ឯកឧត្តម ឈិន កេតនា៖ ទិវាអក្ខរកម្មជាតិ ៨ កញ្ញា ឆ្នាំនេះ នឹងប្រារព្ធឡើងនៅខេត្តស្ទឹងត្រែង
ឯកឧត្តម ឈិន កេតនា ទីប្រឹក្សារាជរដ្ឋាភិបាល អនុប្រធានអចិន្ត្រៃយ៍ និងជាអគ្គលេខាធិការគណៈកម្មាធិការជាតិរៀបចំបុណ្យជាតិ-អន្តរជាតិ មានប្រសាសន៍ថា ទិវាអក្ខរកម្មជាតិ ឆ្នាំ២០២៤ និងប្រារព្ធរៀបចំឡើងនៅខេត្តស្ទឹងត្រែង ក្រោមប្រធានបទ “អក្ខរកម្មជាមូលដ្ឋានគ្រឹះនៃចំណេះដឹងបំណិន និងនវានុវត្តន៍” ។
ឯកឧត្តម លើកឡើងបែបនេះ ក្នុងឱកាសដែលឯកឧត្តមអញ្ជើញដឹកនាំកិច្ចប្រជុំ
ជាមួយអន្តរក្រសួង ព្រឹកថ្ងៃថ្ងៃទី២៨ ខែសីហា ឆ្នាំ២០២៤ នៅសាលប្រជុំ គណៈកម្មាធិការជាតិ រៀបចំបុណ្យជាតិ-អន្តរជាតិ ដោយមានការចូលរួមពី ឯកឧត្តម លោកជំទាវ តំណាងក្រសួង រដ្ឋលេខាធិការដ្ឋាន ស្ថាប័ន រដ្ឋបាលរាជធានីភ្នំពេញ និងរដ្ឋបាលខេត្តស្ទឹងត្រែង ដើម្បីពិភាក្សាការត្រៀមលក្ខណៈរៀបចំកម្មវិធីបុណ្យជាតិនិងអន្តរជាតិសំខាន់ៗចំនួន៤មាន ÷ ទិវាអក្ខរកម្មជាតិ ៨ កញ្ញា, ទិវាសន្តិភាពអន្តរជាតិ លើកទី២២ ថ្ងៃទី២១ ខែកញ្ញា, និងពិធីបុណ្យកាន់បិណ្ឌ ភ្ជុំបិណ្ឌ និងកឋិនទាន ឆ្នាំ២០២៤ ដែលនឹងប្រព្រឹត្តទៅនាពេលខាងមុខ។
ឯកឧត្តម លើកឡើងដែរថា ថ្ងៃទី៨ ខែកញ្ញា ជាថ្ងៃដែលត្រូវបានប្រកាសជាទិវាអក្ខរកម្មអន្តរជាតិដោយអង្គការយូណេស្កូនៅថ្ងៃទី១៧ វិច្ឆិកា ១៩៦៥។ ទិវានេះត្រូវបានប្រារព្ធឡើងជាលើកដំបូងនៅក្នុងឆ្នាំ ១៩៦៦ ក្នុងគោលបំណង ដើម្បីលើកយកនិងផ្សព្វផ្សាយអំពីសារៈសំខាន់នៃអក្ខរភាពទៅដល់សាធារណៈជន សហគមន៍និងសង្គមនានានៅជុំវិញពិភពលោក។ រៀងរាល់ឆ្នាំ នៅថ្ងៃនៃទិវាអក្ខរកម្មអន្តរជាតិ អង្គការយូណេស្កូបានរំលឹកជូនសហគមន៍អន្ដរជាតិទាំងឡាយ អំពីស្ថានភាពនៃអក្ខរកម្ម និងការសិក្សារបស់មនុស្សពេញវ័យ ទូទាំងសកលលោក។ ការប្រារព្ធទិវាអក្ខរកម្មអន្តរជាតិនេះ ត្រូវបានធ្វើឡើងតាមបណ្ដាប្រទេសនានានៅជុំវិញពិភពលោក។
ឯកឧត្តម ឈិន កេតនា ប្រធានអង្គប្រជុំ បានលើកឡើងអំពីខ្លឹមសារនៃផែនការណែនាំនីមួយៗ ស្ដីអំពីការត្រៀមលក្ខណៈរៀបចំកម្មវិធីបុណ្យជាតិនិងអន្តរជាតិសំខាន់ៗចំនួន៤ខាងលើ ជូនអង្គប្រជុំអោយបានជ្រាប និង បានឯកភាពជាគោលការណ៍ធ្វើការកំណត់បែងចែកភារកិច្ចជូនក្រសួង រដ្ឋលេខាធិការដ្ឋាន ស្ថាប័ន រដ្ឋបាលរាជធានី ខេត្ត សម្រាប់អនុវត្តន៍ ។
ឯកឧត្តម ក៏បានលើកឡើងអំពីការត្រៀមរៀបចំទិវាអក្ខរកម្មជាតិ ឆ្នាំ២០២៤ នៅរាជធានីភ្នំពេញ និងខេត្តគោលដៅ ពោលគឺឆ្នាំនេះរៀបចំឡើងនៅខេត្តស្ទឹងត្រែង ឱ្យប្រព្រឹត្តទៅដោយរលូន និងស្របតាមខ្លឹមសារដែលបានកំណត់ក្នុងលិខិតបទដ្ឋាន គតិយុត្តពាក់ព័ន្ធជាធរមាន ហើយ ឯកឧត្តម បានណែនាំឲរដ្ឋបាលខេត្តស្ទឹងត្រែងរៀបចំបង្កើតគណៈកម្មការ និងអនុគណៈកម្មការ ដើម្បីអនុវត្តភារកិច្ចរៀបចំទិវាអក្ខរកម្មជាតិ ៨ កញ្ញា ឆ្នាំ២០២៤ ព្រមទាំងសហការជាមួយក្រសួងអប់រំ យុវជន និងកីឡា ប្រារព្ធមីទ្ទិញមហាជន អបអរសាទរទិវាអក្ខរកម្មជាតិ ៨ កញ្ញា ឆ្នាំ២០២៤ នៅបរិវេណសាលាខេត្តស្ទឹងត្រែង។
