សម្តេចធិបតី ហ៊ុន ម៉ាណែត៖ ព្រោះតែសង្គ្រាមទើបនាំឱ្យ ព្រះបដិមាខ្មែរត្រូវបានគេលួច និងជួញដូរទៅឆ្ងាយពីទឹកដីខ្មែរ

ភ្នំពេញ៖ ក្នុងឱកាសអញ្ជើញជាអធិបតី ក្នុងពិធីទទួលវត្ថុបុរាណ ដែលបានប្រគល់ជូនព្រះរាជាណាចក្រកម្ពុជាវិញ ចំនួន ៧១ នៅវិមានសន្តិភាព រាជធានីភ្នំពេញ នាព្រឹកថ្ងៃទី២២ ខែសីហា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ព្រោះតែសង្គ្រាមទើបនាំឱ្យព្រះបដិមាខ្មែរត្រូវបានគេលួច និងជួញដូរទៅឆ្ងាយពីទឹកដីខ្មែរ។

សម្តេចធិបតី ហ៊ុន ម៉ាណែត បានបង្ហាញក្តីសោមនស្សរីករាយក្រៃលែង បានអញ្ជើញទទួលវត្ថុបុរាណរបស់ខ្មែរត្រឡប់មកវិញ។ សម្តេចធិបតី បញ្ជាក់ថា បើកម្ពុជាគ្មានសង្គ្រាម ក្រុមជនទុច្ចរិតមិនអាចលួចយកសម្បត្តិវប្បធម៌ដូនតាខ្មែរទៅលក់បាននោះឡើយ។

សម្តេចធិបតី ហ៊ុន ម៉ាណែត បានគូសបញ្ជាក់ថា វត្ថុបុរាណដែលយើងទទួលបានមកវិញនាពេលនេះ ជាមរតកវប្បធម៌ជាតិ ដែលមានតម្លៃពុំអាច កាត់ថ្លៃបាន សម្រាប់ប្រជាជនកម្ពុជា ដែលជាម្ចាស់ដើមដ៏ពិតប្រាកដនៃសម្បត្តិវប្បធម៌ទាំងនេះ ៕