កងទ័ពជើងគោកកម្ពុជា និងកងស្វ័យការពារជើងគោកជប៉ុន នឹងបន្តពង្រឹងកិច្ចសហប្រតិបត្តិការទ្វេភាគី ដោយផ្តោតលើការពង្រឹងសមត្ថភាពទ័ព ការហ្វឹកហ្វឺនរួមគ្នាផ្នែកប្រឆាំងភេរវកម្ម បោសសម្អាតមីន និងសង្រ្គោះគ្រោះមហន្តរាយ
ភ្នំពេញ៖ នៅថ្ងៃទី១៣ ខែសីហា ឆ្នាំ២០២៤ ក្នុងឱកាសចូលរួមសិក្ខាសាលាគ្រប់គ្រងកងទ័ពជើងគោក នៃប្រទេសក្នុងតំបន់ឥណ្ឌូប៉ាស៊ីហ្វិក ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានជួបពិភាក្សាការងារទ្វេភាគីជាមួយ ឯកឧត្តម នាយឧត្តមសេនីយ៍ YASUNORI MORISHITA មេបញ្ជាការកងស្វ័យការពារជើងគោកជប៉ុន។
ក្នុងជំនួបនេះ ឯកឧត្តម នាយឧត្តមសេនីយ៍ ម៉ៅ សុផាន់ និង ឯកឧត្តម នាយឧត្តមសេនីយ៍ YASUNORI MORISHITA បានធ្វើការវាយតម្លៃខ្ពស់ចំពោះកិច្ចសហប្រតិបត្តិការរទ្វេភាគី រវាងកងទ័ពជើងគោក កម្ពុជា- ជប៉ុន នាពេលកន្លងមក និងបានផ្តល់អំពីសារៈសំខាន់ នៃការជួបសន្ទនាគ្នាដោយផ្ទាល់ ទ្វេភាគី និងពហុភាគី ដើម្បីលើកកម្ពស់ទំនាក់ទំនង និងកិច្ចសហប្រតិបត្តិការឱ្យកាន់តែល្អប្រសើរថែមទៀត។
សមភាគីទាំងពីរ បានឯកភាពបន្តពង្រឹងកិច្ចសហប្រតិបត្តិការទ្វេភាគី ដោយផ្តោតលើការពង្រឹងសមត្ថភាពទ័ព ការហ្វឹកហ្វឺនរួមគ្នាផ្នែកប្រឆាំងភេរវកម្ម បោសសម្អាតមីន និងសង្រ្គោះគ្រោះមហន្តរាយ ៕
