ឯកឧត្ដម សួស ប្រាថ្នា៖ ៦ខែ ឆ្នាំនេះ អគ្គនាយកដ្ឋានរដ្ឋបាល រៀបចំដំណើរការសម្រេចចុះឈ្មោះសមាគម អង្គការមិនមែនរដ្ឋាភិបាល និងសហគមន៍ជនជាតិដើមភាគតិចបានចំនួន ១១៤
ភ្នំពេញ៖ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានឲ្យដឹងថា ក្នុងរយៈពេល៦ខែ ឆ្នាំ២០២៤នេះ អគ្គនាយកដ្ឋានបានរៀបចំដំណើរការសម្រេចចុះឈ្មោះសមាគម អង្គការមិនមែនរដ្ឋាភិបាល និងសហគមន៍ជនជាតិដើមភាគតិចបានចំនួន ១១៤ (សមាគម ៧៦ អង្គការមិនមែនរដ្ឋាភិបាល ៣៨ សហគមន៍ជនជាតិដើមភាគតិច ០) ព្រមទាំងលុបឈ្មោះចេញពីបញ្ជីសមាគម និងអង្គការមិនមែនរដ្ឋាភិបាលមានចំនួន ៣២ (សមាគម១៥ អង្គការមិនមែនរដ្ឋា- ភិបាល ១៧)។
ក្នុងឱកាសអញ្ជើញផ្ដល់កិច្ចសម្ភាសន៍ ស្ដីពី «វឌ្ឍនភាពការងាររបស់ អគ្គនាយកដ្ឋានរដ្ឋបាល ក្រសួងមហាផ្ទៃ» នាថ្ងៃទី១២ ខែសីហា ឆ្នាំ២០២៤នេះ ឯកឧត្តម សួស ប្រាថ្នា បានបញ្ជាក់ថា សមាគម និងអង្គការមិនមែនរដ្ឋាភិបាលក្នុងស្រុក ដែលបានចុះឈ្មោះក្នុងបញ្ជីនៅក្រសួងមហាផ្ទៃ មានចំនួនសរុប ៦.៣៧៤ (សមាគម ២.៨១៩ អង្គការមិនមែនរដ្ឋាភិបាល ៣.៥៥៥)។
ឯកឧត្ដមបញ្ជាក់ថា ទន្ទឹមនេះ អគ្គនាយកដ្ឋានរដ្ឋបាល បានបិទបញ្ចប់ការចុះធ្វើជំរឿនសមាគម និងអង្គការមិនមែនរដ្ឋាភិបាលក្នុងស្រុក ដោយបានធ្វើការបូកសរុប និងបញ្ចូលទិន្នន័យទៅក្នុងប្រព័ន្ធគ្រប់គ្រងព័ត៌មានវិទ្យា និងគោរពស្នើសុំគោលការណ៍ពិនិត្យ សម្រេចពីឯកឧត្តម អភិសន្តិបណ្ឌិត ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដោយទទួលបានលទ្ធផលដូចខាងក្រោម៖
-បានស្វែងរកឃើញសមាគម និងអង្គការមិនមែនរដ្ឋាភិបាលក្នុងស្រុកកំពុងដំណើរការចំនួន១.៣២៧ ស្មើនឹង២១,៦១% (សមាគមចំនួន៦៤៧ ស្មើនឹង២៣,៩៧% និងអង្គការចំនួន៦៨០ ស្មើនឹង១៩,៧៦%)
-បានស្វែងរកឃើញអាសយដ្ឋាន និងទីស្នាក់ការកណ្តាលរបស់សមាគម និងអង្គការមិនមែនរដ្ឋាភិបាលក្នុងស្រុក ប៉ុន្តែមិនបើកដំណើរការចំនួន៥១៩ ស្មើនឹង៨,៤៥% (សមាគមចំនួន២៣៦ ស្មើនឹង៨,៧៤% និងអង្គការចំនួន២៨៣ ស្មើនឹង៨,២២%
-ស្វែងរកមិនឃើញអាសយដ្ឋាន ទីស្នាក់ការកណ្តាលរបស់សមាគម និងអង្គការមិនមែនរដ្ឋាភិបាល ក្នុងស្រុកចំនួន៤.២៩៤ ស្មើនឹង៦៩,៩៣% (សមាគមចំនួន១.៨១៦ ស្មើនឹង៦៧,២៨% និងអង្គការចំនួន២.៤៧៨ ស្មើនឹង៧២,០១%)
សរុបលទ្ធផលនៃការធ្វើជំរឿនសមាគម និងអង្គការមិនមែនរដ្ឋាភិបាលក្នុងស្រុក មានចំនួនសរុប៦.១៤០ លើចំនួនសរុប៦.៣៦៣ ស្មើនឹង៩៨,៩៨% (សមាគមចំនួន២.៦៩៩ លើចំនួនសរុប២.៧៤៨ ស្មើនឹង៩៨,២២% និងអង្គការចំនួន៣.៤៤១ លើចំនួនសរុប៣.៤៥៥ ស្មើនឹង៩៩,៥៩%)ដែលបានចុះបញ្ជីនៅក្រសួងមហាផ្ទៃ។
ជាមួយគ្នានោះដែរឯកឧត្ដម សួស ប្រាថ្នា បានលើកឡើងថា បច្ចុប្បន្ន គណបក្សនយោបាយបង្កើត និងចុះឈ្មោះបញ្ជីនៅក្រសួងមហាផ្ទៃសរុបមានចំនួន៤៧គណបក្ស ក្នុងនោះគណបក្សនយោបាយបានចុះឈ្មោះក្នុងបញ្ជីមានចំនួន៤៦ និងគណបក្សនយោបាយទើបអនុញ្ញាតឱ្យបង្កើតថ្មីមានចំនួន១។ ក្នុងរយៈពេល៦ខែដើមឆ្នាំ២០២៤ អគ្គនាយក-ដ្ឋានបានរៀបចំ និងស្នើសុំគោលការណ៍ដល់ថ្នាក់ដឹកនាំក្នុងការសម្រេចអនុញ្ញាតឱ្យបង្កើតគណបក្សនយោបាយចំនួន០១ ចុះឈ្មោះក្នុងបញ្ជីគណបក្សចំនួន ០២ និងលុបឈ្មោះចេញពីបញ្ជីគណបក្សចំនួន 0១ ៕
