រដ្ឋមន្ត្រីអប់រំ អរគុណរដ្ឋាភិបាលកូរ៉េ និងទីភ្នាក់ងារ KOICA ដែលជួយកម្ពុជាលើគម្រោងជំរុញបដិវត្តកម្មបច្ចេកវិទ្យាអប់រំឌីជីថល
ភ្នំពេញ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានកោតសរសើរចំពោះរដ្ឋាភិបាលនៃប្រទេសកូរ៉េ និងទីភ្នាក់ងារកយកា (KOICA) ប្រចាំកម្ពុជា ដែលបានជួយឧបត្ថម្ភគាំទ្រជាបន្តបន្ទាប់ចំពោះរាជរដ្ឋាភិបាលកម្ពុជា ជាពិសេសចំពោះគម្រោងកសាងសមត្ថភាពបច្ចេកវិទ្យាព័ត៌មាន និងសារគមនាគមន៍ ដែលបានផ្តោតលើការជំរុញការធ្វើបដិវត្តកម្មបច្ចេកវិទ្យាអប់រំឌីជីថល និងជាអាទិភាពមួយក្នុងកំណែទម្រង់វិស័យអប់រំ។
នេះបើតាមការលើកឡើងក្នុងពិធីសិក្ខាសាលា ស្តីពីការពិនិត្យឡើងវិញពាក់កណ្តាលអាណត្តិ នៃការអនុវត្តគម្រោងកសាងសមត្ថភាពបច្ចេកវិទ្យាព័ត៌មាន និងសារគមនាគមន៍ សម្រាប់ការអប់រំនៅមធ្យមសិក្សាបឋមភូមិនៅកម្ពុជា នាថ្ងៃទី១៦ ខែសីហា ឆ្នាំ២០២៤ ដែលមានការចូលរួមពីលោកស្រី មូន ជុងឆូយ Moon Jung Choi នាយិកាប្រចាំប្រទេសនៃការិយាល័យកយកា KOICA ប្រចាំនៅកម្ពុជាផងដែរ។ សិក្ខាសាលានេះរៀបចំឡើងក្នុងគោលបំណង ដើម្បីពិនិត្យ និងអបអរសាទរចំពោះសមិទ្ធផលដែលគម្រោងកសាងសមត្ថភាពបច្ចេកវិទ្យាព័ត៌មាន និងសារគមនាគមន៍សម្រាប់ការអប់រំនៅមធ្យមសិក្សាបឋមភូមិនៅកម្ពុជា សម្រេចបាននាពេលកន្លងមកក៏ដូចជាឱកាសមួយ សម្រាប់ការចែករំលែកនូវបទពិសោធ ឧត្តមានុវត្តន៍ និងការរិះរកវិធានការថ្មីៗទៀត ដើម្បីធ្វើយ៉ាងណាឱ្យការអនុវត្តគម្រោង កាន់តែមានប្រសិទ្ធភាព និងសម្រេចបានតាមលទ្ធផលរំពឹងទុក។
យ៉ាងណាមិញ គម្រោងនេះមានរយៈពេល៦ឆ្នាំដែលអនុវត្តចាប់ពីឆ្នាំ២០២១-២០២៦ ដោយរយៈពេល៣ឆ្នាំកន្លងមកនេះ គម្រោងសម្រេចបានសមិទ្ធផលជាច្រើនគួរឱ្យកត់សម្គាល់រួមមាន៖ ការរៀបចំបន្ទប់អនុវត្តកុំព្យូទ័រចំនួន៤៨បន្ទប់, ការអភិវឌ្ឍឯកសារបណ្តុះបណ្តាលគ្រូបង្រៀនអនុវិទ្យាល័យឯកទេសបច្ចេកវិទ្យានៅតាមមជ្ឈមណ្ឌលគរុកោសល្យភូមិភាគចំនួន៩ក្បាល (ជាភាសាខ្មែរ និងភាសាអង់គ្លេស)។ គម្រោងក៏បានអភិវឌ្ឍកម្មវិធីសិក្សា និងសៀវភៅសិក្សាគោល មុខវិជ្ជាបច្ចេកវិទ្យាព័ត៌មាន ថ្នាក់ទី៧ ទី៨ និងទី៩ សរុបចំនួន៦ក្បាលសម្រាប់ការអប់រំចំណេះទូទៅដោយក្នុងមួយកម្រិតថ្នាក់មានចំនួន២ក្បាលផងដែរ។ រដ្ឋាភិបាលកូរ៉េ និងទីភ្នាក់ងារកយកា ប្រចាំកម្ពុជា បានជួយឧបត្ថម្ភគាំទ្រជាបន្តបន្ទាប់ ចំពោះរាជរដ្ឋាភិបាលកម្ពុជា ជាពិសេសចំពោះគម្រោងនេះផ្ទាល់ ដែលបានផ្តោតលើការជំរុញការធ្វើបដិវត្តកម្មបច្ចេកវិទ្យាអប់រំឌីជីថល និងជាអាទិភាពមួយក្នុងកំណែទម្រង់វិស័យអប់រំ ក្នុងអាណត្តិទី៧នៃរដ្ឋសភា ដោយក្រសួងបាននិងកំពុងបន្តអភិវឌ្ឍ និងជំរុញឱ្យមានបដិវត្តកម្មឌីជីថលនៅក្នុងប្រព័ន្ធអប់រំ ដើម្បីកសាងមូលធនមនុស្សក្នុងបរិការណ៍នៃបដិវត្តកម្មសង្គម និងសេដ្ឋកិច្ចឌីជីថល តាមរយៈការធ្វើសមាហរណកម្មបច្ចេកវិទ្យាឌីជីថលទៅក្នុងគ្រប់កម្រិតកម្មវិធីសិក្សា ការបំពាក់បន្ទប់ ពិសោធ ឌីជីថលនៅតាមគ្រឹះស្ថានសិក្សា ការលើកកម្ពស់សមត្ថភាពគ្រូបង្រៀនផ្នែកឌីជីថល និងផលិត មាតិកា បង្រៀន និងការផ្សព្វផ្សាយការងារទាំងនេះឱ្យកាន់តែទូលំទូលាយ។
ទន្ទឹមនឹងនេះដែរ ក្រសួងបានកំណត់អាទិភាពក្នុងការបន្តលើកកម្ពស់ការអប់រំឌីជីថល តាមរយៈ៖ ១.ការលើកកម្ពស់អក្ខរកម្មឌីជីថល, ២.ការលើកកម្ពស់ការអប់រំឌីជីថល, ៣.ការកសាងជំនាញឌីជីថលនៅកម្រិតឧត្តមសិក្សា, ៤.ការធ្វើបច្ចុប្បន្នកម្មទេពកោសល្យជំនាញឌីជីថលសម្រាប់បុគ្គលិកអប់រំ, ៥.ការធ្វើទំនើបកម្មសម្ភារឧបទេស និងបរិក្ខារសម្រាប់ការអប់រំឌីជីថល, ៦.ការជំរុញការអនុវត្តការរៀន និងបង្រៀនភាសាអង់គ្លេសនៅបឋមសិក្សា, ៧.កំណែទម្រង់គ្រឹះស្ថានបណ្តុះបណ្តាលគ្រូជាមួយសមត្ថភាពផ្នែកបច្ចេកវិទ្យា និងការអនុវត្តវិធីសាស្ដ្របង្រៀន ដោយប្រើប្រាស់បច្ចេកវិទ្យាអប់រំ, ៨.ការអនុវត្តវិធីសាស្ដ្របង្រៀនថ្មី ដើម្បីលើកកម្ពស់បំណិនសតវត្សទី២១ និង៩.ការបង្កើនបរិស្ថានសមស្របសម្រាប់ការអប់រំឌីជីថល ៕
