លោកជំទាវ ឡោក ខេង អនុញ្ញាតឱ្យ លោកស្រី Dr Marianna Trias តំណាងឱ្យអង្គការWHO ប្រចាំនៅកម្ពុជាចូលជួបពិភាក្សាការងារ
ភ្នំពេញ៖ កាលពីរសៀលថ្ងៃទី២៣ ខែសីហា ឆ្នាំ២០២៤ គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភា (គណៈកម្មការទី៨) ដឹកនាំដោយលោកជំទាវ ឡោក ខេង ប្រធានគណៈកម្មការ និងមានការចូលរួមដោយលោកជំទាវ មុំ សណ្តាប់ សមាជិកគណៈកម្មការទី៦នៃព្រឹទ្ធសភា បានអនុញ្ញាតឱ្យលោកស្រី Dr Marianna Trias តំណាងឱ្យអង្គការWHO ប្រចាំនៅកម្ពុជា លោក Dr Lluis Vinals Torres ប្រធានផ្នែកប្រព័ន្ធសុខាភិបាលនៃការិយាល័យWHOប្រចាំតំបន់ប៉ាសុីហ្វិកខាងលិច និងសហការីចូលជួបសំណេះសំណាលពិភាក្សាការងារ នៅវិមានរដ្ឋសភា។
ក្នុងជំនួបពិភាក្សានេះមានគោលបំណងស្តាប់បទបង្ហាញរបស់អង្គការWHO សម្រាប់ជាគន្លឹះចូលរួមក្នុងកិច្ចប្រជុំនៃវេទិកាសមាជិកសភាអាសុី ប៉ាស៊ីហ្វិកលើកទី៨ស្តីពីសុខភាពជាសកល ( Asia Pacific Parliamentarian Forum on Global Health ) ដែលនឹងប្រព្រឹត្តទៅនៅថ្ងៃទី៤ ដល់ទី៦ ខែកញ្ញា ឆ្នាំ២០២៤ នៅទីក្រុងព័រវីឡា នៃសាធារណរដ្ឋវ៉ាណូទូ(Vanuatu)។
ឆ្លៀតឱកាសនោះ លោកស្រី Dr Marianna Trias បានមានប្រសាសន៍លើកឡើងនូវចំនុចសំខាន់ៗជាច្រើនទាក់ទងការបណ្តុះបណ្តាល និងពង្រឹងធនធានមនុស្សក្នុងវិស័យសុខាភិបាលនៅក្នុងវេទិការសមាជិកសភាអាសុីប៉ាសុីហ្វិកស្តីពីសុខភាពសកល ដែលប្រព្រឹត្តិនៅប្រទេសវ៉ាណូទូ(Vanuatu) នាខែកញ្ញាមុខនេះ ព្រមទាំងបានស្នើសុំឱ្យព្រះរាជាណាចក្រកម្ពុជាធ្វេីជាម្ចាស់ផ្ទះសម្រាប់វេទិការសមាជិកសភាអាសុីប៉ាសុីហ្វិកស្តីពីសុខភាពសកល ( Asia Pacific Parliamentarian Forum on Global Health ) លេីកទី៩ នៅឆ្នាំ២០២៦ខាងមុខនេះ។
ទន្ទឹមនឹងនោះដែរ លោកជំទាវ ឡោក ខេង បានថ្លែងអំណរ គុណដល់ភាគី WHO ដែលបានផ្តល់មតិយោបល់ជាច្រើន ដេីម្បីជាធាតុផ្សំមួយសម្រាប់ចូលរួមក្នុងកិច្ចប្រជុំនៅប្រទេសវ៉ាន់ណាទូនាពេលខាងមុខនេះ និងផ្តល់ទំនុកចិត្ត ការជឿជាក់នៃសភាកម្ពុជា ក្នុងការធ្វេីជាម្ចាស់ផ្ទះនៃវេទិកានេះ នាឆ្នាំ២០២៦។
លោកជំទាវប្រធាន បានលេីកឡេីងពីសមិទ្ធផលសម្រេចបាន នៃគោលនយោបាយអាទិភាពរបស់រាជរដ្ឋាភិបាល គឺការគ្របដណ្តប់សុខភាពជាសកលនិងបង្ហាញពីគោលដៅក្នុងការប្រយុទ្ធប្រឆាំងជំងឺឆ្លង និងជំងឺផ្សេងៗទៀតពិសេសគណៈកម្មការបានយកចិត្តទុកដាក់ខ្លាំងលើជំងឺមិនឆ្លង។
ជាមួយគ្នានេះលោកជំទាវប្រធានបានបង្ហាញពីលទ្ធផលជាច្រើននៃកិច្ចសហការណ៍ល្អរវាងគណ:កម្មការទី៨ ជាមួយ WHO ទាំងថ្នាក់តំបន់ និងប្រចាំកម្ពុជានាកន្លងមក និងឱ្យWHO រក្សានូវកិច្ចសហការដ៏ល្អនេះបន្តទៅទៀតដេីម្បីលេីកកម្ពស់ការយល់ដឹងពីហានិភ័យនៃជំងឺមិនឆ្លងដល់អាជ្ញាធរគ្រប់លំដាប់ថ្នាក់ និងការបណ្តុះបណ្តាលជនបង្គោលនៅថ្នាក់ក្រោមជាតិ ពិសេសគឺតាមភូមិ ឃុំ សង្កាត់ ដែលនៅជិតប្រជាជន។ ចំពោះការរៀបចំធ្វើជាម្ចាស់ផ្ទះក្នុងវេទិកាសមាជិកសភាអាសុីប៉ាសុីហ្វិកស្តីពីសុខភាពសកល ( Asia Pacific Parliamentarian Forum on Global Health ) លោកជំទាវ ឡោក ខេង នឹងរាយការណ៍ស្នេីសុំការសម្រេចឯកភាពពីសម្តេចរដ្ឋសភាធិបតី ប្រធានរដ្ឋសភាជាមុន សិន ហេីយលោកជំទាវក៏បានស្នេីសុំអោយភាគី WHO ជួយដល់កម្ពុជាលើផ្នែកថវិកា និងបច្ចេកទេស។
ទីបញ្ចប់នេះលោក Dr Lluis Vinals Torres បានបង្ហាញនូវក្តីសង្ឃឹមបន្ទាប់ពីលោកជំទាវត្រលប់មកពីកិច្ចប្រជុំវិញ នឹងបន្តកិច្ចការជាច្រេីនទៀត ដែលត្រូវសហការគ្នាកាន់តែរឹងមាំ ជិតស្និទ្ធ ព្រមទាំងបានឯកភាពជួយជាថវិកា និងបច្ចេកទេសជាច្រើនបន្ថែមទៀត ក្នុងពេលកម្ពុជាធ្វេីជាម្ចាស់ផ្ទះនៃវេទិការសមាជិកសភាអាសុីប៉ាសុីហ្វិកស្តីពីសុខភាពសាក នៅឆ្នាំ២០២៦ ខាងមុខនេះ តាមការស្នេីសុំរបស់លោកជំទាវ ឡោក ខេង ប្រធានគណៈកម្មការទី៨ ផងដែរ៕
