រដ្ឋសភាថៃ នឹងបោះឆ្នោតជ្រើសរើសនាយករដ្ឋមន្ត្រីថ្មី នៅថ្ងៃទី ១៦ ខែសីហា
បាងកក៖ សភាថៃបានឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃទី១៤ ខែសីហាថា សភាតំណាងរាស្រ្តថៃនឹងកោះប្រជុំនៅថ្ងៃទី១៦ ខែសីហា ដើម្បីជ្រើសរើសនាយករដ្ឋមន្ត្រីថ្មីបន្ទាប់ពីការបណ្តេញនាយករដ្ឋមន្ត្រី លោក សេដ្ឋា ថាវីសុីន ដោយតុលាការធម្មនុញ្ញ។
ការបោះឆ្នោតនឹងប្រព្រឹត្តទៅនៅម៉ោង១០ព្រឹក។ សម្ព័ន្ធកាន់អំណាចនឹងបើកកិច្ចប្រជុំនៅថ្ងៃទី១៥ ខែសីហា ដើម្បីជ្រើសរើសបេក្ខភាពរបស់ខ្លួន។
ប្រធានការិយាល័យនាយករដ្ឋមន្ត្រីថៃក៏បានបញ្ជាក់ដែរថា សភាតំណាងរាស្ត្រនឹងជួបប្រជុំនៅថ្ងៃទី១៦ ខែសីហា ដើម្បីជ្រើសរើសនាយករដ្ឋមន្ត្រីថ្មី។
យោងតាមច្បាប់របស់សភាថៃ បេក្ខជនដែលត្រូវបានតែងតាំងជានាយករដ្ឋមន្ត្រីត្រូវតែឈ្នះសំឡេងគាំទ្រលើសពីពាក់កណ្តាលនៃសភាតំណាងរាស្រ្ត ដែលបច្ចុប្បន្នមានសមាជិកចំនួន ៤៩៣រូប។
កាលពីថ្ងៃទី១៤ ខែសីហា តុលាការធម្មនុញ្ញថៃក៏បានសម្រេចដកលោកនាយករដ្ឋមន្ត្រី សេដ្ឋា ថាវីសុីន ពីតំណែងពីបទរំលោភរដ្ឋធម្មនុញ្ញក្នុងការតែងតាំងមន្ត្រីគណៈរដ្ឋមន្ត្រី។
លោក សេដ្ឋា ថាវីសុីន បានប្រកាសថា ឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្ម លោក Phumtham Wechayacha នឹងក្លាយជានាយករដ្ឋមន្ត្រីបណ្តោះអាសន្ន។ ក្នុងករណីលោក Phumtham មិនអាចទទួលការងារបាន តំណែងនឹងត្រូវប្រគល់ឱ្យទៅលោក Suriya Juangroongruangkit ឧបនាយករដ្ឋមន្ត្រីម្នាក់ទៀត។
