អាមេរិក ជួបសមាជិកនៃចលនាប្រឆាំងរបបសឹកមីយ៉ាន់ម៉ា ដោយសន្យាថានឹងពង្រីកការគាំទ្រដោយផ្ទាល់ ដើម្បីជួយដល់ការផ្លាស់ប្ដូរទៅកាន់រដ្ឋាភិបាលស៊ីវិល
វ៉ាស៊ីនតោន៖ ក្រសួងការបរទេសសហរដ្ឋអាម៉េរិក បានឱ្យដឹងថា មន្ត្រីសហរដ្ឋអាម៉េរិកបានជួបគ្នាតាមប្រព័ន្ធអនឡាញជាមួយសមាជិកនៃចលនាប្រឆាំងរបបសឹកមីយ៉ាន់ម៉ាកាលពីថ្ងៃសុក្រទី ១៦ ខែសីហា ហើយបានសន្យាថានឹងពង្រីកការគាំទ្រដោយផ្ទាល់ដើម្បីជួយដល់ការផ្លាស់ប្ដូរទៅកាន់រដ្ឋាភិបាលស៊ីវិល និងយល់ព្រមលើតម្រូវការដើម្បីរក្សាសម្ពាធលើរបបយោធា។
សេចក្តីថ្លែងការណ៍របស់សហរដ្ឋអាម៉េរិក បានបង្ហាញថា កិច្ចប្រជុំនៅថ្ងៃសុក្រពាក់ព័ន្ធនឹងទីប្រឹក្សាក្រសួងការបរទេស លោក ថម ស៊ូលីវ៉ាន់ (Tom Sullivan) ជំនួយការអ្នកគ្រប់គ្រងទីភ្នាក់ងារសហរដ្ឋអាម៉េរិកសម្រាប់ការអភិវឌ្ឍអន្តរជាតិ (USAID) លោក មីឆែល ស៊ីហ្វហ្វឺរ (Michael Schiffer) និងសមាជិកនៃរដ្ឋាភិបាលរួបរួមជាតិដែលគាំទ្រលទ្ធិប្រជាធិបតេយ្យរបស់ប្រទេសមីយ៉ាន់ម៉ា ក្រុមប្រឹក្សាប្រឹក្សាឯកភាពជាតិ និងអង្គការតស៊ូសំខាន់ៗ សហភាពជាតិការ៉ែន គណបក្សវឌ្ឍនភាពជាតិការ៉ែន និងរណសិរ្សជាតិឈីន។
នៅក្នុងកិច្ចប្រជុំ លោក ស៊ូលីវ៉ាន់ និងក្រុមប្រឆាំងយោធាមីយ៉ាន់ម៉ា បានព្រមព្រៀងគ្នាលើសារសំខាន់នៃការរក្សាសម្ពាធលើរបបយោធា។ មន្ត្រីសហរដ្ឋអាម៉េរិកក៏បាននិយាយផងដែរថា រដ្ឋធានីវ៉ាស៊ីនតោននឹងបន្តពង្រីកការគាំទ្រដោយផ្ទាល់ និងជំនួយដល់តួអង្គគាំទ្រលទ្ធិប្រជាធិបតេយ្យ ដើម្បីជួយកសាងភាពស្អិតល្មួតរបស់ពួកគេ បង្កើនសមត្ថភាពរបស់ពួកគេក្នុងការផ្ដល់សេវាសាធារណៈសំខាន់ៗ និងជំនួយមនុស្សធម៌ដល់អ្នកដែលត្រូវការជំនួយ។ បន្ថែមពីនោះ ភាគីទាំងពីរបានសន្យាថានឹងធ្វើការរួមគ្នាជាមួយសហគមន៍អន្តរជាតិ រួមទាំងតំណាងពិសេសប្រចាំប្រទេសមីយ៉ាន់ម៉ាពីអង្គការសហប្រជាជាតិ និងសមាគមប្រជាជាតិអាស៊ីអាគ្នេយ៍ ដើម្បីបញ្ចប់វិបត្តិនេះ។
ព័ត៌មាននៃកិច្ចប្រជុំនេះបានលេចឡើងបន្ទាប់ពីគូប្រជែងក្នុងតំបន់របស់រដ្ឋធានីវ៉ាស៊ីនតោន មហាយក្សចិនបានជំរុញឱ្យប្រទេសជិតខាងជួយមីយ៉ាន់ម៉ាសម្រេចបាននូវដំណើរការសន្តិភាព និងការផ្សះផ្សា នៅពេលដែលរដ្ឋមន្ត្រីការបរទេសចិនជួបសមភាគីឡាវ មីយ៉ាន់ម៉ា និងថៃ។ ប្រព័ន្ធផ្សព្វផ្សាយរដ្ឋរបស់មីយ៉ាន់ម៉ា បានរាយការណ៍កាលពីថ្ងៃព្រហស្បតិ៍ថា ប្រទេសចិនបានសន្យាថានឹងគាំទ្រផ្នែកបច្ចេកទេសដើម្បីធ្វើជំរឿន បន្ទាប់មកការបោះឆ្នោត ជាសញ្ញាបង្ហាញពីការគាំទ្ររបស់រដ្ឋធានីប៉េកាំងចំពោះរបបយោធាដែលកំពុងប្រឈមនឹងការបះបោរប្រដាប់អាវុធ និងការបាត់បង់ទឹកដីជាលំដាប់។
គួរបញ្ជាក់ថា មីយ៉ាន់ម៉ាបានស្ថិតក្នុងភាពចលាចលចាប់តាំងពីឆ្នាំ ២០២១ នៅពេលដែលយោធាបានបណ្តេញរដ្ឋាភិបាលស៊ីវិលជាប់ឆ្នោតនៅក្នុងរដ្ឋប្រហារ ដោយបញ្ចប់ភ្លាមៗនូវជំហានបណ្តោះអាសន្នរបស់ប្រទេសក្រីក្រឆ្ពោះទៅរកការក្លាយជាប្រទេសលទ្ធិប្រជាធិបតេយ្យពេញលេញ៕
