ឯកឧត្ដម សួស ប្រាថ្នា៖ ៦ខែឆ្នាំនេះ អគ្គនាយកដ្ឋានរដ្ឋបាល បានរៀបចំកិច្ចប្រជុំ និងសិក្ខាសាលានានាជាច្រើន ជាមួយដៃគូអភិវឌ្ឍន៍ ដើម្បីគាំទ្រដល់ការអនុវត្តការងារទីក្រុងឆ្លាត
ភ្នំពេញ៖ ក្នុងឱកាសអញ្ជើញផ្ដល់កិច្ចសម្ភាសន៍ ស្ដីពី «វឌ្ឍនភាពការងាររបស់ អគ្គនាយកដ្ឋានរដ្ឋបាល ក្រសួងមហាផ្ទៃ» នាថ្ងៃទី១២ ខែសីហា ឆ្នាំ២០២៤នេះ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានថ្លែងថា សម្រាប់ការងារទីក្រុងឆ្លាតក្នុងរយៈពេល ៦ខែដើមឆ្នាំ២០២៤ នេះ អគ្គនាយកដ្ឋានរដ្ឋបាលបានរៀបចំកិច្ចប្រជុំ និងសិក្ខាសាលានានាជាមួយដៃគូអភិវឌ្ឍន៍ ដើម្បីគាំទ្រដល់ការអនុវត្តការងារទីក្រុងឆ្លាត ដូចខាងក្រោម៖
-បានរៀបចំសិក្ខាសាលាដើម្បីពិនិត្យនិងកែសម្រួលរបាយការណ៍ស្តីពីការប្រមូលព័ត៌មានបឋមស្តីពីការអនុវត្តការងារទីក្រុងឆ្លាតនៅខេត្តកំពត ដោយមានការគាំទ្រដោយអង្គការ UN-HABITAT និង UNOPS។
-បានធ្វើទស្សនកិច្ចសិក្សាស្តីពីការអភិវឌ្ឍទីក្រុងឆ្លាតនៅប្រទេសថៃ
-បានរៀបចំកិច្ចប្រជុំពិគ្រោះយោបល់ភាពជាដៃគូលើកទី២ ស្តីពីទីក្រុងឆ្លាតនៅកម្ពុជា នៅសណ្ឋាគារកាំបូឌីយ៉ាណា ដោយមានការគាំទ្រដោយអង្គការ UN-HABITAT និង UNOPS
-បានរៀបចំកិច្ចប្រជុំជាមួយរដ្ឋបាលខេត្តព្រះសីហនុស្តីពីការដាក់សំណើរបស់ខេត្តព្រះសីហនុចូលជាសមាជិកបណ្តាញទីក្រុងឆ្លាតអាស៊ាន (ASCN)
-បានចូលរួមប្រជុំពិនិត្យលើខ្លឹមសារកែសម្រួលផែនទីបង្ហាញផ្លូវស្តីពីទីក្រុងឆ្លាត ដែលរៀបចំដោយទីប្រឹក្សាអន្តរជាតិ នៅអង្គការ UNOPS
-បានរៀបចំកិច្ចប្រជុំជាមួយអង្គការ UN ESCAP ដើម្បីពិភាក្សាអំពីកិច្ចសហ-ប្រតិបត្តិការគាំទ្រ លើការងារទីក្រុងឆ្លាត និងដំណើរការជ្រើសរើសទីប្រឹក្សាបច្ចេកទេសសម្រាប់រៀបចំគោលនយោបាយទីក្រុងឆ្លាត
-បានរៀបចំសិក្ខាសាលាឆ្លុះបញ្ចាំងស្តីពីការអភិវឌ្ឍទីក្រុងឆ្លាតនៅខេត្តសៀមរាប ដោយមានការគាំទ្រដោយអង្គការ UN-HABITAT និង UNOPS
-បានរៀបចំប្រជុំក្រុម Smart City Task Force ដើម្បីប្រជុំពិនិត្យ និងផ្តល់យោបល់លើការកែសម្រួលផែនទីបង្ហាញផ្លូវស្តីពីទីក្រុងឆ្លាត
-បានរៀបចំប្រជុំជាមួយក្រុមហ៊ុនធុរវឌ្ឍន៍ ស្តីពីការរៀបចំមជ្ឈមណ្ឌលទីក្រុងឆ្លាតនៅរាជធានី ភ្នំពេញ (Phnom Penh Smart City Hub) ។
ដោយឡែកចំពោះការងារផ្តល់គ្រឿងឥស្សរិយយស និងមេដាយស្ថាបនាជាតិ អគ្គនាយកដ្ឋានរដ្ឋបាល បានលើកសំណើសុំរាជរដ្ឋាភិបាលកម្ពុជា ដើម្បីផ្តល់គោរមងារជាឧកញ៉ាចំនួន០២រូប និងផ្តល់គ្រឿងឥស្សរិយយស(មេដាយចំរុះសរុបចំនួន៨៤៨គ្រឿង មេដាយស្ថាបនាជាតិសរុបចំនួន២២៨គ្រឿង និងមេដាយការងារសរុបចំនួន២៥៧គ្រឿង) ដើម្បីសម្តែងនូវការដឹងគុណ និងលើកទឹកចិត្តដល់មន្ត្រីរាជការ និងសប្បុរសជននានាដែលបានចំណាយថវិកាផ្ទាល់ខ្លួនជួយកសាង និងអភិវឌ្ឍប្រទេសជាតិសរុប ៧១.០២៨.៧៨៤ ដុល្លារអាម៉េរិក ៕
