ឯកឧត្ដម ប៉ែន បូណា ផ្ដាំទៅអ្នកដែលតែងរិះគន់ ឲ្យបើកភ្នែក បើកត្រចៀក មើលនិងស្ដាប់ឱ្យច្បាស់ថា រាជរដ្ឋាភិបាលបានធ្វើអីខ្លះ មុននឹងបើកមាត់និយាយ

ភ្នំពេញ៖ ឯកឧត្ដម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានថ្លែងផ្តាំផ្ញើទៅដល់មនុស្សមួយចំនួន ដែលតែងតែរិះគន់ និងជេរទៅលើរាជរដ្ឋាភិបាល នីតិកាលទី៧ សូមបើក «ខួរក្បាល​ បើត្រចៀក​ បើកភ្នែក» មើលឱ្យបានច្បាស់នូវអ្វីដែលរាជរដ្ឋាភិបាលកំពុងធ្វើសព្វថ្ងៃ​ មុននឹងបើកមាត់ និយាយ ។

ក្នុងវេទិកាសារព័ត៌មានលើកទី៤ ស្ដីពី «គោលនយោបាយជាតិ និងសមិទ្ធផលរបស់រាជរដ្ឋាភិបាលនីតិកាលទី៧ រយៈពេល១ឆ្នាំ» នៅថ្ងៃទី១៩ ខែសីហា ឆ្នាំ២០២៤នេះ ឯកឧត្ដម ប៉ែន បូណា បញ្ជាក់ថា «ខ្ញុំសូមផ្ញើសារដែរ ទៅអ្នកដែលអង្គុយរិះគន់ អ្នកដែលអង្គុយជេររដ្ឋាភិបាលសព្វថ្ងៃនេះ សូម​ឱ្យបើកភ្នែកមើលឱ្យច្បាស់ថា រាជរដ្ឋាភិបាលបានធ្វើអី បើកត្រចៀកស្តាប់គេពន្យល់ថាគេធ្វើអីខ្លះ បើកខួរក្បាលពិចារណាឱ្យច្បាស់មុននឹងបើកមាត់និយាយ»។

ឯកឧត្ដម ប៉ែន បូណា បានថ្លែងទៀតថា រឿងនេះសំខាន់ណាស់ពីព្រោះអ្នករិះគន់សព្វថ្ងៃនេះ បើកតែមាត់ទេ និយាយអត់បានមើល អត់បានស្រាវជ្រាវ អត់បានសិក្សាអ្វីទាំងអស់ ចេះតែនិយាយបើកតែមាត់ បែរជាភ្នែកបិទ ត្រចៀកបិទ ខួរក្បាលបិទ ហើយមាត់ចេះតែនិយាយទៅដោយមិនបានដឹងអ្វីទាំងអស់។

ឯកឧត្ដម ប៉ែន បូណា បានបន្ថែមទៀតថា សូមអ្នកពូកែរិះគន់ពិនិត្យមើលឱ្យច្បាស់ពីគោលនយោបាយរបស់រាជរដ្ឋាភិបាល ហើយគោលនយោបាយនេះវាពិតជាសំខាន់ណាស់សម្រាប់ប្រជាពលរដ្ឋ ហើយរាជរដ្ឋាភិបាល​គឺបានធ្វើអ្វីៗ​ដើម្បីតែប្រជាពលរដ្ឋ ៕