ឯកឧត្តម ឈាង វុន៖ ឈប់បោកយុវជន ឈប់បោកប្រជាពលរដ្ឋទៀតទៅ

ភ្នំពេញ៖ ឯកឧត្តម ឈាង វុន អ្នកតំណាងរាស្ត្រ បានលើកឡើងថា ឯកឧត្តមមានភស្តុតាងដែលបង្ហាញថា គណបក្សប្រឆាំងចំនួន២បានចូលរួមបង្កើតកិច្ចព្រមព្រៀងCLV។

នៅក្នុងបណ្តាញទំនាក់ទំនងសង្គម នៅថ្ងៃទី១៧ ខែសីហា ឆ្នាំ២០២៤នេះ ឯកឧត្តម ឈាង វុន បានបង្ហាញរូបថត តំណាងរាស្ត្រមកពីគណបក្សសង្គ្រោះជាតិ និងបញ្ជីឈ្មោះអ្នកតំណាងរាស្ត្រមកពីគណបក្សសិទ្ធមនុស្ស។

ឯកឧត្តម ឈាង វុន បានសរសេរថា «ខ្ញុំសូមជូនរូបមួយទៀតដែលមិនអាចប្រកែកបាន ហើយបើថាមិនដឹងពី CLV ទៀត គឺមេឃកាន់តែងងឹតហើយ។ នៅក្នុងរូបនេះ មានឯកឧត្តម គង់ បូរ៉ា ដែលបានទៅចូលរួមប្រជុំ CLV ក្នុងវិស័យសន្តិសុខនិងការពារ នៅចំប៉ាសាក់ ប្រទេសឡាវ ឆ្នាំ២០១៥។ យើងនៅមានរូបច្រើនទៀត ដែលខ្ញុំនឹងបង្ហាញជូនប្រជាពលរដ្ឋអោយឃើញពីការបោកប្រាសនេះ។ ឯកឧត្តម គង់ បូរ៉ា មកពីគណបក្សសង្គ្រោះជាតិ។ ឈប់បោកទៅ យុវជនយើងលែងឆោតល្ងង់ដូចពួកឯងគិតហើយ»។

សូមរំលឹកថា កាលពីថ្ងៃទី១៦សីហាឆ្នាំ២០២៤. ឯកឧត្តម ឈាង វុន បានសរសេរនៅក្នុងបណ្តាញទំនាក់ទំនងសង្គម ថា «នៅឆ្នាំ២០១៥ ខ្ញុំបានដឹកនាំគណ:កម្មការសភានៃព្រះរាជាណាចក្រកម្ពុជានៃគណ:កម្មការអន្តរសភាកម្ពុជា ឡាវ វៀតណាម ទៅចូលរួមកិច្ចប្រជុំ CLV នៅខេត្តចំប៉ាសាក់នៃប្រទេសឡាវ។ នៅក្នុងគណ:ប្រតិភូ មានសមាជិក៣រូបមកពីគណ:បក្សសង្គ្រោះជាតិ៖ ឯកឧត្តម កែវ ភិរម្យ, ឯកឧត្តម ញ៉យ ចំរើន និងឯកឧត្តម គី វាណ្ណដារ៉ា រដ្ឋសភាអាណត្តិទី៥។ មិនត្រឹមតែគណបក្ស សម រង្ស៊ី ទេដែលបានចូលរួមការងារ CLV សូម្បីគណបក្សសង្គ្រោះជាតិក៏បានចូលរួមដែរ»។

ឯកឧត្តមបានសរសេរបន្តទៀតថា «ម្តេចបានជាគ្មានការតវាអ្វីសោះនៅពេលនោះ ហើយទើបតែមកភ្ញាក់ផ្អើលនៅពេលនេះ។ មេឃដូចមិនស្រឡះសោះ ក្នុងរឿងនេះ។ ឈប់បោកយុវជន ឈប់បោកប្រជាពលរដ្ឋទៀតទៅ»។

ឯកឧត្តមសរសេរថា« ម្តេចក៏ចូលចិត្តយកការបោកប្រាស់ប្រជាពលរដ្ឋនិង យុវជនដែលជាអនាគតរបស់ប្រទេសជាតិ មកធ្វើជាឈ្នាន់នយោបាយយ៉ាងនេះ ល្មមឈប់ទៅ»។ ហើយនៅថ្ងៃនេះទៀត ឯកឧត្តមបានតបតទៅវិញ ចំពោះ អ្នកតំណាងមកពីគណបក្សប្រឆាំងមួយរូបប្រចាំខេត្តក្រចេះដែលបានដោះសារថាមិនបានដឹងពីកិច្ចព្រមព្រៀង CLV ដោយឯកឧត្តមឈាង វុន សរសេរថា «មិនដឹងពី CLV គឺកាន់តែធ្ងន់ហើយ ព្រោះធ្វើជា តំណាងរាស្ត្រខេត្តក្រចេះហើយមិនបានដឹងពី CLV គឺចប់ហើយ មានតែមិនដែលទៅមណ្ឌលដែលខ្លួនជាប់ឆ្ពោះ និងមិនដែលមកធ្វើការនៅរដ្ឋសភា។ ធ្វើតំណាងរបស់អ្នកក្រចេះយ៉ាងម៉េចបើមិនដែលមករដ្ឋសភាផង បើមកគឺដឹងហើយពីCLV ព្រោះរាល់ឯកសារទាំងអស់ នៅរដ្ឋសភា ត្រូវបានផ្តល់ដល់អ្នកតំណាងរាស្ត្រតាមប្រអប់ សំបុត្រផ្ទាល់ខ្លួនរបស់តំណាងរាស្ត្រម្នាក់ៗ។ CLV ត្រូវបានបើកកិច្ចប្រជុំនៅខេត្តក្រចេះនៅឆ្នាំ២០១០ ហើយត្រូវបានផ្សព្វផ្សាយយ៉ាងទូលំទូលាយ ម៉េចក៏គ្មានឮ មាន់រងាវ? ឈប់បោកទៀតទៅ គេលែងជឿរហើយ»។

ការលើកឡើងអំណៈអំណាងផ្ទួនៗគ្នារបស់ ឯកឧត្តម ឈាង វុននេះ បានធ្វើឡើង ខណៈក្រុមប្រឆាំងកំពុងតែបោកប្រាស់ បំផ្លែងការពិតទាក់ទងការបង្កើតកិច្ចព្រមព្រៀងតំបន់អភិវឌ្ឍន៍ CLV ថា បានធ្វើអោយខ្មែរបាត់បង់ដី៤ខេត្តទៅអោយប្រទេសវៀតណាម ដោយទំលាក់កំហុសមកលើតំណាងរាស្ត្រមកពីគណបក្សប្រជាជន។ ការបង្ហាញលេសគ្មានការពិតនេះ គឺក្រុមប្រឆាំង មានបំណងបោកប្រាស់ និងញ៉ុះញ៉ុងអោយប្រជាពលរដ្ឋ ទៅធ្វើបាតុកម្មដោយខុសច្បាប់ ក្នុងទំរង់បដិវត្តន៍ពណ៌ ដើម្បីផ្តួលរំលំរាជរដ្ឋាភិបាលដឹកនាំដោយគណបក្សប្រជាជន ដែលកើតឡើងដោយការឈ្នះឆ្នោត។ ដើម្បីបំពេញមហិច្ចតារបស់ខ្លួន ក្រុមប្រឆាំងពីក្រៅប្រទេស បានអុជអាល បំផុសបំផុល និងការប្រើឧបាយកលនយោបាយ បោកបញ្ឆោតអូសទាញប្រមូលកម្លាំងប្រជាជនស្លូតត្រង់ ឱ្យធ្វើបាតុកម្មបះបោរផ្តួលរំលំរាជរដ្ឋាភិបាលស្របច្បាប់។ សកម្មភាពជុំវិញ ផែនការនេះ គឺជាអំពើវិទ្ធង្សនា ដែលជាឧក្រិដ្ឋកម្មធ្ងន់ធ្ងរបំផុតប៉ះ ពាល់ដល់សន្តិសុខជាតិ បំផ្លាញ «សន្តិភាព» ដែលបានធ្វើអោយប្រទេសកម្ពុជាកំពុងតែមានការអភិវឌ្ឍន៍។

សូមបញ្ជាក់ថា ផែនការប៉ុនប៉ងផ្តួលរំលំ រាជរដ្ឋាភិបាល ដើម្បីដណ្តើមអំណាច តាមមធ្យោបាយក្រៅពី ការបោះឆ្នោតតាមគោលការណ៍នៃលទ្ធិប្រជាធិបតេយ្យសេរី ពហុបក្ស ដែលមានចែងក្នុងរដ្ឋធម្មនុញ្ញ គឺជាបទឧក្រិដ្ឋកម្មធ្ងន់ធ្ងរ ដែលត្រូវផ្តន្ទាទោសក្រោម “បទល្មើសឧបឃាត”ដែលអ្នកប្រព្រឹត្តិ ត្រូវ ដាក់ពន្ធនាគារពី ១៥ឆ្នាំ ទៅ ៣០ឆ្នាំ ហើយប្រសិនបើជនល្មើសជា អ្នករាជការសាធារណៈ ទោសសម្រាប់ “បទល្មើសឧបឃាត” នេះត្រូវដាក់ពន្ធនាគារអស់មួយជីវិត ៕