អភិបាលរងខេត្តក្រចេះ៖ ការប្រគល់វិញ្ញាបនបត្រសម្គាល់ម្ចាស់អចលនវត្ថុ ជាការឆ្លុះបញ្ចាំងឱ្យឃើញ អំពីការយកចិត្តទុកដាក់របស់រាជរដ្ឋាភិបាល ក្នុងការធានាកម្មសិទ្ធិដីធ្លី ស្របច្បាប់ជូនពលរដ្ឋ

ភ្នំពេញ៖ នៅព្រឹកថ្ងៃអង្គារ ៩កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៣ ខែសីហា ឆ្នាំ២០២៤ លោក ហេង សុថា អភិបាលរងខេត្តក្រចេះ បានអញ្ជើញជាអធិបតីភាពក្នុងពិធីប្រគល់វិញ្ញាបនបត្រសម្គាល់ម្ចាស់អចលនវត្ថុចំនួន១,២៣៤បណ្ណ ជូនប្រជាពលរដ្ឋចំនួន២ភូមិ គឺភូមិធំ និងភូមិសណ្ដាន់ ក្នុងឃុំសណ្ដាន់ ស្រុកសំបូរ ខេត្តក្រចេះ។

លោក ហេង សុថា អភិបាលរងខេត្តក្រចេះ បានបញ្ជាក់ឲ្យដឹងថា ក្រោមការដឹកនាំរបស់រាជរដ្ឋាភិបាលនីតិកាលទី៧ នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវយុទ្ធសាស្ត្រ បញ្ចកោណ ដំណាក់កាលទី១ ដែលនឹងបន្តដំណើរការកែទម្រង់ដីធ្លី ដោយជំរុញការចុះបញ្ជីដីធ្លី និងការដោះស្រាយវិវាទដីធ្លីក្រៅប្រព័ន្ធតុលាការ សំដៅគ្រប់គ្រងនិងអភិវឌ្ឍវិស័យដីធ្លី ឱ្យបានត្រឹមត្រូវ និងកាន់តែមានប្រសិទ្ធភាព។

លោកអភិបាលរងខេត្ត បានបន្តថា ការប្រគល់វិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង) នេះគឺជាការឆ្លុះបញ្ចាំងឱ្យឃើញ អំពីការយកចិត្តទុកដាក់ខ្ពស់របស់រាជរដ្ឋាភិបាល ក្នុងការធានាកម្មសិទ្ធិដីធ្លី ស្របច្បាប់ជូនប្រជាពលរដ្ឋ សំដៅលើកកម្ពស់ជីវភាព សុខុមាលភាព កាត់បន្ថយជម្លោះដីធ្លី និងការកាត់បន្ថយភាពក្រីក្រផងដែរ។ ដូច្នេះសូមបងប្អូនត្រូវចេះថែរក្សាទុកដាក់ឱ្យមានសុវត្ថិភាព និងគង់វង្ស ដើម្បីជាប្រយោជន៍តកូនចៅ និងត្រូវប្រើប្រាស់ជាប្រយោជន៍ឱ្យចំគោលដៅ ជៀសវាងខាតបង់ទ្រព្យកម្រ និងមានតម្លៃសម្រាប់សង្គមគ្រួសារ។

ក្នុងឱកាសនោះ លោក ហេង សុថា បានសម្តែងនូវទឹកចិត្តរីករាយ និងថ្លែងអំណរគុណយ៉ាងជ្រាលជ្រៅចំពោះការចូលរួមយ៉ាងផុសផុល ពីសំណាក់អាជ្ញាធរមូលដ្ឋាននិងប្រជាពលរដ្ឋទូទាំងខេត្តក្រចេះទាំងអស់ ដែលបានចូលរួមនិងសម្តែងអបអរសាទរយ៉ាងក្លៀវក្លាដល់ពិធីបើកការដ្ឋាន ព្រែកជីកហ្វូណនតេជោ កាលពីថ្ងៃទី៥ ខែសីហា កន្លងទៅ ដែលជាគម្រោងជាប្រវត្តិសាស្រ្តរបស់កម្ពុជា ដែលនឹងផ្តល់ផលប្រយោជន៍សេដ្ឋកិច្ចយ៉ាងធំធេងដល់ប្រទេសជាតិ និងប្រជាជនយើងទាំងអស់គ្នា។ និងសូមឱ្យបងប្អូនបន្តចូលរួមគាំទ្រនៅការអនុវត្តតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម ដែលជាឧត្តមប្រយោជន៍ធំធេងរបស់ប្រជាជាតិ និងប្រជាជន ក្នុងគោលបំណងសំខាន់តែមួយគត់គឺ ដើម្បីជំរុញការអភិវឌ្ឍនិងលើកកម្ពស់ជីវភាពរបស់ប្រជាពលរដ្ឋនៅតាមតំបន់ជាប់ព្រំដែនរបស់ប្រទេសទាំង៣ ហើយសូមកុំឱ្យមានការភាន់ច្រឡំជឿតាមការញុះញង់ ពីក្រុមមួយចំនួនដែលមានបំណងមិនល្អចំពោះការអនុវត្តគម្រោងអភិវឌ្ឍន៍របស់រដ្ឋាភិបាលយើង ៕