រដ្ឋមន្រ្តីក្រសួងពាណិជ្ជកម្ម អនុញ្ញាតឱ្យប្រធានតំណាងអង្គការពាណិជ្ជកម្មក្រៅប្រទេសជប៉ុន ប្រចាំនៅរាជធានីភ្នំពេញ ចូលជួបសម្ដែងការគួរសម និងពិភាក្សាការងារ
ភ្នំពេញ៖ នាព្រឹកថ្ងៃចន្ទ ទី១៩ ខែសីហា ឆ្នាំ២០២៤ នៅទីស្ដីការក្រសួងពាណិជ្ជកម្ម លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម អនុញ្ញាតឱ្យលោកស្រី Marisa Haruta ប្រធានតំណាងអង្គការពាណិជ្ជកម្មក្រៅប្រទេសជប៉ុន (JETRO) ចូលជួបសម្ដែងការគួរសម ពិភាក្សាការងារ ជម្រាបលា និងណែនាំលោក Wakabayashi Ko Hei ដែលជាប្រធានតំណាងថ្មីរបស់អង្គការ JETRO ប្រចាំកម្ពុជា ជូនលោកជំទាវរដ្ឋមន្រ្តី។
នៅក្នុងជំនួបនេះ ភាគីទាំងពីរបានបង្ហាញក្ដីសោមនស្សរីករាយ និងសម្ដែងការកោតសរសើរដល់កិច្ចសហប្រតិបត្តិការល្អដែលក្រសួងពាណិជ្ជកម្ម និងអង្គការ JETRO បានធ្វើរួមជាមួយគ្នា នាពេលកន្លងមក និងសង្ឃឹមថា ភាគីទាំងពីរនឹងបន្តនូវទំនាក់ទំនងល្អនេះ បន្ថែមទៀតនាពេលអនាគត ក្នុងន័យជំរុញធុរកិច្ច និងពាណិជ្ជកម្មរវាងកម្ពុជា និងជប៉ុន។បន្ថែមពីនេះ ភាគីទាំងពីរបានឯកភាព ពិនិត្យឡើងវិញនូវអនុស្សារណៈនៃការយោគយល់គ្នារវាងក្រសួងពាណិជ្ជកម្ម និងអង្គការ JETRO ដែលបានចុះហត្ថលេខានាពេលកន្លងមក៕