ឧបនាយកឧបនាយករដ្ឋមន្រ្តី អូន ព័ន្ធមុនីរ័ត្ន ៖ លទ្ធផលល្អជាផ្លែផ្កា របស់សហព័ន្ធកីឡាការ៉ាតេកម្ពុជា បានកើតចេញពីឯកភាព និងសាមគ្គីភាពផ្ទៃក្នុងដ៏រឹងមាំ

ចេញផ្សាយ ថ្ងៃទី 29 ខែ សីហា ឆ្នាំ 2024

ភ្នំពេញ៖ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានសហព័ន្ធកីឡាការ៉ាតេកម្ពុជាគូសបញ្ជាក់ថា លទ្ធផលល្អជាផ្លែផ្កានានាគួរជាទីមោទនៈបានកើតចេញពីឯកភាព និងសាមគ្គីភាពផ្ទៃក្នុងដ៏រឹងមាំ ក្នុងការដឹកនាំ និងការគ្រប់គ្រងប្រកបដោយប្រសិទ្ធភាពរបស់ថ្នាក់ដឹកនាំសហព័ន្ធកីឡាការ៉ាតេកម្ពុជា គួបផ្សំនឹងកិច្ចសហការយ៉ាស្អិតរមួត ក្នុងចំណោមមហាគ្រួសារកីឡាការ៉ាតេកម្ពុជា។

ក្នុងមហាសន្និបាតបញ្ចប់អាណត្តិទី៩ ឆ្នាំ ២០២០-២០២៤ និងបន្តអាណត្តិទី១០ ឆ្នាំ ២០២៤-២០២៨របស់សហព័ន្ធកីឡាការ៉ាតេកម្ពុជា នៅថ្ងៃទី២៩ ខែសីហា ឆ្នាំ២០២៤ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន មានប្រសាសន៍ថា ទន្ទឹមនេះ ការតស៊ូព្យាយាម និងភាពអត់ធ្មត់ ដោយលះបង់នូវកម្លាំងកាយចិត្ត និងពេលវេលា តាមរយៈការប្រឹងប្រែងហ្វឹកហាត់ជាប្រចាំរបស់កីឡាករ កីឡាការិនី ក្រោមការយកចិត្តទុកដាក់របស់គ្រូបង្វឹកបានធ្វើឱ្យកម្រិតគុណផលកីឡា ព្រមទាំងកម្រិតបច្ចេកទេសជំនាញទាំង Kata និង Kumite ក្នុងប៉ុន្មានឆ្នាំចុងក្រោយនេះ មានសន្ទុះរីកចម្រើនគួរឱ្យកត់សម្គាល់។ ជាលទ្ធផល កម្ពុជាអាចដណ្តើមមេដាយជាច្រើន ក្នុងការប្រកួតកីឡាការ៉ាតេអន្តរជាតិ, ជាពិសេស ចំនួនមេដាយក្នុងការប្រកួតកីឡា SEA Games, លើកទី៣២ ឆ្នាំ២០២៣ ដែលកម្ពុជាបានធ្វើជាម្ចាស់ផ្ទះ ប្រកបដោយជោគជ័យដ៏ត្រចះត្រចង់ជាប្រវត្តិសាស្រ្ត។ ការណ៍នេះអាចចាត់ទុកជារបត់ប្រែប្រួលដ៏ធំមួយ មិនធ្លាប់មាន នៅក្នុងប្រវត្តិនៃវិស័យកីឡាការ៉ាតេកម្ពុជា។ ជាងនេះទៀត ឯកឧត្តមប្រធានសហព័ន្ធសង្កេតឃើញថា ចលនាកីឡាការ៉ាតេ ក្នុងសង្គម ក៏មានការរីកចម្រើនយ៉ាងរហ័សផងដែរ ដោយសិស្សគុនទូទាំងប្រទេស បច្ចុប្បន្នមានចំនួនរហូតដល់ ៨៨៥នាក់។

ឯកឧត្តមអគ្គបណ្ឌិតសភាចារ្យ បន្ថែមថា «ស្របពេលដែលយើងកំពុងអបអរសាទរចំពោះសមិទ្ធផលនានា យើងក៏ត្រូវបន្តគិតគូរ អំពីទិសដៅទៅអនាគត នៃការរីកលូតលាស់នៃកីឡាការ៉ាតេរបស់កម្ពុជាផងដែរ។ ក្នុងនាមប្រធានសហព័ន្ធ ខ្ញុំយល់ថា កិច្ចការនេះទាមទានូវការយកចិត្តទុកដាក់ខ្ពស់ ជាពិសេស ការចូលរួមប្រកបដោយឆន្ទៈ និងស្មារតីបុរេសកម្មពីគ្រប់ភាគីពាក់ព័ន្ធទាំងអស់ រាប់ចាប់ពីរូបខ្ញុំផ្ទាល់ រហូតដល់ថ្នាក់ដឹកនាំ និងមន្រ្តីសហព័ន្ធ ក៏ដូចជាកីឡាករ-កីឡាការិនី គ្រូបង្វឹក និងគ្រូជំនួយទាំងអស់ផងដែរ»។

សម្រាប់អាណត្តិថ្មី ឆ្នាំ២០២៤-២០២៨ ឯកឧត្តមប្រធានសហព័ន្ធបានស្នើភាគីពាក់ព័ន្ធទាំងអស់ផ្តោតការយកចិត្តទុកដាក់លើចំណុចគន្លឹះមួយចំនួន ក្នុងការលើកកម្ពស់ «ចលនាការ៉ាតេ ដើម្បីទាំងអស់គ្នា» (Karate for all) តាមរយៈ ការបំផុសចលនាយុវជន និងមហាជនឱ្យចូលរួមហាត់ និងលេងកីឡា ជាការកម្សាន្តសប្បាយ និងដើម្បីសុខភាពឱ្យបានកាន់តែច្រើនកុះករ ក្នុងនោះ សហព័ន្ធអាចបង្កើត «ទិវាការ៉ាតេជាតិ» (National Karate Day) ជារៀងរាល់ឆ្នាំ នៅតាមទីធ្លាសាធារណៈណាមួយ ក្នុងរាជធានីភ្នំពេញ ឬខេត្តគោលដៅ។

បន្ថែមពីលើនេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ក៏បានជំរុញឱ្យបន្តការអភិវឌ្ឍបច្ចេកទេសជំនាញ តាមរយៈការបន្តពង្រឹងការហាត់ហ្វឹកហ្វឺនជំនាញ ដោយរៀបចំនូវសិក្ខាសាលាការ៉ាតេ សម្រាប់គ្រូបង្វឹកជំនាញ និងអាជ្ញាកណ្តាល ឬ ចៅក្រម ឱ្យបានដល់គ្រូបង្វឹកទាំងអស់ នៅតាមគ្រប់ក្លឹប ជាសមាជិកនៃសហព័ន្ធ។ ការបន្តការយកចិត្តទុកដាក់ខ្ពស់ លើការរៀបចំលក្ខណៈសម្បត្តិទ្រទ្រង់ សម្រាប់គ្រប់ការហ្វឹកហ្វឺនរបស់ក្រុមជម្រើសជាតិ ពិសេសជាមួយគ្រូបង្វឹកបរទេស ព្រមទាំងកៀរគរចំណូលបន្ថែមសម្រាប់ «មូលនិធិការ៉ាតេ» ផងដែរ។

គួរបញ្ជាក់ថា មហាសន្និបាតបានប្រកាសនូវសមាសភាពសមាជិកគណៈកម្មាធិការប្រតិបត្តិសហព័ន្ធអាណត្តិថ្មី ២០២៤-២០២៨ តាមរយៈការបោះឆ្នោត ដោយមានសមាជិកចំនួន ២៣រូប ក្នុងនោះឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានជាប់ឆ្នោត បន្តដឹកនាំជាប្រធានសហព័ន្ធ អមដោយអនុប្រធាន៧រូប ឯកឧត្តម វ៉ាត់ ចំរើន ជាអគ្គលេខាធិការ៕រដ្ឋមន្រ្តី អូន ព័ន្ធមុនីរ័ត្ន ៖ លទ្ធផលល្អជាផ្លែផ្កា របស់សហព័ន្ធកីឡាការ៉ាតេកម្ពុជា បានកើតចេញពីឯកភាព និងសាមគ្គីភាពផ្ទៃក្នុងដ៏រឹងមាំ

ភ្នំពេញ៖ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានសហព័ន្ធកីឡាការ៉ាតេកម្ពុជាគូសបញ្ជាក់ថា លទ្ធផលល្អជាផ្លែផ្កានានាគួរជាទីមោទនៈបានកើតចេញពីឯកភាព និងសាមគ្គីភាពផ្ទៃក្នុងដ៏រឹងមាំ ក្នុងការដឹកនាំ និងការគ្រប់គ្រងប្រកបដោយប្រសិទ្ធភាពរបស់ថ្នាក់ដឹកនាំសហព័ន្ធកីឡាការ៉ាតេកម្ពុជា គួបផ្សំនឹងកិច្ចសហការយ៉ាស្អិតរមួត ក្នុងចំណោមមហាគ្រួសារកីឡាការ៉ាតេកម្ពុជា។

អូន ព័ន្ធមុនីរ័ត្ន