ឯកឧត្តម មាន ចាន់យ៉ាដា៖ ខេត្តឧត្តរមានជ័យ ត្រូវបានគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ ជ្រើសរើសឃុំចំនួន៦ ដើម្បីធ្វើផែនការប្រើប្រាស់ដី

ភ្នំពេញ៖ នាថ្ងៃពុធ ៣កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៧ ខែសីហា ឆ្នាំ២០២៤ ឯកឧត្តម មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ និងជាប្រធានគណៈកម្មាធិការរៀបចំដែនដី និងនគរូបនីយកម្មថ្នាក់ខេត្ត បានអញ្ជើញជាអធិបតីដឹកនាំសិក្ខាសាលាអនុម័តផែនការប្រើប្រាស់ដីនៅក្នុងឃុំ នៃខេត្តឧត្តរមានជ័យ។

ក្នុងឱកាសនោះ ឯកឧត្តម មាន ចាន់យ៉ាដា បានថ្លែងថា ក្នុងនាមរដ្ឋបាលខេត្ត និងជាប្រធានគណៈកម្មាធិការរៀបចំដែនដី និងនគរូបនីយកម្មថ្នាក់ខេត្ត ពិតជាមានសេចក្តីសោមនស្សរីករាយយ៉ាងក្រៃលែង ដោយខេត្តឧត្តរមានជ័យ ត្រូវបានជ្រើសរើសជាខេត្តគោលដៅ នៃការអនុវត្តគម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) និងជាពិសេសផ្នែករៀបចំផែនការប្រើប្រាស់នៅក្នុងឃុំ។

ឯកឧត្តមអភិបាលខេត្ត បានបន្តថា ខេត្តឧត្តរមានជ័យ ត្រូវបានគម្រោងជ្រើសរើសឃុំចំនួន៦ ដើម្បីធ្វើផែនការប្រើប្រាស់ដីនៅក្នុងឃុំគឺ៖ ឃុំចុងកាល់ ឃុំពង្រ ឃុំជើងទៀន និងឃុំក្រសាំង របស់ស្រុកចុងកាល់ ឃុំគោកមន និងឃុំបេង របស់ស្រុកបន្ទាយអំពិល។

ជាមួយគ្នានោះ ឯកឧត្ដមអភិបាលខេត្ត បានគូសបញ្ជាក់ថា ក្រសួងរៀបចំដែនដី នគរូបនីយកម្ម និងសំណង់ ជាអង្គភាពដឹកនាំលើការកសាងផែនការប្រើប្រាស់ដីនៅក្នុងឃុំ ព្រមទាំងមានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ជាសេនាធិការក្នុងការត្រួតពិនិត្យ សំដៅធានាបានការប្រើប្រាស់ដី និងគាំទ្រដល់ការអភិវឌ្ឍន៍សេដ្ឋកិច្ច សង្គមប្រកបដោយចីរភាព និងសមធម៌ ៕