ឧបនាយករដ្ឋមន្ត្រី ហង់ជួន ណារ៉ុន ដឹកនាំកិច្ចប្រជុំស្តីពីការពិនិត្យវឌ្ឍនភាព នៃការរៀបចំប្រព័ន្ធគន្លងអប់រំ នៅកម្ពុជា

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២០ ខែសីហា ឆ្នាំ២០២៤ បានដឹកនាំកិច្ចប្រជុំស្តីពី ការពិនិត្យវឌ្ឍនភាពនៃការរៀបចំប្រព័ន្ធគន្លងអប់រំនៅកម្ពុជា ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំ លោក លោកស្រី មន្ត្រីមកពីនាយកដ្ឋានពាក់ព័ន្ធ។

មុនឈានចូលដល់កិច្ចពិភាក្សាផ្លាស់ប្តូរយោបល់ អង្គប្រជុំបានពិនិត្យលើរបាយការណ៍ជារួមស្តីពីប្រព័ន្ធគន្លងអប់រំសម្រាប់កម្ពុជា ដែលផ្ដោតលើ ទី១. បរិបទប្រទេស និងបញ្ហាប្រឈមក្នុងបរិបទអប់រំនៅកម្ពុជា និង ទី២. ជម្រើសគន្លងអប់រំនៅកម្ពុជា។

ឆ្លើយតបទៅនឹងយុទ្ធសាស្ត្របញ្ចកោណ ដំណាក់កាលទី១ ដែលផ្ដោតសំខាន់លើការអភិវឌ្ឍធនធានមនុស្ស វិទ្យាសាស្ត្រ និងបច្ចេកវិទ្យា ការបណ្តុះបណ្តាលជំនាញបច្ចេកទេស និងសង្គមសេដ្ឋកិច្ចឌីជីថលទាមទារឱ្យមានការរៀបចំប្រព័ន្ធគន្លងអប់រំមួយច្បាស់លាស់ ដើម្បីពង្រឹងគុណភាពអប់រំ និងផ្សារភ្ជាប់ទៅនឹងការអប់រំនៅឧត្តមសិក្សា ជាពិសេសទីផ្សារការងារ។ គោលបំណងនៃការរៀបចំគន្លងអប់រំ គឺ (១). ដើម្បីរៀបចំតម្រង់ទិសសិស្សតាមសមត្ថភាព និងចំណង់ចំណូលចិត្តពីថ្នាក់បឋមសិក្សាមក និងតាមភូមិសិក្សានីមួយៗ (២). បង្កើតយន្តការកាត់បន្ថយអត្រាបោះបង់ការសិក្សានៅមធ្យមសិក្សា តាមរយៈការផ្សារភ្ជាប់ការអប់រំចំណេះទូទៅទៅនឹងការបណ្តុះបណ្តាលបច្ចេកទេស និងវិជ្ជាជីវៈ (៣). រៀបចំឱ្យមានផ្ទាល់វិទ្យាសាស្ត្រ និងបច្ចេកវិទ្យានៅកម្រិតមធ្យមសិក្សា ដើម្បីបង្កើន ការចូលរៀនជំនាញវិទ្យាសាស្ត្រ និងបច្ចេកវិទ្យានៅឧត្តមសិក្សា និង (៤). កំណត់ការវិនិយោគតាមស្ថានភាព ឬប្រភេទសាលារៀន។

ដើម្បីផ្តល់នូវជម្រើសត្រឹមត្រូវ និងកែលម្អប្រព័ន្ធគន្លងអប់រំប្រកបដោយប្រសិទ្ធភាព ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានស្នើឱ្យអង្គភាពនីមួយៗ ពិនិត្យមើលឡើងវិញដើម្បីចូលរួមកែលម្អ ត្រូវផ្តល់ធាតុចូលបន្ថែមដោយសរសេរជាលាយលក្ខណ៍អក្សរ ដើម្បីឱ្យមានភាពច្បាស់លាស់ ហើយពាក់ព័ន្ធនឹងការសិក្សាគន្លងអប់រំសូមផ្ដល់ជាទិន្នន័យក្នុង ១ឆ្នាំ ដោយត្រូវញែកឱ្យដាច់នូវចំនួនសិស្សដែលនឹងចូលរៀនកម្រិតឧត្តមសិក្សា ជំនាញវិជ្ជាជីវៈ ឬចូលរៀនស្ទែមជាដើម ដើម្បីអំណោយផលដល់ការពិនិត្យ និងវាយតម្លៃ ក៏ដូចជាបានផ្តល់អនុសាសន៍ឱ្យក្រុមការងារជំនាញ បន្តសិក្សាបន្ថែមលើប្រព័ន្ធគន្លងអប់រំប្រទេសសិង្ហបុរីដើម្បីជាគំរូ និងលម្អិតលើចំណុចខ្លាំង និងខ្សោយ នៃជម្រើសនីមួយៗ៕