សម្តេចធិបតី៖ កម្ពុជា-អង់គ្លេស មានទំនាក់ទំនងជាប្រពៃណីយូរអង្វែងផូរផង់ ជាមួយនឹងកិច្ចសហប្រតិបត្តិការប្រកបដោយផ្លែផ្កា
ភ្នំពេញ៖ ក្នុងពិធីសម្ពោធបើកឱ្យដំណើរការជាផ្លូវការ សាកលវិទ្យាល័យ ឌឹ ម៉ុនហ្វត កម្ពុជា នាថ្ងៃទី៨ សីហានេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងបញ្ជាក់ថា កម្ពុជា និងអង់គ្លេស មានទំនាក់ទំនងជាប្រពៃណីយូរអង្វែងផូរផង់ ជាមួយនឹងកិច្ចសហប្រតិបត្តិការប្រកបដោយផ្លែផ្កា និងផ្តល់ផលប្រយោជន៍ទៅវិញទៅមក ទាំងនៅក្នុងកម្រិតទ្វេភាគី កម្រិតតំបន់ និង អន្តរជាតិ ។
សម្ដេចធិបតី បានមានប្រសាសន៍ថា ការបើកសាខាសាកល វិទ្យាល័យ De Montfort នៅប្រទេសកម្ពុជា គឺជាការចូលរួមចំណែកប្រកបដោយអត្ថន័យខ្លឹមសារ ដល់ការលើកស្ទួយទំនាក់ទំនងនេះ ឱ្យកាន់តែខ្ពស់ថែមមួយកម្រិតទៀត។
សម្ដេចធិបតីក៏បានលើកឡើងថា សម្ដេចទន្ទឹងរង់ចាំ ដោយក្តីសោមនស្ស ចំពោះការរីកចម្រើន និង ការអភិវឌ្ឍរបស់សាកលវិទ្យាល័យ De Montfort នៅកម្ពុជា ជាមួយនឹងផ្លែផ្កានៃការអភិវឌ្ឍរបស់សាកលវិទ្យាល័យ តាមរយៈ ធនធានមនុស្សប្រកបដោយសមត្ថភាព, ទាំងចំណេះដឹងជំនាញ គុណធម៌ សីលធម៌ និង មនសិការ សេ្នហាជាតិ ជួយចូលរួមអភិវឌ្ឍសង្គមជាតិខ្មែរ ឱ្យកាន់តែរីកចម្រើនខ្លាំងក្លា ក្រោមម្លប់ដ៏សែនត្រជាក់នៃសន្តិភាព ៕
