គណបក្សប្រជាជនកម្ពុជាខេត្តកំពង់ចាម រៀបចំកិច្ចបូកសរុបលទ្ធផលការងារឆមាសទី១ និងពិធីប្រកាសសមាសភាពក្រុមការងារគណបក្សចុះមូលដ្ឋានស្រុកកំពង់សៀម
ភ្នំពេញ៖ គណបក្សប្រជាជនកម្ពុជាខេត្តកំពង់ចាម នៅថ្ងៃទី១០ ខែសីហា ឆ្នាំ២០២៤នេះ បានបរៀបចំកិច្ចប្រជុំបូកសរុបលទ្ធផលការងារគណបក្ស និងក្រុមការងារគណបក្សចុះមូលដ្ឋានខេត្តកំពង់ចាម ប្រចាំឆមាសទី១ និងទិសដៅភារកិច្ចឆមាសទី២ ឆ្នាំ២០២៤។ ពិធីប្រកាសប្រធាន-អនុប្រធាន ក្រុមការងារគណបក្សចុះមូលដ្ឋានស្រុកកំពង់សៀម និងឃុំទាំង១៥ក្រោមអធិបតីភាពឯកឧត្តមសន្តិបណ្ឌិត នេត សាវឿន សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ចាម។ កម្មវិធីនេះ បានធ្វើឡើងនៅទីស្នាក់ការណបក្សស្រុកកំពង់សៀម។
នៅក្នុងកិច្ចប្រជុំនេះ ឯកឧត្តម អ៊ុន ចាន់ដា សមាជិកគណៈកម្មាធិការកណ្តាលគណបក្ស និងជាប្រធានគណៈកម្មាធិការគណបក្សខេត្តកំពង់ចាម បានឡើងរាយការណ៍អំពីស្ថានភាពនយោបាយ និងសមិទ្ធផលដែលគណបក្សខេត្តកំពង់ចាមបានសម្រេចដើម្បីប្រយោជន៍សង្គមជាតិ និងមាតុភូមិ។
ក្រោយសេចក្តីរាយការណ៍អំពីស្ថានការណ៍ និងសមិទ្ធិផល ឯកឧត្តមសន្តិបណ្ឌិត នេត សាវឿន បានប្រគល់លិខិតតែងតាំងឯកឧត្តម ហេង សួរ ដែលជាសមាជិកគណៈកម្មាធិការកណ្តាល ជាអនុប្រធានក្រុមការងារគណបក្សចុះមូលដ្ឋានខេត្តកំពង់ចាម និងជាប្រធានក្រុមការងារគណបក្សចុះមូលដ្ឋានស្រុកកំពង់សៀម និងការទទួលស្គាល់សមាសភាពឯកឧត្តម លោកជំទាវជាអនុប្រធាននិងសមាជិកក្រុមការងារគណបក្សចុះមូលដ្ឋានស្រុកកំពង់សៀម និងឃុំទាំង១៥។
ក្រោយការតែងតាំង ឯកឧត្តម ហេង សួរ បានប្តេជ្ញាគោរពនិងអនុវត្តតាមលក្ខន្តិកៈ បទបញ្ជាផ្ទៃក្នុង កម្មវិធីនយោបាយ គោលការណ៍ គោលនយោបាយ សេចក្តីសម្រេច សេចក្តីណែនាំនានារបស់គណបក្សឱ្យខ្ជាប់ខ្ជួន ហើយនិងប្តេជ្ញាការពារឱ្យបានជាដាច់ខាតនូវសន្តិភាព ស្ថិរភាពនយោបាយ សន្តិសុខសណ្តាប់ធ្នាប់សង្គម និងទប់ស្កាត់រាល់ការប៉ុនប៉ងបង្កចលាចលនានារបស់ក្រុមប្រឆាំងនិងមជ្ឈដ្ឋានអគតិ ដើម្បីធានាការរស់នៅដោយសុខសាន្តរបស់ប្រជាជន និងប្តេជ្ញាការពារមរតក និងសមិទ្ធផលជាប្រវត្តិសាស្ត្រនានា ជាពិសេសចូលរួមអនុវត្តឱ្យបានម៉ឺងម៉ាត់បំផុត គាំទ្រយ៉ាងពេញទំហឹងចំពោះគម្រោងព្រែកជីកហ្វូណនតេជោ និងគម្រោងនានាដ៏ទៃទៀតដែលថ្នាក់ដឹកនាំគណបក្សប្រជាជនកម្ពុជា បានកសាង និងរក្សាទុកជាមរតកសម្រាប់យុវជនជំនាន់នេះ និងជំនាន់ក្រោយ។ សម្រាប់ឯកឧត្តម មានតែគណបក្សប្រជាជនកម្ពុជាតែមួយប៉ុណ្ណោះដែលអាចរក្សាបាននូវសុខសន្តិភាព នាំនាវាកម្ពុជាឆ្ពោះទៅភាពជឿនលឿនដូចប្រទេសអភិវឌ្ឍនានា។
ជាមួយគ្នានេះ ឯកឧត្តមសន្តិបណ្ឌិត នេត សាវឿន សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ចាម បានគូសបញ្ជាក់ពីព្រឹត្តិការណ៍សំខាន់ៗទាំងជាតិ និងអន្តរជាតិជូនសមាជិក សមាជិកាអង្គពិធីឱ្យបានយល់ និងជ្រួតជ្រាបកាន់តែច្បាស់ដើម្បីពង្រឹងស្មារតីសមាជិកបក្ស និងគ្រួសារបក្សជាដើម។
បន្ថែមពីនេះ ក្នុងនាមជាប្រធានគណៈអធិបតី ឯកឧត្តមសន្តិបណ្ឌិត ក៏បានផ្តល់អនុសាសន៍គន្លឹះៗសំខាន់ៗជូនដល់អង្គពិធីដែលជាសមាជិកសមាជិកាគណបក្សគ្រប់លំដាប់ថ្នាក់ក្នុងខេត្តអំពីទិសដៅភារកិច្ចឆមាសទី២ ឆ្នាំ២០២៤ក្នុងគោលបំណងដើម្បីបន្តពូនជ្រំ ពង្រឹង និងពង្រីកសមាជិកគណបក្ស និងកិត្យានុភាពគណបក្សដើម្បីក្លាយជានាវាដ៏មានប្រសិទ្ធភាពក្នុងការនាំកម្ពុជាទៅរកភាពរុងរឿងជានិច្ចនិរន្ត ៕
