ឧត្តមសេនីយ៍ទោ សោម ស៊ុន ជួបសំណេះសំណាល និងឧបត្ថម្ភស្បៀងអាហារអំណោយមនុស្សធម៌របស់សម្ដេចធិបតី ហ៊ុន ម៉ាណែត និងលោកជំទាវ ជូនគ្រួសារកងទ័ព ដែលមានជីវភាពលំបាកខ្វះខាត
ភ្នំពេញ៖ នៅព្រឹកថ្ងៃទី៧ ខែសីហា ឆ្នាំ២០២៤ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានជួបសំណេះសំណាល និងឧបត្ថម្ភស្បៀងអាហារគ្រឿងឧបភោគបរិភោគ អំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនក្រុមគ្រួសារកងទ័ព ដែលមានជីវភាពលំបាកខ្វះខាតចំនួន៦០គ្រូសារ ដែលពិធីនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ។
ឧត្តមសេនីយ៍ទោ សោម ស៊ុន បានគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ដែលតែងតែបានជួយឧបត្ថម្ភមានអាហារ គ្រឿងឧបភោគបរិភោគជាបន្តបន្ទាប់ សម្រាប់បម្រើឲ្យវិស័យមនុស្សធម៌ ជូនដល់បងប្អូនអតីតយុទ្ធជន និងប្រជាជន ដែលមានជីវភាពលំបាកខ្វះខាត នៅក្នុងខេត្តកំពង់ធំ និង បានណែនាំដល់ក្រុមគ្រួសារកងទ័ព ដែលមានជីវភាពលំបាកខ្វះខាតទាំង៦០គ្រួសារ ត្រូវថែរក្សាសុខភាព រស់នៅល្អ ហូបចុកស្អាត មានអនាម័យ ហើយជាមួយនោះដែរ ត្រូវមើលថែទាំកូនចៅតូចៗឲ្យបានល្អជៀសវាងគ្រោះថ្នាក់ដោយប្រការណាមួយក្នុងរដូវទឹកជំនន់ ដែលកំពុងជន់លិចនៅបណ្ដាកន្លែងមួយចំនួននៅក្នុងភូមិសាស្ត្រខេត្តកំពង់ធំ ។
នៅក្នុងឱកាសនេះ មេបញ្ជាការតំបន់ប្រតិបត្តិការសឹករងកំពង់ធំ បានប្រគល់ជូនអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនគ្រួសារកងទ័ពទាំង៦០គ្រួសារ ដោយក្នុងមួយគ្រួសារទទួលបាននូវ អង្ករចំនួន២៥គីឡូក្រាម មីជាតិចំនួន១កេស ទឹកត្រីទឹកស៊ីអ៊ីវចំនួន១យួរ និងត្រីខកំប៉ុងចំនួន១យួរ ផងដែរ។
ក្រុមគ្រួសារកងទ័ព ដែលមានជីវភាពលំបាកខ្វះខាតទាំង៦០គ្រួសារ សូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ព្រមទាំងឧត្តមសេនីយ៍ទោ សោម ស៊ុន ដែលបានយកចិត្តទុកដាក់គ្រប់បែបយ៉ាងជួយដល់អតីតយុទ្ធជន និងប្រជាជន ព្រមទាំងគ្រួសារកងទ័ព ដែលមានជីវភាពលំបាកខ្វះខាតនៅក្នុងភូមិសាស្ត្រខេត្តកំពង់ធំ នាពេលកន្លងទៅ និងសូមគោរពជូនពរសម្ដេច លោកជំទាវ ឯកឧត្តម អស់លោក លោកស្រីទាំងអស់ នៃថ្នាក់ដឹកនាំបញ្ជាការដ្ឋាន តំបន់ ប្រតិបត្តិការ សឹករងកំពង់ធំ សូមទទួលបាននូវពុទ្ធពរទាំងបួនប្រការ កុំបីឃ្លៀងឃ្លាតឡើយ៕
