មន្ត្រីជាន់ខ្ពស់ក្រសួងធនធានទឹក ដឹកនាំកិច្ចប្រជុំពិគ្រោះយោបល់ជាមួយតំណាងដៃគូអភិវឌ្ឍន៍មកពីស្ថានទូតអូស្រ្តាលី
ភ្នំពេញ៖ នៅសាលប្រជុំនៃគណៈកម្មាធិការជាតិទន្លេមេគង្គកម្ពុជា នាថ្ងៃព្រហស្បតិ៍ ៣រោច ខែស្រាពណ៍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២២ ខែសីហា ឆ្នាំ២០២៤នេះ ឯកឧត្តម អាន ពេជ្រ ហត្ថដា រដ្ឋលេខាធិការ តំណាងដ៏ខ្ពង់ខ្ពស់របស់ ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយមបានអញ្ជើញដឹកនាំកិច្ចប្រជុំពិគ្រោះយោបល់ជាមួយតំណាងដៃគូអភិវឌ្ឍន៍មកពីស្ថានទូតអូស្រ្តាលី និងក្រុមរៀបចំកម្មវិធីសម្រាប់កម្មវិធីក្នុងការបន្សាំទៅនឹងអាកាសធាតុនៅកម្ពុជាដែលផ្តល់មូលនិធិដោយប្រទេសអូស្ត្រាលី។
សូមជម្រាបថា កិច្ចប្រជុំនេះមានការចូលរួមពីឯកឧត្តម ហ៊ែល តូនី អនុប្រធានក្ដាប់រួមនៃអាជ្ញាធរទន្លេសាប និងឯកឧត្ដម សូ សុភ័ទ្ទ អគ្គលេខាធិការនៃគណៈកម្មាធិការជាតិទន្លេមេគង្គកម្ពុជា។
ឯកឧត្តមរដ្ឋលេខាធិការបានបញ្ជាក់ថា កិច្ចប្រជុំបានផ្លាស់ប្តូរមតិយោបល់លើសំណើដែលមានសក្តានុពលនៃកម្មវិធីគ្រប់គ្រងធនធានទឹកនៅកម្ពុជាក្នុងលក្ខខណ្ឌនៃការប្រែប្រួលអាកាសធាតុ និងប្រជាសាស្រ្ត ព្រមទាំងបានពិភាក្សាលើបញ្ហាប្រឈមនានា ក៏ដូចជាភាពចាំបាច់ក្នុងការគ្រប់គ្រងធនធានទឹក ដែលមានភាពធន់ទៅនឹងអាកាសធាតុដែលតម្រូវឱ្យមានការធ្វើទំនើបកម្មអភិបាលកិច្ចទឹក តាមរយៈការបង្កើតគោលនយោបាយយុទ្ធសាស្ត្រ និងច្បាប់ ឧបករណ៍វាយតម្លៃ និងប្រព័ន្ធគ្រប់គ្រង។
ជាមួយគ្នានេះ ឯកឧត្តមរដ្ឋលេខាធិការ ក៏បានបញ្ជាក់ជូនអង្គប្រជុំផងដែរថា កម្មវិធីដែលបានស្នើឡើងគឺជាគំនិតផ្តួចផ្តើមពហុជំនាញ និងមានអភិក្រមជាកម្មវិធីដែលផ្តោតលើការបង្កើតក្របខណ្ឌយុទ្ធសាស្រ្ត និងកសាងមូលដ្ឋានគ្រឹះសម្រាប់ការគ្រប់គ្រងធនធានទឹកប្រកបដោយភាពធន់ទៅនឹងអាកាសធាតុ និងដើម្បីពង្រឹងសមត្ថភាពក្នុងការធានាដល់និរន្តរភាពនៃកិច្ចខិតខំប្រឹងប្រែង និងការវិនិយោគ ៕
