ព្រឹកនេះ! សម្ដេចធិបតី ហ៊ុន ម៉ាណែត អញ្ជើញសំណេះសំណាលជាមួយអាចារ្យ អាចារិនី លើកទី៩

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា នាព្រឹកថ្ងៃព្រហស្បតិ៍ ១១កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៥ ខែសីហា ឆ្នាំ២០២៤នេះ បានអញ្ជើញជាអធិបតី ក្នុងពិធីសំណេះសំណាលជាមួយអាចារ្យ អាចារិនី លើកទី៩ នៅវិទ្យាស្ថានជាតិអប់រំ។

បច្ចុប្បន្នឯកសារគោលដែលក្រសួងធម្មការនិងសាសនាបានចងក្រងសម្រាប់ការបើកវគ្គបណ្តុះបណ្តាល តួនាទីភារកិច្ច និងក្រមសីលធម៌អាចារ្យ អាចារិនី គឺដកស្រង់មកពី គម្ពីរព្រះត្រៃបិដកខ្មែរ វចនានុក្រមខ្មែរភាគ១ ភាគ២ របស់សម្តេចព្រះសង្ឃរាជ ជួន ណាត ក្រមរដ្ឋប្បវេណីឆ្នាំ២០០៧ សៀវភៅក្បួនអាពាហ៍ពិពាហ៍ របស់អ្នកឧកញ៉ាមហាមន្រ្តី ញិក នូវ ក្បួនទម្រង់ការអាពាហ៍ពិពាហ៍ របស់ឧត្តមប្រីជា ចាប ពិន កម្រងអត្ថបទឧទ្ទេសាចារ្យ របស់ក្រសួងធម្មការនិងសាសនា ឯកសារទស្សនាវដ្តីកម្ពុជសុរិយា សៀវភៅអរិយធម៌ របស់លោកស្រី ត្រឹង ងា និងលិខិតបទដ្ឋាននានាដែលមានខ្លឹមសារពាក់ព័ន្ធជាដើម។

ទោះបីជាក្រសួងធម្មការនិងសាសនាខិតខំអនុវត្តតាមអនុសាសន៍ណែនាំរបស់ប្រមុខរាជរដ្ឋាភិបាលដោយបានបើកវគ្គបណ្តុះបណ្តាលតួនាទី ភារកិច្ច និងក្រមសីលធម៌អាចារ្យខ្មែរ ជាបន្តបន្ទាប់កន្លងមកក្តីក៏នៅតែមិនទាន់មានការឯកភាពគ្នាទាំងស្រុងក្នុងការដឹកនាំពិធីកម្មនានារបស់លោកអាចារ្យនៅឡើយ ព្រោះប្រពៃណីទំនៀមទម្លាប់ខ្មែរមានភាពសម្បូរបែបណាស់ ហើយខុសៗគ្នា ទៅតាមតំបន់ ភូមិ ស្រុករៀងៗខ្លួន ម្យ៉ាងទៀតដោយសារប្រទេសកម្ពុជាយើងបានឆ្លងកាត់សង្គ្រាមជាច្រើនលើក ធ្វើឱ្យគម្ពីរក្បួនខ្នាត ធនធានព្រឹទ្ធាចារ្យ បញ្ញវន្ត។ល។ ដែលជាមូលធនដ៏សំខាន់សម្រាប់សាសនា ប្រពៃណីទំនៀមទម្លាប់ត្រូវបានបាត់បង់។

ដើម្បីដោះស្រាយនូវបញ្ហាប្រឈមទាំងនេះ ក្រសួងធម្មការនិងសាសនាបាននិងកំពុងធ្វើការពិគ្រោះយោបល់ជាមួយក្រុមឧទ្ទេសាចារ្យ ស្វែងរកធនធានព្រឹទ្ធាចារ្យនិងបញ្ញវន្ត ដែលមានចំណេះដឹងច្បាស់លាស់ផ្នែកធម៌វិន័យព្រះពុទ្ធសាសនា និងគម្ពីរក្បួនខ្នាត ទម្រង់ប្រពៃណីទំនៀមទម្លាប់ ដើម្បីធ្វើបច្ចុប្បន្នភាព កម្មវិធីសិក្សារបស់អាចារ្យ អាចារិនី កែសម្រួលបំពេញបន្ថែមនូវចំណុចខ្វះខាតមួយចំនួនដែលនៅមិនទាន់មានសង្គតិភាពគ្នាទាំងស្រុង ទាំងពិធីសាសនានិងទម្រង់ពិធីមង្គលនានា ធ្វើឱ្យក្លាយទៅជាកម្មវិធីសិក្សារបស់ អាចារ្យ អាចារិនី មួយ មានលក្ខណៈត្រឹមត្រូវនិងឯកភាពជាទម្រង់តែមួយស្របតាមការវិវត្តសង្គម ប៉ុន្តែ មិនប្រាសចាកនូវខ្លឹមសារនៃសាសនពិធីនិងទម្រង់ពិធីមង្គលផ្សេងៗ ដែលជាកេរ្តិ៍ដំណែលរបស់ដូនតាបានបន្សល់ទុក។

សូមបញ្ជាក់ថា វគ្គបណ្តុះបណ្តាលតួនាទី ភារកិច្ច និងក្រមសីលធម៌អាចារ្យខ្មែរ ដែលដឹកនាំនិងគ្រប់គ្រងដោយក្រសួងធម្មការនិងសាសនា ត្រូវបានបដិសន្ធិឡើងក្រោមគំនិតផ្តួចផ្តើមដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន កាលពីឆ្នាំ២០០៩ ដោយកាលណោះ សម្តេចតេជោ បានមើលឃើញការរៀបចំពិធីអាពាហ៍ពិពាហ៍ និងពិធីបុណ្យទានផ្សេងៗ ខុសៗគ្នា របស់អាចារ្យដែលជាអ្នកដឹកនាំកម្មវិធី បង្កើតឱ្យមានការជជែកវែកញែករកខុសរកត្រូវមិនដាច់ស្រេច។ សម្តេចតេជោ យល់ថា នេះជាវិបត្តិអាចារ្យខ្មែរ ហើយនឹងក្លាយជាវិបត្តិកាន់តែធ្ងន់ធ្ងរ ប្រសិនបើមិនគិតគូរទប់ស្កាត់ទាន់ពេលវេលា។ ហេតុនេះទើបនៅថ្ងៃទី៩ ខែតុលា ឆ្នាំ២០០៩ សម្តេចតេជោ បានផ្តល់អនុសាសន៍ណែនាំដ៏ខ្ពង់ខ្ពស់ដល់ក្រសួងធម្មការនិងសាសនា ដើម្បីបង្កើតជាវគ្គបណ្តុះបណ្តាលតម្រង់ទិសអាចារ្យទូទាំងប្រទេសឱ្យមានការឯកភាពគ្នា យោគយល់គ្នាលើការដឹកនាំពិធីកម្មសាសនានិងពិធីមង្គលនានា ធ្វើយ៉ាងណាកុំឱ្យមានវិបត្តិអាចារ្យកើតឡើង។ បន្ទាប់ពីទទួលបានអនុសាសន៍ណែនាំដ៏ខ្ពង់ខ្ពស់បំផុតរបស់ សម្តេចតេជោ មក ក្រសួងធម្មការនិងសាសនា បានខិតខំស្វែងរកធនធានចាស់ព្រឹទ្ធាចារ្យ និងលោកអាចារ្យដែលមានចំណេះដឹង អាចចងចាំច្បាស់លាស់នូវពិធីកម្ម ចេះចាំទំនៀមស្រុកទេស ដែលមានសមត្ថភាពជំនាញខ្ពស់ មានបទពិសោធន៍យូរឆ្នាំ ដើម្បីប្រជុំរៀបចំ ពិគ្រោះយោបល់ ពិភាក្សាអំពីការបើកវគ្គបណ្តុះបណ្តាលតួនាទី ភារកិច្ច និងក្រមសីលធម៌អាចារ្យខ្មែរ នេះឡើង ដែលអាចផ្តល់ឱកាសឱ្យអាចារ្យ អាចារិនីទូទាំងប្រទេសបានចូលរួមសិក្សាឈ្វេងយល់ ផ្លាស់ប្តូរចំណេះដឹង ចំណេះធ្វើ និងបទពិសោធន៍គ្នាទៅវិញទៅមកលើទម្រង់ពិធីកម្មផ្សេងៗ ដែលមាននៅតាមមូលដ្ឋានភូមិស្រុក ក្នុងព្រះរាជាណាចក្រកម្ពុជា ៕