ឧត្តមសេនីយ៍ទោ ស៊ុំ សំណាង៖ យើងទាំងអស់គ្នាជាកងកម្លាំង នៃកងយោធពលខេមរភូមិន្ទ ដាច់ខាតត្រូវមានភក្ដីភាពចំពោះជាតិ សាសនា ព្រះមហាក្សត្រ និងការពាររាជរដ្ឋាភិបាលស្របច្បាប់

ភ្នំពេញ៖ អនុវត្តតាមបទបញ្ជារបស់រាជរដ្ឋាភិបាល ដោយមានការណែនាំយ៉ាងម៉ឺងម៉ាត់ពីឯកឧត្តម នាយឧត្តមសេនីយ៍ មេបញ្ជាការកង ទ័ពជើងគោក នៅព្រឹកថ្ងៃទី២០ ខែសីហា ឆ្នាំ២០២៤ ឯកឧត្តម ឧត្តមសេនីយ៍ទោ ស៊ុំ សំណាង មេបញ្ជាការបញ្ជាការ ដ្ឋានទ័ពពិសេស បានអញ្ជើញជួបសំណេះសំណាល និងផ្សព្វផ្សាយសភាពការណ៍ថ្មីៗទាំងក្នុង និងក្រៅប្រទេស ជូនដល់ នាយទាហាន នាយទាហានរង និងពលទាហាន នៃបញ្ជាការដ្ឋានទ័ពពិសេស កងទ័ពជើងគោក បានជ្រាប និងបានដាក់ចេញ នូវបទបញ្ជាដល់ថ្នាក់ដឹកនាំគ្រប់កងកុម្ម៉ង់ដូ ការិយាល័យ ផ្នែក ចំណុះបញ្ជាការដ្ឋានទ័ពពិសេស ត្រូវត្រៀមកងកម្លាំង និងមធ្យោបាយ ចាំបាច់ ដើម្បីរង់ចាំអនុវត្តរាល់បទបញ្ជាឲ្យបានមួយរយភាគរយដែលថ្នាក់លើប្រគល់ជូន។

នៅក្នុងឱកាសនោះដែរឯកឧត្តម ឧត្តមសេនីយ៍ទោ ស៊ុំ សំណាង បានបញ្ជាក់យ៉ាងច្បាស់ថា យើងទាំងអស់គ្នាជាកងកម្លាំង នៃកងយោធពលខេមរភូមិន្ទ ជាកម្លាំងដ៏រឹងមាំ របស់រាជរដ្ឋាភិបាល ដាច់ខាតត្រូវមានភក្ដីភាព ចំពោះ ជាតិសាសនា ព្រះមហាក្សត្រ មានតួនាទី និងភារកិច្ចការពាររដ្ឋធម្មនុញ្ញ ការពាររាជរដ្ឋាភិបាលស្របច្បាប់ ការពារសុខសុវត្ថិភាព សណ្ដាប់ ធ្នាប់សាធារណៈ ជូនប្រជាពលរដ្ឋជាពិសេសការពារ សន្តិភាព ឲ្យបានដាច់ខាតទោះបីត្រូវលះបង់អាយុជីវិតក៏ដោយ និងត្រូវ កម្ទេចឲ្យអស់នូវក្រុមជ្រុលនិយមក្បត់ជាតិ ដែលមានបំណងចង់ផ្ដួលរំលំរាជរដ្ឋាភិបាលស្របច្បាប់ និងមិនត្រូវជឿដាច់ខាត រាល់ឧបាយកលការញុះញង់ណាមួយរបស់ក្រុមជ្រុលនិយមនោះឡើយ។

ឯកឧត្តម ឧត្តមសេនីយ៍ទោ ស៊ុំ សំណាង បានសង្កត់ធ្ងន់ថាគ្រប់កងកុម្ម៉ង់ដូ ការិយាល័យ ផ្នែក ចំណុះទាំងអស់ ពេលទទួលបានបទបញ្ជាដាច់ខាតត្រូវ អនុវត្តឲ្យបានទាន់ពេលវេលា ដើម្បីសម្រេចភារកិច្ចដែលថ្នាក់លើប្រគល់ជូនអោយខានតែបាន៕