សម្តេចធិបតីនាយករដ្ឋមន្ត្រី ចង់ឲ្យឪពុកម្តាយ សហការជាមួយគ្រូ ប្រៀនប្រដៅកូនឱ្យមានឥរិយាបទល្អ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ចង់ឱ្យឪពុកម្តាយ ឬអាណាព្យាបាល សហការជាមួយលោកគ្រូ អ្នកគ្រូ ប្រៀនប្រដៅកូនរបស់ខ្លួន ឱ្យមានឥរិយាបទល្អ ។
ក្នុងឱកាសអញ្ជើញចុះពិនិត្យមើលសាលារៀនមួយកន្លែង នៅក្រុងឧដុង្គម៉ែជ័យ ខេត្តកំពង់ស្ពឺ ដែលជាសកម្មភាពក្រៅផ្លូវការ នាថ្ងៃសៅរ៍ ទី២៤ ខែសីហា ឆ្នាំ២០២៤នេះ សម្តេចធិបតី ហ៊ុន ម៉ាណែត បានមានប្រសាសន៍ថា ការខិតជិតគ្នារវាងឪពុកម្តាយ អាណាព្យាបាលសិស្ស និងលោកគ្រូ អ្នកគ្រូ នឹងធ្វើឱ្យកិច្ចការងារអប់រំ បណ្តុះបណ្តាលកូនសិស្សបានកាន់តែល្អ ដោយសារតែឪពុកម្តាយ និងលោកគ្រូអ្នកគ្រូ បានយល់ពីគ្នាកាន់តែច្បាស់ចំពោះការងារប្រៀនប្រដៅ អប់រំកូនសិស្សនៅក្នុងសាលា ដើម្បីបញ្ចៀសការយល់ច្រឡំណាមួយពីសំណាក់ឪពុកម្តាយ មកលើលោកគ្រូ អ្នកគ្រូ ជាដើម។
សម្តេចធិបតី បានលើកឡើងពីករណីក្មេងសិស្សសាលាម្នាក់ ដែលធាក់តុគ្រូ នៅខេត្តកំពង់ឆ្នាំងកន្លងទៅ ហើយនៅពេលដែលហៅម្តាយចូលទៅជួបលោកគ្រូ និងកូនរបស់គាត់ តែម្តាយបែរជាទៅអង្អែលក្បាលកូន ដែលមើលទៅដូចជាការលើកទឹកចិត្តក្មេងនោះទៅវិញ។
សម្តេចធិបតី បន្ថែមថា លោកគ្រូអ្នកគ្រូ បច្ចុប្បន្ននេះ មិនមែនអប់រំកូនសិស្សដែលពិបាកអប់រំដោយប្រើរំពាត់ផ្តាំដូចពីមុននោះទេ ប៉ុន្តែ លោកគ្រូអ្នកគ្រូ បច្ចុប្បន្ននេះ បានខិតខំប្រឹងប្រែងអប់រំកូនសិស្សដោយប្រើប្រាស់កាយវិការ និងសម្តីទន់ភ្លន់ ដើម្បីឱ្យកូនសិស្សទាំងអស់យល់ដឹងពីតម្លៃនៃការអប់រំ។ ដូច្នេះ សូមលោកគ្រូ អ្នកគ្រូ ឪពុកម្តាយ និងអាណាព្យាបាល ត្រូវទុកចិត្តគ្នារួមគ្នា និងជួយគ្នាដើម្បីបណ្តុះបណ្តាលធនធានមនុស្សទាំងអស់គ្នា។
សម្តេចធិបតី បានថ្លែងថា កម្លាំងចិត្តជួយគ្នា ដើម្បីប្រៀនប្រដៅ និងអប់រំកូនសិស្ស គឺជាធំធេងខ្លាំងណាស់ កូនរៀនពូកែហើយ តែក៏ត្រូវតែមានអត្តចរិតល្អផង គោរព ឪពុកម្តាយ លោកគ្រូ អ្នកគ្រូ និងចាស់ព្រឹទ្ធាចារ្យ គឺជាកត្តាចាំបាច់បំផុត។ សម្តេចក៏បានរំលឹកឡើងថា នៅដំណាក់កាលដែលសម្តេចកំពុងសិក្សានៅសហរដ្ឋអាមេរិក សាលារៀននៅទៅនោះក៏មានអប់រំលើផ្នែកចរិយាមាយាទ និងសីលធម៌នេះផងដែរ។
សម្តេចធិបតី ហ៊ុន ម៉ាណែត គូសបញ្ជាក់ថា ការមានវិន័យចាប់ពីកិច្ចការងារតូច ទោះអាចធ្វើកិច្ចការងារធំបាន។ ដូច្នេះ ការបង្រៀនកូនសិស្សឱ្យមានវិន័យចាប់ពីគ្រឹះក្រោមនេះ ទើបមានវិន័យអាចធ្វើកិច្ចការងារធំបាន ៕
