រដ្ឋមន្ត្រី ឈាង រ៉ា បន្តអញ្ជើញដំណើរទស្សនកិច្ចពិនិត្យសេវាសុខាភិបាលសាធារណៈ នៅមណ្ឌលសុខភាពភ្នំស្ពង់ ខេត្តប៉ៃលិន

ភ្នំពេញ៖ នាព្រឹកថ្ងៃអាទិត្យ ១៤កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៨ ខែសីហា ឆ្នាំ២០២៤ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងប្រតិភូ បានបន្តធ្វើដំណើរចុះពិនិត្យសេវាសុខាភិបាលសាធារណៈ សួរសុខទុក្ខបុគ្គលិកសុខាភិបាល និងប្រជាពលរដ្ឋដែលមកទទួលសេវា នៅមណ្ឌលសុខភាពភ្នំស្ពង់ ខេត្តប៉ៃលិន។

ក្នុងឱកាសទស្សនៈកិច្ចនេះ ឯកឧត្តមសាស្រ្តាចារ្យរដ្ឋមន្រ្តី បានចុះពិនិត្យទីតាំងសំខាន់ ដូចជាទីតាំងពិគ្រោះជំងឺ កន្លែងអប់រំសុខភាពទឹកនោមផ្អែម និងលើសសំពាធឈាម កន្លែងសម្ភព និងរោគស្ត្រី ការរក្សាវ៉ាក់សាំង និងកន្លែងទុកដាក់រក្សាឱសថ។

ឯកឧត្តមសាស្រ្តាចារ្យរដ្ឋមន្ត្រី បានផ្តល់អនុសាសន៍គន្លឹះជូនថ្នាក់ដឹកនាំ បុគ្គលិកតាមមណ្ឌល និងមន្ទីរសុខាភិបាល ដោយត្រូវបង្កើនសមត្ថភាពបន្ថែមទៀតតាមរយៈការបណ្តុះបណ្តាល ជាពិសេសកម្រិតបច្ចេកទេស ដើម្បីពង្រឹងគុណភាពការផ្តល់សេវាសុខាភិបាលជូនដល់ប្រជាពលរដ្ឋប្រកបដោយគុណភាព ស័ក្តសិទ្ធភាព និងសមធម៌។

ឯកឧត្តមសាស្ត្រាចារ្យរដ្ឋមន្ត្រី បានសំដែងការកោតសរសើរ និងវាយតម្លៃខ្ពស់ ជូនចំពោះមន្រ្តីសុខាភិបាលបម្រើការងារនៅមណ្ឌលសុខភាព រួមទាំងអាជ្ញាធរមូលដ្ឋាន ក្នុងការរៀបចំមណ្ឌលសុខភាពបានយ៉ាងល្អ ទាំងហេដ្ឋារចនាសម្ព័ន្ធ អនាម័យ ជាមួយធនធានមនុស្សដែលមានការតាំងចិត្តបំពេញការងារ ៕