សម្ដេចធិបតី៖ ទោះបីបច្ចុប្បន្នបញ្ហាសេដ្ឋកិច្ចពិភពលោក ជះឥទ្ធិពលអវិជ្ជមានដល់សេដ្ឋកិច្ចកម្ពុជាក៏ដោយ ក៏ស្ថានភាពវិស័យការងារនៅកម្ពុជានៅតែមានភាពវិជ្ជមាន
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានបញ្ជាក់ថា ទោះពីជាបច្ចុប្បន្នបញ្ហាសេដ្ឋកិច្ចពិភពលោកមិនទាន់មានភាពនឹងនរ មានភាពមិនប្រាកដប្រជា ជះឥទ្ធិពលអវិជ្ជមានដល់សេដ្ឋកិច្ចកម្ពុជាក៏ដោយក៏ស្ថានភាពវិស័យការងារនៅក្នុងប្រទេសកម្ពុជានៅតែមានភាពវិជ្ជមាន។ ជាក់ស្ដែងក្នុងរយៈពេល ១២ខែ ឆ្នាំ២០២៤នេះ ទោះបីជាមានរោងចក្រសហគ្រាសមួយចំនួនបានបិទទ្វាក៏ដោយ ប៉ុន្ដែក៏មានរោងចក្រសហគ្រាសបើកថ្មីជាច្រើនផងដែរ ដោយបានបង្កើតការងារជាង ២២ម៉ឺនកន្លែង ដោយក្នុងនោះមានរោងចក្រកាត់ដេរបើកថ្មីចំនួន ២៧៥រោងចក្រ បង្កើតការងារថ្មីជាង ១៣ម៉ឺនកន្លែង។
ការបញ្ជាក់បែបនេះរបស់សម្តេចធិបតី នាយករដ្ឋមន្រ្តី ធ្វើឡើងក្នុងសេចក្តីថ្លែងការណ៍ពិសេសមួយ ស្តីពីសមិទ្ធផល១ឆ្នាំ របស់រាជរដ្ឋាភិបាលនីតិកាលទី៧ នៃរដ្ឋសភា ២២ សីហា ឆ្នាំ២០២៣ – ២២ សីហា ឆ្នាំ២០២៤ នៅយប់ថ្ងៃទី២២ ខែសីហា ឆ្នាំ២០២៤នេះ។
សម្តេចធិបតី ហ៊ុន ម៉ាណែត បានលើកឡើងថា ក្នុងរយៈពេល១២ខែ ក្រោមការដឹកនាំរបស់រាជរដ្ឋាភិបាល អាណត្តិទី៧ នៃរដ្ឋសភា រាជរដ្ឋាភិបាលបានធ្វើការដំឡើងប្រាប់ខែ និងប្រាក់ឧបត្ថម្ភផ្សេងៗជាបន្តបន្ទាប់ដល់មន្រ្តីរាជការកងកម្លាំងប្រាប់អាវុធគ្រប់ប្រភេទទាំងអស់ ជាពិសេសគឺ វិស័យអប់រំ និងវិស័យសុខាភិបាលជាដើមនោះ។
សម្តេចធិបតី បានគូសបញ្ជាក់ថា ក្រោមការដឹកនាំរបស់រាជរដ្ឋាភិបាល អាណត្តិទី៧ នៃរដ្ឋសភា រដ្ឋបានបង្កើនការផ្តល់ប្រាក់ឧបត្ថម្ភដល់ស្រ្តីមានផ្ទៃពោះ និងកុមារក្នុងក្របខណ្ឌរបបសន្តិសុខសង្គមបានជាង១២ម៉ឺននាក់ ដែលមានទឹកប្រាក់ប្រមាណជាង២៥លានដុល្លារអាមេរិក និងក៏បានផ្តល់ឱកាសជួយសម្រួលដល់ស្រ្តីមានផ្ទៃពោះដែលកំពុងជាប់ពិរុទ្ធភាពផងដែរ ៕
