ឯកឧត្ដម សួស ប្រាថ្នា៖ បច្ចុប្បន្នសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ និងក្រុមប្រឹក្សាឃុំ សង្កាត់ មានចំនួនសរុប១៥.៨១៧នាក់

ភ្នំពេញ៖ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានថ្លែងឲ្យដឹងថា បច្ចុប្បន្ន សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ និងក្រុមប្រឹក្សាឃុំ សង្កាត់ មានចំនួនសរុប១៥.៨១៧នាក់ ស្រី៣.២៩៤នាក់ ដែលក្នុងនោះថ្នាក់រាជធានី ខេត្តមានចំនួន៥៥៩នាក់ ស្រី៩៥នាក់ ថ្នាក់ក្រុង ស្រុក ខណ្ឌមានចំនួន៣.៦៣៦នាក់ ស្រី៦៤២នាក់ និងថ្នាក់ឃុំ សង្កាត់មានចំនួន១១.៦២២នាក់ ស្រី២.៥៦៩នាក់។

ក្នុងឱកាសអញ្ជើញផ្ដល់កិច្ចសម្ភាសន៍ ស្ដីពី «វឌ្ឍនភាពការងាររបស់ អគ្គនាយកដ្ឋានរដ្ឋបាល ក្រសួងមហាផ្ទៃ» នាថ្ងៃទី១២ ខែសីហា ឆ្នាំ២០២៤នេះ ឯកឧត្តម សួស ប្រាថ្នា បានមានប្រសាសន៍ថា ក្នុងរយៈពេល៦ខែ ឆ្នាំ២០២៤នេះ អគ្គនាយកដ្ឋានរដ្ឋបាលបានសហការចូលរួមរៀបចំ​ដំណើរការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌអាណត្តិទី៤ បានប្រព្រឹត្ត-ទៅដោយរលូនក្នុងបរិយាកាសសេរី ត្រឹមត្រូវ និងយុត្តិធម៌ ស្របតាមគោលការណ៍លទ្ធិប្រជាធិបតេយ្យ សេរីពហុបក្ស។

ឯកឧត្ដមបន្តថា ជាមួយគ្នានេះ ដើម្បីគាំទ្រដល់ក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៤ ក្នុងការអនុវត្តនូវតួនាទី ភារកិច្ច និងរបៀបរបបបំពេញការងាររបស់ខ្លួនឱ្យស្របតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ អគ្គនាយកដ្ឋានរដ្ឋបាល បានរៀបចំនូវលិខិតបទដ្ឋានគតិយុត្តចំនួន២ រួមមាន៖ (១)សេចក្តីណែនាំ ស្តីពីការរៀបចំបទបញ្ជាផ្ទៃក្នុងក្រុមប្រឹក្សា រាជធានី ខេត្ត ក្រុង ស្រុក ខណ្ឌ និង(២) ប្រកាសស្តីពីការរៀបចំកិច្ចប្រជុំចូលកាន់តំណែង កិច្ចប្រជុំសាមញ្ញលើកទី១ និងកិច្ចប្រជុំសាមញ្ញលើកទី២ របស់ក្រុមប្រឹក្សារាជធានី ខេត្ត ក្រុង ស្រុក ខណ្ឌ។

ទន្ទឹមនេះ អគ្គនាយកដ្ឋានរដ្ឋបាល បានសហការរៀបចំពិធីប្រកាសចូលកាន់តំណែងក្រុមប្រឹក្សា​រាជធានី ខេត្ត ក្រុង ស្រុក ខណ្ឌ អាណត្តិទី៤ បន្ទាប់ពីគ.ជ.ប បានប្រកាសលទ្ធផលជាផ្លូវការ កាលពីថ្ងៃទី៤ ខែមិថុនា ឆ្នាំ២០២៤ ដែលមានក្រុមប្រឹក្សាសរុបចំនួន៤២០០នាក់ ក្នុងនោះក្រុមប្រឹក្សារាជធានី ខេត្ត មានចំនួន៥៥៩នាក់ ក្រុមប្រឹក្សាក្រុង ស្រុក ខណ្ឌ មានចំនួន៣៦៤១នាក់ ប្រកប​ដោយ​​ភាពរលូន ទាន់ពេលវេលា ស្របតាមនីតិវិធីច្បាប់កំណត់ ៕