លោកជំទាវ និន សាផុន អញ្ជើញសម្ពោធឆ្លងកុដិមួយខ្នង នៅក្នុងពុទ្ធមណ្ឌលវិបស្សនាធុរៈកម្ពុជា (ភ្នំព្រះរាជទ្រព្យ)
ភ្នំពេញ៖ លោកជំទាវ និន សាផុន ប្រធានគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា (គណៈកម្មការទី៩) រួមជាមួយសមាជិក សមាជិកាគណៈកម្មការ នាថ្ងៃទី៩ ខែសីហា ឆ្នាំ២០២៤ បានអញ្ជើញសម្ពោធឆ្លងកុដិមួយខ្នង ដែលជាការចំណាយធនធានផ្ទាល់ខ្លួនរបស់ លោកជំទាវ និន សាផុន ដើម្បីកសាងកុដិមួយខ្នងប្រគេនព្រះសង្ឃទុកប្រើប្រាស់ជាប្រយោជន៍ក្នុងពុទ្ធសាសនា នៅក្នុងពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា ស្ថិតនៅខាងលិចជាប់ជើងភ្នំព្រះរាជទ្រព្យ ក្នុងភូមិភ្នំ ឃុំផ្សារដែក ស្រុកពញាឮ ខេត្តកណ្តាល។
ពុទ្ធមណ្ឌលវិបស្សនាធុរៈនៃព្រះរាជាណាចក្រកម្ពុជា គឺជាមជ្ឈមណ្ឌលវិបស្សនាដំបូងគេបង្អស់ដែលបានបើកទ្វារឱ្យសិក្ខាកាមដែលជាកុលបុត្រខ្មែរ បានសិក្សាបដិបត្តិវិបស្សនាធុរៈអប់រំចិត្ត ដែលជាមាគ៌ា ឬផ្លូវដឹកនាំសត្វលោកឱ្យមានសេចក្តីសុខស្ងប់តាមផ្លូវកាយ វាចា និងចិត្ត ៕
