ឧត្តមសេនីយ៍ទោ សេង ធារិន អញ្ជើញបើកវគ្គហ្វឹកហ្វឺនបំប៉នជំនាញស៊ើបការណ៍ ឆ្នាំ២០២៤ នៅទីបញ្ជាការវរសេនាតូចស៊ើបការណ៍ យោធភូមិភាគទី៥
ភ្នំពេញ៖ ឧត្តមសេនីយ៍ទោ សេង ធារិន មេបញ្ជាការស្ដីទី យោធភូមិភាគទី៥ នាថ្ងៃទី៩ ខែសីហា ឆ្នាំ២០២៤ បានអញ្ជើញបើកវគ្គហ្វឹកហ្វឺនបំប៉ន ជំនាញស៊ើបការណ៍ ឆ្នាំ២០២៤ នៅទីបញ្ជាការវរសេនាតូចស៊ើបការណ៍។ ដោយក្នុងវគ្គហ្វឹកហ្វឺនបំប៉នជំនាញស៊ើបការណ៍មានសិក្ខាកាម ចំនួន ៥៥នាក់ សិក្សារយៈពេល ៩១ថ្ងៃ។
ថ្លែងក្នុងឱកាសនោះ លោកឧត្តមសេនីយ៍ទោ សេង ធារិន មានប្រសាស៍ថា ទន្ទឹមនឹងប្រទេសជាតិមានសុខសន្ដិភាព មានស្ថេរភាពនយោបាយ យើងក៏ត្រូវតែយកចិត្តទុកដាក់ ពង្រឹងកងកម្លាំងប្រដាប់អាវុធតាមរយៈការហ្វឹកហ្វឺនរៀនសូត្រលើកកម្ពស់ស្មារតី និងសមត្ថភាព ដើម្បីឆ្លើយតបទៅនឹងតួនាទីភារកិច្ចឱ្យបានរឹងមាំ។ ភារកិច្ចចំពោះមុខគឺការការពារបូរណភាពទឹកដី ការពារឱ្យបានដាច់ខាត ជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ ដែលកើតចេញពីការបោះឆ្នោត។ ត្រូវតែការពារសន្ដិភាពឱ្យបានគង់វង្ស ព្រោះថាសន្ដិភាពមានតម្លៃពុំអាចកាត់ថ្លៃបានឡើយ សន្ដិភាពទទួលបានដោយការប្ដូរសាច់ស្រស់ឈាមស្រស់ របស់វរជនស្នេហាជាតិជាច្រើនរូបក្នុងបុព្វហេតុ ការពារបូរណភាពទឹកដី សុខសន្ដិភាព ស្ថេរភាពនយោបាយ និងការអភិវឌ្ឍន៍លើគ្រប់វិស័យនាពេលបច្ចុប្បន្ននេះ គឺមិនត្រូវបានបំផ្លាញបាត់បង់ទៅវិញ ដោយពួកក្រុមជ្រុលនិយមមួយចំនួនតូចនោះទេ យើងត្រូវថែរក្សាសន្ដិភាពនេះ ឱ្យបានឋិតថេរគង់វង្ស ដើម្បីរក្សាសេចក្ដីសុខសាន្ត របស់ប្រជាពលរដ្ឋ និងបន្តការកសាង និងអភិវឌ្ឍជាតិមានការរីកចម្រើនទៅមុខបន្ថែមទៀត។ ត្រូវយកចិត្តទុកដាក់ក្នុងការថែរក្សាសុខភាពឲ្យបានល្អ និងរស់នៅប្រកបដោយសេចក្ដីសុខសុភមង្គលគ្រប់ៗគ្នា ត្រូវខិតខំប្រឹងប្រែងរៀនសូត្រ បង្កើនសមត្ថភាពយោធិនគ្រប់រូបឱ្យយល់ច្បាស់ ការគ្រប់គ្រងដឹកនាំបញ្ជាសមស្របក្នុងការអនុវត្តភារកិច្ចការពារបូរណភាពទឹកដី រក្សាឲ្យបាននូវសន្តិសុខ និងសុវត្ថិភាពសង្គមក្នុងមូលដ្ឋានឈរជើងរបស់ វរសេនាតូចស៉ើបការណ៍ ជូនប្រជាពលរដ្ឋឲ្យបានល្អប្រសើរ សង្ឃឹមពេលបញ្ចប់វគ្គទទួលលទ្ធផលល្អ។
ឧត្តមសេនីយ៍ទោ សេង ធារិន ក៏បានក្រើនរំលឹកដល់ នាយទាហាន និងពលទាហានទាំងអស់ ក្នុងវរសេនាតូចស៉ើបការណ៍ សូមចៀសឆ្ងាយឱ្យផុតពីគ្រឿងញៀន ដែលធ្វើឱ្យប៉ះពាល់ដល់សុខភាព និងស្មារតី បង្កជាបញ្ហាអស្ថេរភាពនៅក្នុងសង្គមជាតិ។
ក្នុងឱកាសនោះដែរ លោកឧត្តមសេនីយ៍ទោ បានឧបត្ថម្ភថវិកាដល់វគ្គហ្វឹកហ្វឺន ចំនួន ១.០០០.០០០រៀល និងប្រកាសបើកវគ្គហ្វឹកហ្វឺនចាប់ពីថ្ងៃនេះតទៅ៕
