រដ្ឋមន្រ្តីក្រសួងអប់រំ ផ្តល់អនុសាសន៍គន្លឹះ ៨ចំណុច ដើម្បីសម្រេចបាននូវស្តង់ដារសាលារៀនគំរូ
ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា នាថ្ងៃទី៧ ខែសីហា ឆ្នាំ ២០២៤ បានដឹកនាំក្រុមការងារទស្សនកិច្ច ពិនិត្យវឌ្ឍនភាពការងារអប់រំ ជំរុញការអនុវត្តស្តង់ដាសាលារៀនគំរូ នៅវិទ្យាល័យ ជា ស៊ីម បឹងកេងកង ដោយមានការចូលរួមពីសំណាក់ ឯកឧត្ដម លោកជំទាវថ្នាក់ដឹកនាំក្រសួង លោក លោកស្រី មន្ត្រីពាក់ព័ន្ធក្រោមឱវាទ គណៈគ្រប់គ្រងសាលា លោកគ្រូ អ្នកគ្រូ មាតាបិតា អ្នកអាណាព្យាបាល តំណាងសហគមន៍ និងអាជ្ញាធរដែនដី សរុបប្រមាណ ១០០នាក់។
ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងពី គោលដៅនៃការធ្វើទស្សនកិច្ចនេះ គឺដើម្បីជួយគាំទ្រជំរុញឱ្យវិទ្យាល័យ ជា ស៊ីម បឹងកេងកង សម្រេចបានលទ្ធផលសិក្សាតាមសក្តានុពលដែលមាន ដើម្បីធានាបានលទ្ធផលសិក្សាល្អ គឺអាស្រ័យលើកត្តាសំខាន់៤ ៖ សាលារៀន គ្រូបង្រៀន សិស្ស និងសហគមន៍។ ឆ្លើយតបនឹងគោលដៅនេះ ក្រសួងបានដាក់ចេញស្តង់ដាសាលារៀនគំរូ ៥ ដើម្បីឱ្យសាលាប្រឡងប្រណាំងគ្នាដើម្បីលើកកម្ពស់គុណភាពរៀន និងបង្រៀន ដែលរួមមាន ៖ (ស្តង់ដា(ទី១).លទ្ធផលសិក្សារបស់សិស្ស, ស្តង់ដា(ទី២). ការបង្រៀននិងរៀន, ស្តង់ដា(ទី៣).ការចូលរួមរបស់សហគមន៍, ស្តង់ដា (ទី៤). ដំណើរការប្រតិបត្តិ និងរដ្ឋបាលសាលារៀន និង ស្តង់ដា(ទី៥).គណនេយ្យភាពសាលារៀន។
ក្នុងឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានបំផុសដល់គណៈគ្រប់គ្រងសាលា លោកគ្រូ អ្នកគ្រូទាំងអស់ឱ្យចូលរួមចែករំលែកនូវបទពិសោធន៍ យោបល់ និងបញ្ហាប្រឈមនានា ដើម្បីរួមចំណែកកែលម្អគុណភាពអប់រំ ឆ្ពោះទៅលើកកម្ពស់លទ្ធផលសិស្ស តបតាមអនុសាសន៍សម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដាក់ចេញនូវវិធានគន្លឹះចំនួន ៤ ដើម្បីពង្រឹងគុណភាពអប់រំ ដែលមានរួមមាន៖ (ទី១). ការពង្រឹងអភិបាលកិច្ចសាលារៀន (ទី២). ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង វិន័យសីលធម៌ និងឥរិយាបថរបស់សិស្ស(ទី៣). ការយកចិត្តទុកដាក់លើសុខភាពរបស់សិស្សតាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន (ទី៤).ការជំរុញនិងលើកទឹកចិត្តការចូលរួមរបស់មាតាបិតា អាណាព្យាបាល និង សហគមន៍ ក្នុងការអប់រំស្របតាមពាក្យស្លោក “ភាពជាដៃគូរដ្ឋ និងសហគមន៍ ដើម្បីការអប់រំ”។
ដើម្បីសម្រេចបាននូវស្តង់ដារសាលារៀនគំរូ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍ គន្លឹះមួយចំនួនដូចជា៖
– ចំណុចគន្លឹះ គឺត្រូវបង្កើនម៉ោងសិក្សា និងត្រូវបន្តផ្តោតលើការលើកកម្ពស់លទ្ធផលសិក្សាសិស្ស ដោយត្រូវពង្រឹងការរៀន និងបង្រៀន ឱ្យបានច្រើនម៉ោង និងឈានទៅរៀនពេញមួយថ្ងៃ ដោយជំរុញឱ្យមានការចូលរួមគាំទ្រពីសំណាក់មាតាបិតា និងអ្នកអាណាព្យាបាលសិស្ស។
– ក្រសួងលើកទឹកចិត្តឱ្យសាលារៀនពង្រឹងការបង្រៀន ឬបន្ថែមម៉ោងបង្រៀន ដោយគួរបង្រៀនឱ្យបានយ៉ាងហោចណាស់ឱ្យបាន ៦ម៉ោងក្នុងមួយថ្ងៃ។
– សូមបង្រៀនបំប៉នបន្ថែមដល់សិស្សដែលត្រៀមប្រឡងមធ្យមសិក្សាទុតិយភូមិរហូតដល់ថ្ងៃប្រឡង ។
– ក្រសួងមិនហាមឃាត់ការបង្រៀនគួរនោះទេ តែមិនអនុញ្ញាតិឱ្យយកមេរៀនបង្រៀនគួរមកចេញពេលប្រឡងឡើយ។
– លើកសរសើរពីសោភណភាពសាលា និងបរិស្ថានសិក្សាដែលត្រូវបានរៀបចំយ៉ាងល្អ និងសូមឱ្យបន្តពង្រឹងបន្ថែមទៀត។
– ពន្យល់ពីសារៈសំខាន់នៃការសិក្សាមុខវិជ្ជាវិទ្យាសាស្ត្រ និងវិទ្យាសាស្ត្រសង្គម ដែលសុទ្ធសឹងទាមទារនូវមូលដ្ឋានគ្រឹះចំណេះដឹងរឹងមាំទើបអាចប្រឡងជាប់ ទទួលបានលទ្ធផល ។
– បានគូសបញ្ជាក់ពីសារៈសំខាន់នៃរៀនពេញមួយថ្ងៃ ការបង្រៀនបំប៉នបន្ថែមដល់សិស្សដែលរៀនយឺត ក៏ដូចការចូលរួមគាំទ្ររបស់មាតាបិតា អ្នកអាណាព្យាបាល និងសហគមន៍ ដើម្បីលើកកម្ពស់គុណភាពអប់រំ ឈានទៅលើកកម្ពស់លទ្ធផលសិក្សារបស់សិស្ស។
– លើកទឹកចិត្តឱ្យបន្តពង្រឹងដំណើរប្រតិបត្តិការ និងរដ្ឋបាលសាលារៀន ដោយផ្អែកលើការអនុវត្តសូចនាករស្តង់ដាសាលារៀនគំរូ ។
តាងមានក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ នឹងថ្លែងអំណរគុណចំពោះការប្ដេជ្ញាចិត្តរបស់គណៈគ្រប់គ្រងសាលារៀន ក្នុងការបន្តស្មារតីអនុវត្តយ៉ាងមុតមាំនូវស្តង់ដាសាលាគំរូ និងជូនពរឱ្យវិទ្យាល័យ ជា ស៊ីម បឹកកេងកង សម្រេចគោលដៅប្រែក្លាយជាវិទ្យាល័យគំរូនាពេលអនាគត៕
