ទីបំផុត! ព្រះសង្ឃមួយអង្គ ដែលប្រើកាំបិតបុ័តតោកាប់ប្រហារលើយុវតីម្នាក់ ព្រោះរឿងស្នេហា ត្រូវនគរបាលចាប់ខ្លួនបានហើយ

ភ្នំពេញ៖ នៅទីបំផុតព្រះសង្ឃមួយអង្គដែលកាប់ប្រហារយុវតីម្នាក់បណ្ដាលឱ្យរងរបួសធ្ងន់ ពេលនេះត្រូវនគរបាលចាប់ខ្លួនបានហើយ ពោលគឺប្រើពេល១២ម៉ោង ក្រោយជនសង្ស័យព្យាយាមរត់គេចខ្លួនទៅកាន់ច្រកព្រំដែនប៉ោយប៉ែត-ក្លងលឿកប្រទេសថៃ។ នេះបើតាមការឱ្យដឹងពីសមត្ថកិច្ចនៅព្រឹកថ្ងៃទី១៩ ខែសីហា ឆ្នាំ២០២៤។

យោងតាមរបាយការណ៍របស់សមត្ថកិច្ចបានឱ្យដឹងថា ជនសង្ស័យឈ្មោះ ហឿន វាសនា អាយុ៣០ឆ្នាំ ជនជាតិខ្មែរ បានធ្វើសកម្មភាពប្រើកាំបិតបុ័តតោ កាប់ទៅលើជនរងគ្រោះឈ្មោះ សេង សេតម្ពរ ហៅកែវ អាយុ១៨ឆ្នាំ ជាច្រើនកាំបិត បណ្តាលឱ្យជនរងគ្រោះដាច់រយះក្បាលជាច្រើនកន្លែង ព្រមទាំងដាច់រយះចង្កាធ្ងន់ធ្ងរ និងដាច់រយះលើផ្ទៃបាតដៃ កំពុងសង្គ្រោះបន្ទាន់មន្ទីរពេទ្យព្រះអង្គឌួង។ ដោយឡែកចំពោះវត្ថុតាងចាប់យកបានរួមមាន៖ ទូរសព្ទដៃ០១គ្រឿង ម៉ាកIPHONE ពណ៌ស (ជារបស់ជនរងគ្រោះ)

គួររម្លឹកថា នៅថ្ងៃទី១៧សីហា ឆ្នាំ២០២៤ វេលាម៉ោងប្រហែល០៥ៈ៣០នាទីទៀបភ្លឺ នៅចំណុចក្នុងវត្តថាន់ ផ្លូវព្រះនរោត្តម ស្ថិតនៅក្រុម៣៨ ភូមិ៧ សង្កាត់ទន្លេបាសាក់ ខណ្ឌចំការមន រាជធានីភ្នំពេញ មានករណីឃាតកម្ម(ប្រើកាំបិតបុ័ងតោកាប់) បង្កឡើងដោយជនសង្ស័យ កាប់ទៅលើជនរងគ្រោះបណ្តាលឱ្យជនរងគ្រោះដេកដួលក្នុងថ្លុកឈាមនៅកន្លែងកើតហេតុ។ បន្ទាប់ពីធ្វើសកម្មភាពកាប់ទៅលើជនរងគ្រោះរួច ជនសង្ស័យក៏បានយកទូរសព្ទដៃរបស់ជនរងគ្រោះ០១គ្រឿង ម៉ាក IPHONE ពណ៌-ស ហើយគេចខ្លួនបាត់ស្រមោលតែម្ដង។

ភ្លាមៗ ក្រោយទទួលបានដមណឹងខាងលើនេះ លោកឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ ដោយមានការសម្របសម្រួលនីតិវិធីពីលោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានបញ្ជារកម្លាំងការិយាល័យ នគរបាលព្រហ្មទណ្ឌកម្រិតធ្ងន់ សហការជាមួយកម្លាំងអធិការដ្ឋាននគរបាលខណ្ឌទាំង១៤ ធ្វើការស្រាវជ្រាវរហូតដឹងថា ជនសង្ស័យបានទៅសម្ងំលាក់ខ្លួននៅក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ និងដោយមានកិច្ចហសការជាមួយកម្លាំងជំនាញ នៃស្នងការដ្ឋាននគរបាលខេត្តបន្ទាយមានជ័យ កម្លាំងនាយកដ្ឋានច្រកទ្វារទី១ សមត្ថកិច្ចបានធ្វើការស្រាវជ្រាវរហូតដល់វេលាម៉ោង១៧ៈ៣០នាទីថ្ងៃដដែលទើបចាប់ឃាត់ខ្លួនបជនសង្ស័យបាននៅច្រកព្រំដែនកម្ពុជា-ថៃ ក្រុងប៉ោយប៉ែត ខេត្តបន្ទាយមានជ័យ។

សមត្ថកិច្ចបានឱ្យដឹងបន្តថា បន្ទាប់ពីចាប់ឃាត់ខ្លួនព្រះសង្ឃឃាតករួច អាជ្ញាធរបានយកទៅផ្សឹកនៅវត្តបាលិលេយ្យ រួចទើបបញ្ជូនបន្តមកកាន់ស្នងការដ្ឋាននគរបាលរាជធានីភ្នំពេញ​។ បច្ចុប្បន្ន ជនសង្ស័យរួមទាំងវត្ថុតាង កម្លាំងការិយាល័យនគរបាលព្រហ្មទណ្ឌកម្រិតធ្ងន់ កំពុងកសាងសំណុំរឿងបញ្ជូនជនជាប់ចោទទៅកាន់សាលាដំបូងរាជធានីភ្នំពេញ ដើម្បីផ្តន្ទាទោសតាមនីតិវិធីច្បាប់ ៕