គយ បង្ក្រាប និងដុតបំផ្លាញចោលសាច់បង្កក ១៤មុខ មានទម្ងន់ជាង ៦តោន នៅខេត្តកំពង់ស្ពឺ
ភ្នំពេញ៖ សាច់បង្កកប្រមាណជាង៦តោន ត្រូវបានកម្លាំង មន្ត្រីសាខាគយនិងរដ្ឋាករខេត្តកំពង់ស្ពឺ ដុតបំផ្លាញចោល នារសៀលថ្ងៃទី១២ ខែសីហា ឆ្នាំ២០២៤ ក្រោយស្ទាក់ចាប់បានកាលពីវេលាម៉ោង៩យប់ថ្ងៃទី១១ ខែសីហា ឆ្នាំ២០២៤ នៅចំណុចផ្លូវចុះផ្លូវល្បឿនលឿនខាងលិច ស្ថិតក្នុងឃុំមហាសាំង ស្រុកភ្នំស្រួច ខេត្តកំពង់ស្ពឺ។
លោក ឈួន ហៃ ប្រធានសាខាគយនិងរដ្ឋាករខេត្តកំពង់ស្ពឺ បានឱ្យដឹងថា ដោយទទួលបានព័ត៌មានថា មានរថយន្តដឹកទំនិញមួយគ្រឿង ពាក់ផ្លាកលេខ ភ្នំពេញ 2BS-3550 ដឹកសាច់បង្កកទិសដៅពីភ្នំពេញទៅខេត្តព្រះសីហនុ តាមផ្លូវល្បឿនលឿន លោកក៏បានបញ្ជាមន្ត្រីគយ និងរដ្ឋាករ សហការជាមួយកម្លាំងកងរាជអាវុធហត្ថខេត្តកំពង់ស្ពឺ ចុះទៅគោលដៅដែលចង្អុលបង្ហាញនោះ។
នៅវេលាម៉ោងជាង៩យប់ថ្ងៃខែឆ្នាំដដែល មន្ត្រីគយ ក៏បានជួបរថយន្តខាងលើបែកកង់ នៅចំណុចគីឡូម៉ែត្រលេខ K31+800 ស្ថិតនៅភូមិជ្រលងថ្កូវ ឃុំរលាំងចេក ស្រុកសំរោងទង ខេត្តកំពង់ស្ពឺ ក្រឡាប់ចាក់ទំនិញជាសាច់បង្កករាយនៅពេញផ្លូវ ដោយមាននគរបាលចរាចរណ៍នៃនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណ: ប្រចាំផ្លូវល្បឿនលឿនភ្នំពេញ-ក្រុងព្រះសីហនុ កំពុងអនុវត្តនីតិវិធីចរាចរណ៍។
ក្រោយកើតហេតុមន្រ្តីគយ ក៏បានស្នើសុំកិច្ចសហការពីមន្រ្តីនគរបាលចរាចរណ៍នៃនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណ: ដែលប្រចាំការលើផ្លូវល្បឿនលឿន។ សាច់បង្កកដែលផ្ទុកលើរថយន្តខាងលើសាងដាក់លើរថយន្តផ្សេង ហើយនាំយកមកសាខាគយនិងរដ្ឋាករខេត្តកំពង់ស្ពឺ ដោយអនុវត្តនីតិវិធីជាធរមាន។
លទ្ធផលត្រួតពិនិត្យដូចខាងក្រោម៖
ទី១-ពងត្រីបង្កកចំនួន ១០០កេស ទី២-ប្រហិតសាច់មាន់បំពងម្សៅចំនួន ៤០កេស ទី៣-ប្រហិត SHENGLONG ចំនួន ៤៥កេស ទី៤-ប្រហិតបន្ទះសាច់មាន់បំពងម្សៅចំនួន ៤៦កេស ទី៥-សាច់មាន់ចង្កាក់ប្រឡាក់គ្រឿងចំនួន ២៤កេស ទី៦-ឈាមទាចំនួន ៤៩កេស ទី៧-ពោះគោចំនួន ៥កេស ទី៨- ព្រុយត្រីសាម៉ុនចំនួន ៤កេស ទី៩-កន្ទុយជ្រូកចំនួន ២៤កេស ទី១០-សាច់មាន់ចំនួន ២៩កេស ទី១១-សាច់គោចំនួន ៤០កេស ទី១២-ក្រលៀនគោចំនួន ២កេស ទី១៣-ពោះវៀនជ្រូកចំនួន ១០កេស ទី១៤-ឆ្អឹងជំនីជ្រូកចំនួន ២០កេស សរុបទាំងអស់ចំនួន ៤៣៨កេស ស្មើនឹង ៦១៩៩គីឡូក្រាម។
ក្រោយកិច្ចសហការពីមន្ត្រីជំនាញក.ប.ប បានពិនិត្យឃើញថា សាច់បង្កកបានទាំង ១៤មុខខាងលើ មន្រ្តីក.ប.ប បានធ្វើពិសោធន៍បញ្ជាក់ថា សាច់បង្កកខាងលើខូចគុណភាពមិនអាចឱ្យចរាចរណ៍ លើទីផ្សារឡើយ។
សាខាគយនិងរដ្ឋាករខេត្តកំពង់ស្ពឺ មន្រ្តីជំនាញ ក.ប.ប និងកម្លាំងកងរាជហត្តខេត្តកំពង់ស្ពី និង សមត្ថកិច្ច ពាក់ព័ន្ធ សម្រេចធ្វើការដុតកំទេចចោលនៅរសៀលថ្ងៃទី១២ ខែសីហា ឆ្នាំ២០២៤តែម្តង និងដោយមានការចូលរួមពីអាជ្ញាធរដែនដី ៕
