ្សារភ្ជាប់ទៅនឹងចក្ខុវិស័យរបស់ថ្នាក់ដឹកនាំតាំងពីសម័យបុរាណ ដែលបម្រើវិស័យដឹកជញ្ជូនតាមផ្លូវទឹក និងលើកកម្ពស់វិស័យកសិកម្ម។

ការថ្លែងបែបនេះរបស់សម្តេចធិបតី ធ្វើឡើងក្នុងឱកាសដែលសម្តេច និងលោកជំទាវបណ្ឌិត អញ្ជើញជាអធិបតីក្នុងពិធីបើកការដ្ឋានព្រែកជីកហ្វូណនតេជោ ស្ថិតនៅចំណុចចាប់ផ្តើម នៃព្រែកជីកពីដងទន្លេមេគង្គ ក្នុងភូមិសាស្ដ្រព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល នៅព្រឹកថ្ងៃទី៥ ខែសីហា ឆ្នាំ២០២៤នេះ។

ក្នុងឱកាសនេះ សម្តេចធិបតី ហ៊ុន ម៉ាណែត បានមានប្រសាសន៍ថា ការឈានទៅបើកការដ្ឋានព្រែកជីកហ្វូណនតេជោ បានឆាប់រហ័សនេះ ដោយសារមានការប្ដេជ្ញាចិត្តខ្ពស់ពីរាជរដ្ឋាភិបាល និងមានធនធានគ្រប់គ្រាន់។

សម្ដេចធិបតី នាយករដ្ឋមន្ត្រី បានបញ្ជាក់ថា គម្រោងស្ថាបនាព្រែកជីកហ្វូណនតេជោ គឺបានបង្ហាញពីការឯកភាពជាតិតែមួយ និងស្មារតីជាតិនិយមរបស់ប្រជាពលរដ្ឋគ្រប់រូប ៕