ក្រសួងសុខាភិបាល ប្រជុំក្រុមការងារបច្ចេកទេស ដើម្បីរៀបចំកម្មវិធីសិក្សានូវមុខវិជ្ជាស្តីពី”ការគ្រប់គ្រងការប្រើប្រាស់ឱសថប្រឆាំងមេរោគ (AMS)”
ភ្នំពេញ៖ នាព្រឹកថ្ងៃទី៦ ខែសីហា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងតាមការចង្អុលបង្ហាញពីឯកឧត្តមសាស្រ្តាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល និងជាអនុប្រធានគណ:កម្មការសម្របសម្រួលការថែទាំនិងព្យាបាលវេជ្ជសាស្រ្តថ្នាក់ជាតិ ឯកឧត្តមសាស្រ្តាចារ្យ ហេង សុទ្ធី អនុរដ្ឋលេខាធិការ បានដឹកនាំកិច្ចប្រជុំកិច្ចកិច្ចប្រជុំក្រុមការងារបច្ចេកទេសដើម្បីរៀបចំកម្មវិធីសិក្សានូវមុខវិជ្ជាស្តីពី ”ការគ្រប់គ្រងការប្រើប្រាស់ឱសថប្រឆាំងមេរោគ (AMS)” តាមរយៈប្រព័ន្ធវីដេអូZOOM។
កិច្ចប្រជុំនេះមានគោលបំណងពិភាក្សាពីការរៀបចំកម្មវិធីសិក្សានូវមុខវិជ្ជាស្តីពីការគ្រប់គ្រងការប្រើប្រាស់ឱសថប្រឆាំងមេរោគ (AMS) តាមវិធីសាស្ត្រសមាហរណកម្ម (Integrated Course) សម្រាប់និស្សិតសិក្សានៅឆ្នាំមូលដ្ឋាន និងជាមុខវិជ្ជាដាច់ដោយឡែក(Standalone) សម្រាប់និស្សិតក្នុងឆ្នាំមុនបញ្ចប់ការសិក្សា (ថ្នាក់អន្តេវាសិក)នៃគ្រឹះស្ថានបណ្តុះបណ្តាលក្នុងវិស័យសុខាភិបាល។
កិច្ចប្រជុំនេះបានពិភាក្សា របៀបវារដូចខាងក្រោម៖
១- បានបង្ហាញពីសារៈសំខាន់នៃការបណ្តុះបណ្តាលលើការងារគ្រប់គ្រងការប្រើប្រាស់ឱសថប្រឆាំងមេរោគ និងផ្សព្វផ្សាយនូវសេចក្តីសម្រេចរបស់ក្រសួងសុខាភិបាល ឱ្យដាក់បញ្ជូលនូវមុខវិជ្ជា “ការគ្រប់គ្រងការប្រើប្រាស់ឱសថប្រឆាំងមេរោគ” ក្នុងកម្មវិធីសិក្សានៃគ្រឹះស្ថានបណ្តុះបណ្តាលក្នុងវិស័យសុខាភិបាល។
២- បទពិសោធន៍នៃការរៀបចំកម្មវិធីសិក្សា “ការគ្រប់គ្រងការប្រើប្រាស់ឱសថប្រឆាំងមេរោគ” ដាច់ដោយឡែក ផ្នែកបរិញ្ញាបត្រវេជ្ជសាស្រ្តកន្លងមក។
៣- បានសម្រេចរៀបចំក្រុមការងារបច្ចេកទេសរង (Sub-TWG) សម្រាប់ជំនាញនានាបន្ថែមទៀត រួមទាំងថ្នាក់បរិញ្ញាបត្ររង និងបរិញ្ញាបត្រ ដើម្បីចងក្រងនូវកម្មវិធីសិក្សាថ្មីនេះ។
ឯកឧត្តមសាស្រ្តាចារ្យ អនុរដ្ឋលេខាធិការ និងជាប្រធានអង្គប្រជុំបានណែនាំដល់ក្រុមការងារធ្វើយ៉ាងណារៀបចំកម្មវិធីសិក្សាដ៏មានសារៈសំខាន់នេះបានមុនដំណាច់ឆ្នាំ២០២៤។
គួរបញ្ជាក់ផងដែរថា កិច្ចប្រជុំនេះមានការអញ្ជើញចូលរួមដោយអនុប្រធាននិងសមាជិកក្រុមការងារបច្ចេកទេស រួមមាន៖ ឯកឧត្តម សុខស៊្រុន ប្រធាននាយកដ្ឋានមន្ទីរពេទ្យ លោក លោកស្រីសាស្រ្តាចារ្យជាអនុប្រធាន នាយកដ្ឋាន នាយករងមន្ទីរពេទ្យជាតិ ព្រឹទ្ធបុរសរងមហាវិទ្យាល័យឱសថសាស្រ្តនៃសាកលវិទ្យាល័យវិទ្យាសាស្រ្តសុខាភិបាល ថ្នាក់ដឹកនាំ និងមន្ត្រីរាជការក្រសួងសុខាភិបាល មន្ទីរពេទ្យកាល់ម៉ែត មន្ទីរពេទ្យមិត្តភាព កម្ពុជា-ចិនព្រះកុសុម: មន្ទីរពេទ្យមិត្តភាពខ្មែរសូវវៀត មន្ទីរពេទ្យព្រះអង្គឌួង វិទ្យាស្ថានជាតិសុខភាពសាធារណ: តំណាងគណៈគ្រូពេទ្យកម្ពុជា គណ:គិលានុបដ្ឋាក តំណាងអង្គការសុខភាពពិភពលោកនិងដៃគូអភិវឌ្ឍន៍ដទៃទៀតសរុបចំនួន ៣១ រូប៕
