ទេសរដ្ឋមន្រ្តី គន់ គីម ប្រាប់ដល់ប្រធានកិត្តិយស និងគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ ត្រូវបន្តបម្រើបងប្អូនអតីតយុទ្ធជនដែលមានជីវភាពលំបាកខ្វះខាត
ភ្នំពេញ៖ នៅព្រឹកថ្ងៃទី៩ ខែសីហា ឆ្នាំ២០២៤ ឯកឧត្តមទេសរដ្ឋមន្រ្តី នាយឧត្តមសេនីយ៍ គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រកាសតែងតាំងប្រធានកិត្តិយស និងអនុប្រធាន២ រូប នៃគណៈកម្មាធិការសមាគមអតីតយុទ្ធជនកម្ពុជា ខេត្តកំពង់ធំ ដែលទើបមកបំពេញភារកិច្ចថ្មី នៅខេត្តកំពង់ធំ ដែលពិធីនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ។
ឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ ប្រធាន គណៈកម្មាធិការសមាគម អតីតយុទ្ធជន កម្ពុជាខេត្តកំពង់ធំ បានឡើងធ្វើរបាយការណ៍ស្វាគមន៍ និងបានគូសបញ្ជាក់អំពីលទ្ធផលសំខាន់ៗមួយចំនួន ដែលគណៈកម្មាធិការសមាគមអតីតយុទ្ទជនកម្ពុជា សម្រេចបាននាពេលកន្លងទៅ មានជាអាទិ៍ ការសាងសង់ផ្ទះជូនអតីតយុទ្ទជន នាពេលកន្លងទៅ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា បានចំនួន៣៨៧ខ្នងផ្ទះ ក្នុងនោះមាន១៤១ខ្នងផ្ទះ ដែលកំពុងរស់នៅលើដីសម្បទានសង្គមកិច្ច ដែលសម្តេចតេជោ បានផ្តល់ជូន១គ្រូសារមានផ្ទៃដី១ហិកតាកន្លះ និងចំនួន២៤៦ខ្នងផ្ទះទៀត នៅតាមមូលដ្ឋាននានាក្នុងខេត្តកំពង់ធំ។ ក្រៅពីនោះបានប្រគល់ថវិកាបេឡាមរណសង្គ្រោះ ជូនគ្រួសារសពអតីតយុទ្ធជន ដែលទទួលមរណភាព ក្នុងរយៈពេលកន្លងទៅ បានទាន់ពេលវេលា និងបានរួមសហការជាមួយមន្ទីរសង្គ មកិច្ច អតីតយុទ្ធជន និងយុវនិតិសម្បទា ខេត្តកំពង់ធំ ក្នុងការប្រគល់ប្រាក់ធានារ៉ាប់រងសង្គ ម ជូនក្រុមគ្រួសារសពអតីតយុទ្ទជននៅក្នុងខេត្តកំពង់ធំ និងបានទៅសំណេះសំណាលសាកសួរសុខទុក្ខ ឧបត្ដម្ភស្បៀងអារហារ គ្រឿងឧបភោគបរិភោគដែលជាអំណយ មនុស្សធម៌ របស់ សម្តេចមហាបវរធិបតី ហ៊ុន ម៉ាណែត និងលោកជំទាវ ជូនដល់បងប្អូនអតីតយុទ្ទជន ដែលមានជីភាពលំ បាកខ្ខះខាតនៅក្នុងខេត្តកំពង់ធំដោយបានបង្កភាពកក់ក្តៅជូនបងប្អូនអតីតយុទ្ធជនយើង។
ឯកឧត្តមទេសរដ្ឋមន្រ្តី នាយឧត្តមសេនីយ៍ គន់ គីម បានប្រគល់សេចក្តីសម្រេចចិត្ត និងប្រកាសតែងតាំងឯកឧត្តម នួន ផារ័ត្ន អភិបាលខេត្ត ជាប្រធានកិត្តិយស សមាគម អតីតយុទ្ធជនកម្ពុជាខេត្តកំពង់ធំ និងអនុប្រធានគណៈកម្មាធិការ សមាគម អតីតយុទ្ធជន កម្ពុជា ខេត្តកំពង់ធំចំនួន២រូប គឺឧត្តមសេនីយ៍ត្រី ហេង សុផលស្នងការនគរបាលខេត្ត និងលោក ជួន សិលាវិត ប្រធានមូលនិធិ ជំនួយសង្គមនៃមន្ទីរសង្គមកិច្ច អតីត យុទ្ធជនខេត្តកំពង់ធំ។
ឯកឧត្តម នួន ផារ័ត្ន អភិបាលខេត្ត ប្រធាន កិត្តិយសសមាគមអតីតយុទ្ធជនកម្ពុជា ខេត្តកំពង់ធំ បានឡើងប្តេជ្ញាចិត្តបន្តការអនុវត្ត ក្នុងការគាំទ្រការដោះស្រាយជីវភាព ជូនបងប្អូនអតីតយុទ្ជ ដែលជួបការលំបាកខ្វះខាត និងការមើលថែទាំបងប្អូនអតីតយុទ្ធជន នៅទូទាំងខេត្តកំពង់ធំឲ្យបានល្អប្រសើរ។
ឯកឧត្តមទេសរដ្ឋមន្រ្តី នាយឧត្តមសេនីយ៍ គន់ គីម បានថ្លែងនូវការកោតសរសើរចំពោះ គណៈកម្មាធិការ សមាគម អតីតយុទ្ធជន កម្ពុជា ខេត្តកំពង់ធំ ពិសេសឧត្តមសេនីយ៍ទោ សោម ស៊ុន ក្នុងនាម ប្រធាន គណៈកម្មាធិការសមាគម អតីតយុទ្ធជន កម្ពុជា ខេត្តកំពង់ធំដែលបានយកចិត្តទុកដាក់យ៉ាងសកម្មក្នុងការដោះស្រាយការលំបាកខ្វះខាតបម្រើអតីតយុទ្ធជន នៅក្នុងខេត្តកំពង់ធំ បានយ៉ាងល្អប្រសើរ។
ជាមួយនេះដែរ ឯកឧត្តមទេសរដ្ឋមន្រ្តី នាយឧត្តមសេនីយ៍ គន់ គីម បានប្រគល់ភារកិច្ចសំខាន់ៗមួយចំនួនដល់ប្រធានកិត្តិយស និងគណៈកម្មាធិការ សមាគមអតីតយុទ្ធជន កម្ពុជាខេត្តកំពង់ធំ ត្រូវបន្តបម្រើបងប្អូនអតីតយុទ្ធជនរបស់យើងទាំងការដោះស្រាយបញ្ហាដីធ្លី ផ្ទះសម្បែង និងការដោះស្រាយប័ណ្ណសមធម៌ និងប័ណ្ណគ្រួសារងាយរងហានិភ័យជូនដល់គ្រួសារ អតីតយុទ្ធជន ដែល មាន ជីវភាពលំបាកខ្វះខាត ដើម្បីបានទៅពិនិត្យព្យាបាលជម្ងឺនៅតាមមន្ទីពេទ្យរដ្ឋនានា ដែលរាជរដ្ឋាភិបាលជាអ្នកចំណាយថវិកាសងថ្លៃព្យាបាលជំងឺជូន៕
