ឯកឧត្ដម តាន់ ហ្សង់ហ្វ្រង់ស័រ៖ ខ្ញុំក៏ជាពលរដ្ឋខ្មែរម្នាក់ដែលចង់បម្រើជាតិដែរ តែពួកជ្រុលនិយមបែរចោទថា «ខ្ញុំលក់ឧត្តមគតិ»ទៅវិញ

ភ្នំពេញ៖ ឯកឧត្ដម តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការបរទេស និងសហប្រតិបត្តិការអន្តរជាតិ បានប្រតិកម្មចំពោះ ក្រុមជ្រុលនិយមក្រៅប្រទេស ឯកឧត្ដមក៏ជាប្រជាពលរដ្ឋខ្មែរម្នាក់ដែលចង់បម្រើជាតិដែរ តែបែរជាពួកជ្រុលនិយចោទថា «ក្បត់ជាតិ លក់ក្បាល» ទៅវិញ។

ក្នុងសន្និសីទបង្ហាញអំពីសមិទ្ធផលរយៈពេល១ឆ្នាំ របស់រាជរដ្ឋាភិបាលអាណត្តិទី៧ ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នៅទីស្តីការគណៈរដ្ឋមន្រ្តី នាថ្ងៃទី១៩ ខែសីហា ឆ្នាំ២០២៤ ឯកឧត្ដម តាន់ ហ្សង់ហ្វ្រង់ស័រ បានបញ្ជាក់ថា «ពួកគេចោទរាជរដ្ឋាភិបាល ចោទមនុស្សដូចខ្ញុំ និងឯកឧត្តម ប៉ែន បូណា (ថា) មនុស្សក្បត់ជាតិ លក់ក្បាល លក់ខ្លួន បម្រើតែប្រយោជន៍បរទេស ជួនកាលគេចោទថា “បម្រើវៀតណាម” ជួនកាលគេចោទថា “បម្រើចិន” ស្រេចតែអំពើចិត្តរបស់ពួកគេ»។

ឯកឧត្ដម តាន់ ហ្សង់ហ្វ្រង់ស័រ បន្តថា «មើលភ្នែកខ្ញុំឱ្យមែនទែន ខ្ញុំក៏ជាពលរដ្ឋម្នាក់ដែរ ខ្ញុំរស់នៅបរទេស៣០ឆ្នាំ ធ្វើការឱ្យបរទេស៣០ឆ្នាំក្នុងវិទ្យុបារាំងអន្តរជាតិ ធ្វើការឱ្យបរទេសដើម្បីបម្រើប្រយោជន៍ខ្មែរ ផ្សព្វផ្សាយព័ត៌មានដើម្បីបម្រើផលប្រយោជន៍ខ្មែរ តែបែរជាពួកជ្រុលនិយមទាំងនោះមកជេរថា ខ្ញុំលក់ឧត្តមគតិ ក្បត់ជាតិ អត់មានសិទ្ធិឈរនៅខាងអ្នកជាតិនិយម ឬអ្នកស្នេហាជាតិ»។

ឯកឧត្ដម តាន់ ហ្សង់ហ្វ្រង់ស័រ លើកឡើងទៀតថា ចំពោះពួកជ្រុលនិយម ប្រជានិយមទាំងនោះ កាលណាមានមនុស្សនៅខាងពួកគេ គេចាត់ទុកថាជាអ្នកជាតិនិយម រីឯអ្នកមិននៅខាងពួកគេ គេចាត់ទុកថា សុទ្ធសឹងជាអ្នកក្បត់ជាតិ តួយ៉ាងដូចជាឯកឧត្ដម ប៉ែន បូណា និងរូបឯកឧត្ដមផ្ទាល់ គឺត្រូវបានគេចោទថា «ជាមនុស្សក្បត់ជាតិ លក់ក្បាល លក់ខ្លួន» ដោយសារមិនជ្រើសរើស នៅជាមួយពួកជ្រុលនិយមទាំងនោះ ៕